ಐಸಿಸಿ ಟಿ20 ಶ್ರೇಯಾಂಕ: ಜೀವನಶ್ರೇಷ್ಠ 3ನೇ ಸ್ಥಾನಕ್ಕೆ ಸೂರ್ಯ, ಹಾರ್ದಿಕ್​ 23 ಸ್ಥಾನ ಜಿಗಿತ

ಐಸಿಸಿ ಟಿ20 ರ‍್ಯಾಂಕಿಂಗ್ ಪಟ್ಟಿ ಬಿಡುಗಡೆಯಾಗಿದ್ದು, ಸೂರ್ಯಕುಮಾರ್​ ಯಾದವ್​ ಜೀವನಶ್ರೇಷ್ಠ 3ನೇ ಸ್ಥಾನಕ್ಕೆ ಲಗ್ಗೆ ಇಟ್ಟಿದ್ದಾರೆ. ಪಾಕಿಸ್ತಾನದ ಮೊಹಮದ್​ ರಿಜ್ವಾನ್​ ಅಗ್ರಸ್ಥಾನದಲ್ಲಿದ್ದಾರೆ.

ದುಬೈ:ಭಾರತದ ಬ್ಯಾಟರ್​ಗಳಾದ ಸೂರ್ಯಕುಮಾರ್ ಯಾದವ್ ಮತ್ತು ಆಲ್​ರೌಂಡರ್ ಹಾರ್ದಿಕ್ ಪಾಂಡ್ಯಾ ಮೊಹಾಲಿಯಲ್ಲಿ ಆಸ್ಟ್ರೇಲಿಯಾ ವಿರುದ್ಧದ ಪಂದ್ಯದಲ್ಲಿ ನೀಡಿದ ಉತ್ತಮ ಪ್ರದರ್ಶನದಿಂದ ಐಸಿಸಿ ಟಿ20 ರ‍್ಯಾಂಕಿಂಗ್ ​ನಲ್ಲಿ ಏರಿಕೆ ಕಂಡಿದ್ದಾರೆ.

ಐಸಿಸಿ ಬಿಡುಗಡೆ ಮಾಡಿದ ಶ್ರೇಯಾಂಕ ಪಟ್ಟಿಯಲ್ಲಿ ಸೂರ್ಯಕುಮಾರ್​ ಯಾದವ್​, ಪಾಕಿಸ್ತಾನದ ಬಾಬರ್​ ಅಜಂ ಹಿಂದಿಕ್ಕಿ ಜೀವನಶ್ರೇಷ್ಠ 3ನೇ ಶ್ರೇಯಾಂಕ ಪಡೆದರು. ಪಾಕಿಸ್ತಾನದ ಬಾಬರ್​ ಅಜಂ ಒಂದು ಸ್ಥಾನ ಕುಸಿದು ನಾಲ್ಕನೇ ರ‍್ಯಾಂಕಿಂಗ್ ಗೆ ಇಳಿಕೆ ಕಂಡಿದ್ದಾರೆ. ಆಲ್​ರೌಂಡರ್​ ಹಾರ್ದಿಕ್​ ಪಾಂಡ್ಯಾ 23 ಸ್ಥಾನ ಮೇಲೇರಿ 65 ನೇ ಶ್ರೇಯಾಂಕ ಗಳಿಸಿದ್ದಾರೆ. ಬ್ಯಾಟಿಂಗ್​ ಕಿಂಗ್​ ವಿರಾಟ್​ ಕೊಹ್ಲಿ 1 ಸ್ಥಾನ ಕುಸಿದು 16 ಕ್ಕೆ ಜಾರಿದರೆ, ರೋಹಿತ್​ ಶರ್ಮಾ 14 ನೇ ಸ್ಥಾನದಲ್ಲಿ ಮುಂದುವರಿದಿದ್ದಾರೆ.

ಆಲ್​ರೌಂಡರ್​ ಪಟ್ಟಿಯಲ್ಲಿ ಆಸ್ಟ್ರೇಲಿಯಾದ ಗ್ಲೆನ್​ ಮ್ಯಾಕ್ಸವೆಲ್ ಅವ​ರನ್ನು ಹಿಂದಿಕ್ಕಿದ ಹಾರ್ದಿಕ್​ ಪಾಂಡ್ಯ 2 ಸ್ಥಾನ ಜಿಗಿದು 5 ನೇ ಶ್ರೇಯಾಂಕ ಪಡೆದಿದ್ದಾರೆ. ಬೌಲಿಂಗ್​ ವಿಭಾಗದಲ್ಲಿ ಭಾರತದ ವೇಗಿ ಭುವನೇಶ್ವರ್​ ಕುಮಾರ್​ 2 ಸ್ಥಾನ ಕುಸಿದು 9 ಕ್ಕೆ ಬಂದರೆ, 3 ವಿಕೆಟ್​ ಪಡೆದು ಮಿಂಚಿದ ಸ್ಪಿನ್ನರ್​ ಅಕ್ಸರ್​ ಪಟೇಲ್​ ಒಮ್ಮೆಲೆ 25 ಸ್ಥಾನ ಜಿಗಿದು 33 ನೇ ಶ್ರೇಯಾಂಕಕ್ಕೆ ಲಗ್ಗೆ ಇಟ್ಟಿದ್ದಾರೆ. ಯಜುವೇಂದ್ರ ಚಹಲ್​ ಒಂದು ಶ್ರೇಯಾಂಕ ಕಳೆದುಕೊಂಡು 28 ರಲ್ಲಿದ್ದಾರೆ.

ಓದಿ:ಮಿಥಾಲಿ ರಾಜ್​ ದಾಖಲೆ ಉಡೀಸ್​, ವಿರಾಟ್​ ಕೊಹ್ಲಿ ಸಾಲಿಗೆ ಸ್ಮೃತಿ ಮಂಧಾನಾ..ಏನದು ಗೊತ್ತಾ?