ವಿಶ್ವಕಪ್​ ಕ್ರಿಕೆಟ್​​: ಹರಿಣಗಳ ಮುಂದೆ ಮಂಡಿಯೂರಿದ ಕಿವೀಸ್​: ದಕ್ಷಿಣ ಆಫ್ರಿಕಾಕ್ಕೆ 190 ರನ್​ಗಳ ಗೆಲುವು

ದಕ್ಷಿಣ ಆಫ್ರಿಕಾ ಪುಣೆ ಮೈದಾನದಲ್ಲಿ ನ್ಯೂಜಿಲೆಂಡ್​ ವಿರುದ್ಧ 190 ರನ್​ಗಳ ಜಯ ದಾಖಲಿಸಿದೆ. ಇದರಿಂದ 2023ರ ವಿಶ್ವಕಪ್​ ಅಂಕಪಟ್ಟಿಯಲ್ಲಿ ಮತ್ತೆ ಅಗ್ರಸ್ಥಾನ ಅಲಂಕರಿಸಿದೆ.

ಪುಣೆ (ಮಹಾರಾಷ್ಟ್ರ): ನಡೆಯುತ್ತಿರುವ ವಿಶ್ವಕಪ್​ನಲ್ಲಿ ಮತ್ತೊಂದು ದೊಡ್ಡ ಗೆಲುವು ದಾಖಲಿಸಿರುವ ದಕ್ಷಿಣ ಆಫ್ರಿಕಾ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರಿದೆ. ಪುಣೆ ಮೈದಾನದಲ್ಲಿ ನಡೆದ ದಕ್ಷಿಣ ಆಫ್ರಿಕಾ ಬೌಲರ್​ಗಳು ನ್ಯೂಜಿಲೆಂಡ್ ತಂಡವನ್ನು 36 ಓವರ್​ನಲ್ಲಿ167 ರನ್​ಗೆ ಆಲ್​ಔಟ್​​ ಮಾಡಿದರು. ಇದರಿಂದ ಹರಿಣಗಳ ತಂಡ ಕಿವೀಸ್​ ವಿರುದ್ಧ 190 ರನ್​ಗಳ​ ಅಂತರದ ಗೆಲುವು ದಾಖಲಿಸಿದೆ. 2023ರ ವಿಶ್ವಕಪ್​​ನಲ್ಲಿ ದಕ್ಷಿಣ ಆಫ್ರಿಕಾ ತಾನು ಮೊದಲು ಬ್ಯಾಟಿಂಗ್​ ಮಾಡಿದಲ್ಲಿ ಬೃಹತ್​ ಗುರಿ ನೀಡಿ ಎದುರಾಳಿಗಳನ್ನು ಮಣಿಸುತ್ತೇನೆ ಎಂಬುದನ್ನು ಮತ್ತೆ ಸಾಬೀತು ಮಾಡಿದೆ.

ಟಾಸ್​ ಸೋತು ಮೊದಲು ಬ್ಯಾಟಿಂಗ್​ಗೆ ಇಳಿದ ದಕ್ಷಿಣ ಆಫ್ರಿಕಾ ಕ್ವಿಂಟನ್ ಡಿ ಕಾಕ್ (114), ರಾಸ್ಸಿ ವ್ಯಾನ್ ಡೆರ್ ಡುಸ್ಸೆನ್ (133), ಮತ್ತು ಡೇವಿಡ್ ಮಿಲ್ಲರ್ (53) ಅವರ ಇನ್ನಿಂಗ್ಸ್​ನ ಬಲದಿಂದ 357 ರನ್​ ಕಲೆಹಾಕಿತ್ತು. ಈ ಬೃಹತ್​ ಗುರಿಯನ್ನು ಬೆನ್ನಟ್ಟಿದ ಕಿವೀಸ್​ಗೆ ಇಂದಿನ ಪಂದ್ಯದಲ್ಲಿ ಕೇನ್​ ವಿಲಿಯಮ್ಸನ್​ ಅನುಪಸ್ಥಿತಿ ಕಾಡಿತು ಎಂದೇ ಹೇಳಬಹುದು.

ಮಾರ್ಕೊ ಜಾನ್ಸೆನ್ ಮತ್ತು ಕೇಶವ್ ಮಹಾರಾಜ್ ಕಿವೀಸ್​ಗೆ ಕಾಟಕೊಟ್ಟರು. 2 ರನ್ ಗಳಿಸಿದ್ದ ಡೆವೊನ್ ಕಾನ್ವೇ, 9 ರನ್ ಗಳಿಸಿದ್ದ ರಚಿನ್​ ರವೀಂದ್ರ ಅವರ ವಿಕೆಟ್​ನ್ನು ಜಾನ್ಸೆನ್​ ಕಿತ್ತರು. ಈ ನಡುವೆ ವಿಲ್ ಯಂಗ್ (33) ಸಹ ಔಟ್​ ಆದರು. 11ನೇ ಓವರ್ ವೇಳೆಗೆ ತಂಡ 3 ವಿಕೆಟ್​ ಕಳೆದುಕೊಂಡಿತ್ತು. ಮೇಲಿನ ಕ್ರಮಾಂಕದ ಕುಸಿತದ ನಂತರ ನ್ಯೂಜಿಲೆಂಡ್​ ಸತತ ವಿಕೆಟ್​ ನಷ್ಟವನ್ನು ಅನುಭವಿಸಿತು.

