ವಿಶ್ವ ಕ್ರಿಕೆಟ್​ನಲ್ಲಿ ಟೀಮ್​ ಇಂಡಿಯಾ ಪಾರಮ್ಯ: ನಂ.1 ಸ್ಥಾನಕ್ಕಾಗಿ ಕಿಂಗ್​ - ಪ್ರಿನ್ಸ್​​ ನಡುವೆ ಸ್ಪರ್ಧೆ

ಸದ್ಯ ನಡೆಯುತ್ತಿರುವ ವಿಶ್ವಕಪ್​ನಲ್ಲಿ ಟೀಮ್​ ಇಂಡಿಯಾದ ಆಟಗಾರರು ಉತ್ತಮ ಪ್ರದರ್ಶನ ನೀಡುತ್ತಿದ್ದು, ಶ್ರೇಯಾಂಕದಲ್ಲಿ ಏರಿಕೆ ಕಂಡಿದ್ದಾರೆ.

ಹೈದರಾಬಾದ್​: 2023ರ ಏಕದಿನ ವಿಶ್ವಕಪ್​ನಲ್ಲಿ ಟೀಮ್​ ಇಂಡಿಯಾದ ಆಟಗಾರರು ಭರ್ಜರಿ ಬ್ಯಾಟಿಂಗ್​ ಮಾಡುತ್ತಿದ್ದು, ತಂಡದ ಆಟಗಾರರ ನಡುವೆ ಶ್ರೇಯಾಂಕದ ಪೈಪೋಟಿ ಏರ್ಪಟ್ಟಿದೆ. ಅದರಲ್ಲೂ ಸ್ಪರ್ಧೆ ಈಗ ಕಿಂಗ್​​​ ವಿರಾಟ್​ ಕೊಹ್ಲಿ ಮತ್ತು ಪ್ರಿನ್ಸ್​ ಶುಭಮನ್​ ಗಿಲ್​ ನಡುವೆ ನಡೆಯುತ್ತಿದೆ. ವಿಶ್ವಕಪ್​ನ ಐದು ಇನ್ನಿಂಗ್ಸ್​ನಲ್ಲಿ ವಿರಾಟ್​ ಕೇವಲ ಒಂದರಲ್ಲಿ ವಿಫಲರಾಗಿದ್ದಾರೆ. ಉಳಿದೆಲ್ಲಾ ಪಂದ್ಯಗಳಲ್ಲಿ ಅವರು ರನ್​ ಗಳಿಸಿದ್ದಾರೆ. ಇದರಿಂದ 9ನೇ ಸ್ಥಾನದಲ್ಲಿದ್ದ ವಿರಾಟ್​ 6ನೇ ಸ್ಥಾನಕ್ಕೆ ಏರಿಕೆ ಕಂಡಿದ್ದಾರೆ. ಜ್ವರದಿಂದ ಚೇತರಿಸಿಕೊಂಡ ಗಿಲ್​ ಒಂದು ದೊಡ್ಡ ಇನ್ನಿಂಗ್ಸ್​ ಆಡಿದಲ್ಲಿ ಅಗ್ರಸ್ಥಾನಕ್ಕೇರಲಿದ್ದಾರೆ.

ವಿಶ್ವಕಪ್​ನಲ್ಲಿ ಸಾಧಾರಣ ಪ್ರದರ್ಶನ ನೀಡುತ್ತಿರುವ ಪಾಕಿಸ್ತಾನ ನಾಯಕ ಬಾಬರ್​ ಅಜಮ್​ ಅವರ ಅಗ್ರ ಪಟ್ಟ ಅಲುಗಾಡುತ್ತಿದೆ. ವಿಶ್ವಕಪ್​​ಗೂ ಮುನ್ನವೇ ತಂಡ ನಂ.1 ಸ್ಥಾನವನ್ನು ಕಳೆದುಕೊಂಡಿತ್ತು. ಅಲ್ಲದೇ ಮೂವರು ಪಾಕ್​ ಆಟಗಾರರು ಟಾಪ್​ 5 ಸ್ಥಾನದಲ್ಲಿ ಇದ್ದರು. ಆದರೆ ಏಷ್ಯಾಕಪ್​ ಮತ್ತು ವಿಶ್ವಕಪ್​ನ ಕಳಪೆ ಪ್ರದರ್ಶನದಿಂದ ಸ್ಥಾನಗಳನ್ನು ಕಳೆದುಕೊಂಡಿದ್ದಾರೆ. ಬಾಬರ್​ ಅಜಮ್​ ವಿಶ್ವಕಪ್​ನ ಐದು ಇನ್ನಿಂಗ್ಸ್​ನಿಂದ ಕೇವಲ 156 ರನ್​ ಗಳಿಸಿದ್ದಾರೆ. ಅದರಲ್ಲಿ ಅಫ್ಗಾನ್​ ವಿರುದ್ಧ 74 ರನ್​ ಗಳಿಸಿದ್ದೇ ದೊಡ್ಡ ಮೊತ್ತವಾಗಿದೆ.

