ಚೆನ್ನೈ (ತಮಿಳುನಾಡು):ಐಡೆನ್ ಮಾರ್ಕ್ರಾಮ್ ಅವರ ಸಮಯೋಚಿತ ಅರ್ಧಶತಕ ಹಾಗೂ ಕೊನೆಯ ಹಂತದಲ್ಲಿ 10ನೇ ವಿಕೆಟ್ಗೆ ಕೇಶವ್ ಮಹಾರಾಜ್ ಮತ್ತು ತಬ್ರೈಜ್ ಶಮ್ಸಿ ಅವರ ಬ್ಯಾಟಿಂಗ್ ಸಹಾಯದಿಂದ ಅತಿ ರೋಚಕವಾಗಿ ದಕ್ಷಿಣ ಆಫ್ರಿಕಾ ತಂಡ ಪಾಕಿಸ್ತಾನ ನೀಡಿದ್ದ 271 ರನ್ಗಳ ಗುರಿಯನ್ನು 16 ಎಸೆತಗಳನ್ನು ಉಳಿಸಿಕೊಂಡು 1 ವಿಕೆಟ್ನಿಂದ ಗೆದ್ದುಕೊಂಡಿತು.
ಚೆನ್ನೈನ ಚೆಪಾಕ್ ಕ್ರೀಡಾಂಗಣ ಈ ವಿಶ್ವಕಪ್ನ ಮೊದಲ ರೋಚಕ ಪಂದ್ಯ ಒಂದಕ್ಕೆ ಸಾಕ್ಷಿಯಾಯಿತು. ಗೆಲುವಿಗೆ 21 ರನ್ ಬೇಕಿದ್ದಾಗ 91 ರನ್ ಗಳಿಸಿ ಆಡುತ್ತಿದ್ದ ಐಡೆನ್ ಮಾರ್ಕ್ರಾಮ್ ವಿಕೆಟ್ ಉರುಳಿದ್ದು ದಕ್ಷಿಣ ಆಫ್ರಿಕಾ ತಂಡದ ಮೇಲೆ ಒತ್ತಡ ಹೆಚ್ಚಾಯಿತು. ನಂತರ ಬಾಲಂಗೋಚಿಗಳು ಪಂದ್ಯ ಗೆಲ್ಲಿಸುವರಾ ಎಂಬ ಪ್ರಶ್ನೆ ಎದುರಾಯಿತು. ಜೆರಾಲ್ಡ್ ಕೊಯೆಟ್ಜಿ ಮತ್ತು ಲುಂಗಿ ಎನ್ಗಿಡಿಯೂ ಪಂದ್ಯ ಗೆಲ್ಲಿಸುವಲ್ಲಿ ಕೊಡುಗೆ ನೀಡಲಿಲ್ಲ. ಕೊನೆಯಲ್ಲಿ ಕೇಶವ್ ಮಹಾರಾಜ್ ಮತ್ತು ತಬ್ರೈಜ್ ಶಮ್ಸಿ 11 ರನ್ ಗಳಿಸಿ ತಂಡವನ್ನು 16 ಬಾಲ್ ಉಳಿಸಿಕೊಂಡು ಗೆಲ್ಲಿಸಿಕೊಟ್ಟರು. ಪಾಕಿಸ್ತಾನ ಹರಿಣಗಳ ಒಂದು ವಿಕೆಟ್ ಪಡೆಯುವಲ್ಲಿ ವಿಫಲವಾಗಿ ಸತತ ನಾಲ್ಕನೇ ಸೋಲು ಕಂಡಿತು.
ಪಾಕಿಸ್ತಾನ ಸುಧಾರಿತ ಬ್ಯಾಟಿಂಗ್, ಬೌಲಿಂಗ್ ಫೀಲ್ಡಿಂಗ್ ಪ್ರದರ್ಶನ ನೀಡಿದರೂ ಗೆಲುವು ದೂರದ ಮಾತಾಯಿತು. ಚೇಸಿಂಗ್ ಮಾಡುವಾಗ ಒತ್ತಡದಲ್ಲಿ ಬ್ಯಾಟಿಂಗ್ ಮಾಡಲಾಗದೇ ಹರಿಣಗಳ ತಂಡ ಸೋಲು ಕಂಡಿತ್ತು. ಇದೇ ಲೆಕ್ಕಾಚಾರದಲ್ಲಿ ಪಾಕ್ ಮೊದಲು ಬ್ಯಾಟಿಂಗ್ಗೆ ಇಳಿಯಿತು. ಬಾಬರ್ ಅಜಮ್ ಮತ್ತು ಸೌದ್ ಶಕೀಲ್ ಅರ್ಧಶತಕದ ಕೊಡುಗೆಯಿಂದ 270 ರನ್ ಗಳಿಸಿತಾದರೂ ಕೊನೆಯ ಬ್ಯಾಟರ್ಗಳು ಬೇಗ ವಿಕೆಟ್ ಒಪ್ಪಿಸಿದ ಕಾರಣ 46.3 ಆಲ್ಔಟ್ ಆಯಿತು.