ಡ್ಯಾರಿಲ್ ಮಿಚೆಲ್ ಮಧ್ಯಮ ಕ್ರಮಾಂಕದಲ್ಲಿ ವಿಕೆಟ್​ ನಿಲ್ಲಿಸಲು ಪ್ರಯತ್ನಿಸಿದರಾದರೂ ಅವರಿಗೆ ಯಾರೂ ಸಾಥ್​ ನೀಡಲಿಲ್ಲ. 24 ರನ್​ಗೆ ಮಿಚೆಲ್​ ಹೋರಾಟವೂ ಅಂತ್ಯವಾಗಿತ್ತು. ಅವರ ಬೆನ್ನಲ್ಲೇ ಟಾಮ್ ಲ್ಯಾಥಮ್ (4), ಜೇಮ್ಸ್ ನೀಶಮ್ (0), ಮಿಚೆಲ್ ಸ್ಯಾಂಟ್ನರ್ (7), ಟಿಮ್ ಸೌಥಿ (7), ಟ್ರೆಂಟ್ ಬೌಲ್ಟ್ (9)

ಫಿಲಿಪ್ಸ್​ ವ್ಯರ್ಥ ಅರ್ಧಶತಕದ ಹೋರಾಟ: ತಂಡ ಬೃಹತ್​ ಮೊತ್ತದ ಅಂತರದಲ್ಲಿ ಸೋಲು ಕಂಡರೆ ರನ್​ರೇಟ್​ ಮೇಲೆ ಪರಿಣಾಮ ಬೀರುತ್ತದೆ ಎಂಬ ಉದ್ದೇಶದಿಂದ ಗ್ಲೆನ್ ಫಿಲಿಪ್ಸ್ (60) ಕೊನೆಯ ವರೆಗೂ ತಮ್ಮ ಹೋರಾಟವನ್ನು ನಡೆಸಿದರು. ಮೂರನೇ ಸ್ಥಾನದಲ್ಲಿರುವ ನ್ಯೂಜಿಲೆಂಡ್​ಗೆ ಈ ಸೋಲು ಸೆಮೀಸ್​ ಪ್ರವೇಶಕ್ಕೆ ಮುಳುವಾಗಿದೆ. ಉಳಿದ 2 ಪಂದ್ಯಗಳನ್ನು ಗೆದ್ದಲ್ಲಿ ಮಾತ್ರ ಸೆಮೀಸ್​ ಪಕ್ಕಾ ಆಗಲಿದೆ. ಹೀಗಾಗಿ ಕೊನೆಯ ಕ್ಷಣದಲ್ಲಿ ರನ್​ರೇಟ್​ ಸಮಸ್ಯೆ ತಂಡಕ್ಕೆ ಎದುರಾಗಲಿದೆ. ಆಸ್ಟ್ರೇಲಿಯಾ, ಪಾಕಿಸ್ತಾನ ಮತ್ತು ಅಫ್ಘಾನಿಸ್ತಾನ ಅಂಕಪಟ್ಟಿಯ 4ನೇ ಸ್ಥಾನಕ್ಕಾಗಿ ಸ್ಪರ್ಧೆಯಲ್ಲಿವೆ. ಕೊನೆಯಲ್ಲಿ ಮ್ಯಾಟ್​​ ಹೆನ್ರಿ ಫಿಲಿಪ್ಸ್​​ಗೆ ಸಾಥ್​ ನೀಡಿದರು. ಇದರಿಂದ ನ್ಯೂಜಿಲೆಂಡ್​ 35.3 ಓವರ್​ಗೆ 167 ರನ್​ ಗಳಸಿ ಆಲ್​ಔಟ್​ ಆಯಿತು.

ದಕ್ಷಿಣ ಆಫ್ರಿಕಾ ಬ್ಯಾಟಿಂಗ್​ ಜೊತೆಗೆ ಬೌಲಿಂಗ್​​​ನಲ್ಲೂ ಉತ್ತಮ ಪ್ರದರ್ಶನ ನೀಡಿತು. ಕೇಶವ್ ಮಹಾರಾಜ್ ಪ್ರಮುಖ ನಾಲ್ಕು ವಿಕೆಟ್​ಗಳನ್ನು ಕಿತ್ತರೆ, ಮಾರ್ಕೊ ಜಾನ್ಸೆನ್ 3 ವಿಕೆಟ್​ ಪಡೆದರು. ಉಳಿದಂತೆ ಜೆರಾಲ್ಡ್ ಕೊಯೆಟ್ಜಿ 2 ಮತ್ತು ಕಗಿಸೊ ರಬಾಡ ತಲಾ ಒಂದೊಂಡು ವಿಕೆಟ್​ ಪಡೆದರು.

ಪಂದ್ಯ ಶ್ರೇಷ್ಠ: 133 ರನ್​​ಗಳ​ ಬೃಹತ್​ ಇನ್ನಿಂಗ್ಸ್​ ಆಡಿದ ರಾಸ್ಸಿ ವ್ಯಾನ್ ಡೆರ್ ಡುಸ್ಸೆನ್ ಪಂದ್ಯ ಶ್ರೇಷ್ಠ ಪ್ರಶಸ್ತಿಗೆ ಭಾಜನರಾದರು.

ಇದನ್ನೂ ಓದಿ:ವಿಶ್ವಕಪ್​​ನಲ್ಲಿ ಇಂಗ್ಲೆಂಡ್ ಕಳಪೆ ಪ್ರದರ್ಶನ: ಅಂತಾರಾಷ್ಟ್ರೀಯ ಕ್ರಿಕೆಟ್​ಗೆ ವಿದಾಯ ಹೇಳಿದ ಆಲ್​ರೌಂಡರ್​​​