ಗಿಲ್​ ಜೊತೆ ಕೊಹ್ಲಿ ಪೈಪೋಟಿ: ಜ್ವರದಿಂದ ಚೇತರಿಸಿಕೊಂಡ ವಿಶ್ವಕಪ್​ ತಂಡಕ್ಕೆ ಮರಳಿದ ಶುಭಮನ್​ ಗಿಲ್​ ಫಾರ್ಮ್​ನಲ್ಲಿ ಕಂಡರೂ ದೊಡ್ಡ ಇನ್ನಿಂಗ್ಸ್​ ಆಡುವಲ್ಲಿ ವಿಫಲರಾಗುತ್ತಿದ್ದಾರೆ. ಕಳೆದ ಮೂರು ಇನ್ನಿಂಗ್ಸ್​ನಲ್ಲಿ ಗಿಲ್ ಒಂದು ಅರ್ಧಶತಕ ಸಹಿತ 95 ರನ್​ ಅಷ್ಟೇ ಕಲೆ ಹಾಕಿದ್ದಾರೆ. ಹೀಗಾಗಿ ಬಾಬರ್​ ಅವರಿಂದ ಕೇವಲ 6 ಪಾಯಿಂಟ್​ಗಳಿಂದ ಹಿಂದಿದ್ದಾರೆ. ಗಿಲ್​ ಒಂದು ಶತಕದ ಇನ್ನಿಂಗ್ಸ್ ಆಡಿದಲ್ಲಿ ನಂ.1 ಪಟ್ಟವನ್ನು ಅಲಂಕರಿಸಲಿದ್ದಾರೆ.

ಅತ್ತ ಪ್ರಿನ್ಸ್​ ಗಿಲ್​ಗೆ ಕಿಂಗ್​ ವಿರಾಟ್​ ಕೊಹ್ಲಿ ಸ್ಪರ್ಧೆ ನೀಡುತ್ತಿದ್ದಾರೆ. ವಿಶ್ವಕಪ್​ ಆರಂಭವಾದ ನಂತರ ಆಡಿದ ಐದು ಇನ್ನಿಂಗ್ಸ್​ನ ಫಲವಾಗಿ 9ನೇ ಸ್ಥಾನದಿಂದ 6ನೇ ಶ್ರೇಯಾಂಕಕ್ಕೆ ಜಿಗಿದಿದ್ದಾರೆ. ಐದು ಇನ್ನಿಂಗ್ಸ್​​ನಲ್ಲಿ ಮೂರು ಅರ್ಧಶತಕ, ಒಂದು ಶತಕದ ನೆರವಿನಿಂದ 354 ರನ್​ ಕಲೆಹಾಕಿದ್ದಾರೆ. ವಿರಾಟ್​ ಇದೇ ಫಾರ್ಮ್​ನಲ್ಲಿ ಮುಂದುವರೆದರೆ ಅಗ್ರಸ್ಥಾನವನ್ನು ಅಲಂಕರಿಸಲಿದ್ದಾರೆ. ಇನ್ನು ರೋಹಿತ್​ ಶರ್ಮಾ 8ನೇ ರ್‍ಯಾಂಕಿಂಗ್​ ಹೊಂದಿದ್ದಾರೆ.

ಬೌಲಿಂಗ್​ ಶ್ರೇಯಾಂಕ:ಬೌಲಿಂಗ್​ ಶ್ರೇಯಾಂಕದಲ್ಲಿ ಮೊಹಮ್ಮದ್​ ಸಿರಾಜ್​ ಎರಡನೇ ಸ್ಥಾನದಲ್ಲಿ ಮುಂದುವರೆದರೆ, ಕುಲ್ದೀಪ್​ ಯಾದವ್​ 9 ಮತ್ತು ಜಸ್ಪ್ರೀತ್​ ಬುಮ್ರಾ 13ನೇ ರ್‍ಯಾಂಕಿಂಗ್​ ಹೊಂದಿದ್ದಾರೆ. ಆಲ್​ರೌಂಡರ್​​​ ಶ್ರೇಯಾಂಕದಲ್ಲಿ ಹಾರ್ದಿಕ್​ ಪಾಂಡ್ಯ ನಂ.9 ರಲ್ಲಿ ಸ್ಥಾನ ಪಡೆದುಕೊಂಡಿದ್ದಾರೆ.

ಏಷ್ಯಾಕಪ್​​ನಲ್ಲಿ ಟೀಮ್​ ಇಂಡಿಯಾ ಚಾಂಪಿಯನ್​ ಪಟ್ಟವನ್ನು ಅಲಂಕರಿಸುವುದರೊಂದಿದೆ ಐಸಿಸಿ ಶ್ರೇಯಾಂಕದಲ್ಲಿ ನಂ.1 ತಂಡವಾಗಿತ್ತು. ಪ್ರಸ್ತುತ ಭಾರತ ತಂಡ ಮೂರು ಮಾದರಿಯ ಕ್ರಿಕೆಟ್​ನಲ್ಲಿ ಅಗ್ರ ಶ್ರೇಯಾಂಕಿತ ತಂಡವಾಗಿದೆ. ವಿಶ್ವ ಕ್ರಿಕೆಟ್​ನಲ್ಲಿ ಭಾರತ ತನ್ನ ಪಾರಮ್ಯವನ್ನು ಮೆರೆಯುತ್ತಿದೆ.

ಇದನ್ನೂ ಓದಿ:ಮುಂದಿನ ಎರಡು ಪಂದ್ಯಗಳಿಗೆ ಹಾರ್ದಿಕ್​ ಪಾಂಡ್ಯ ಅಲಭ್ಯ: ಸೆಮಿ-ಫೈನಲ್​​​ಗೆ ತಂಡಕ್ಕೆ ಸೇರಿಸಿಕೊಳ್ಳುವ ಚಿಂತನೆ