ಬೆಂಗಳೂರು: ಪಾಕಿಸ್ತಾನಕ್ಕೆ ಪ್ಲೇ ಆಫ್ ಪ್ರವೇಶಕ್ಕೆ ವರುಣನ ಸಹಕಾರವೂ ಸಿಕ್ಕಿದೆ. ಬೆಂಗಳೂರಿನ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಪಾಕಿಸ್ತಾನ ಡಿಎಲ್ಎಸ್ ನಿಯಮದನ್ವಯ 21 ರನ್ಗಳ ಜಯ ದಾಖಲಿಸಿದೆ. ನ್ಯೂಜಿಲೆಂಡ್ ನೀಡಿದ್ದ 402 ರನ್ ಗುರಿಯನ್ನು ಪಾಕಿಸ್ತಾನ ಬೆನ್ನಟ್ಟಿದಾಗ ಮಳೆ ಬಂದು ಪಂದ್ಯವನ್ನು ನಿಲ್ಲಿಸಲಾಯಿತು. ಮಳೆ ಬರುವ ವೇಳೆಗೆ ಪಾಕ್ ತಂಡ 25.3 ಓವರ್ಗೆ ಫಖರ್ ಜಮಾನ್ 126 ರನ್ ಮತ್ತು ಬಾಬರ್ ಅಜಮ್ 66 ರನ್ಗಳ ಸಹಾಯದಿಂದ 200 ರನ್ ಗಳಿಸಿ 1 ವಿಕೆಟ್ ಕಳೆದುಕೊಂಡಿತ್ತು. ಈ ಗೆಲುವಿನಿಂದ ಪಾಕ್ಗೆ ಸೆಮೀಸ್ ಪ್ರವೇಶದ ಹಾದಿ ಜೀವಂತವಾಗಿ ಉಳಿಸಿಕೊಂಡಿದೆ.
ಈ ವಿಶ್ವಕಪ್ನಲ್ಲಿ ಮೊದಲ ಎರಡು ಪಂದ್ಯಗಳ ಗೆಲುವಿನ ನಂತರ ಪಾಕಿಸ್ತಾನ ನಂತರ ನಾಲ್ಕು ಸೋಲು ಕಂಡಿತ್ತು. ಮತ್ತೆ ಗೆಲುವಿನ ಲಯಕ್ಕೆ ಮರಳಿದ ಪಾಕ್ ಕಳೆದ ಪಂದ್ಯದಲ್ಲಿ ಬಾಂಗ್ಲಾ ವಿರುದ್ಧ ಗೆದ್ದ ನಂತರ, ಬೆಂಗಳೂರಿನಲ್ಲಿ ಕಿವೀಸ್ ವಿರುದ್ಧ ಜಯ ದಾಖಲಿಸಿದೆ. ಇದರಿಂದ ಅಂಕಪಟ್ಟಿಯಲ್ಲಿ 5ನೇ ಸ್ಥಾನಕ್ಕೇರಿರುವ ಬಾಬರ್ ಪಡೆ ಕೊನೆಯ ಪಂದ್ಯವನ್ನು ಇಂಗ್ಲೆಂಡ್ ವಿರುದ್ಧ ಆಡಲಿದೆ. ಆಂಗ್ಲರ ವಿರುದ್ಧ ದೊಡ್ಡ ಗೆಲುವು ಸಾಧಿಸಿ ರನ್ರೇಟ್ ಸುಧಾರಿಸಿ ಕೊಂಡಲ್ಲಿ ಮಾತ್ರ ಸೆಮೀಸ್ ಪ್ರವೇಶ ಸಿಗುವ ಸಾಧ್ಯತೆ ಇದೆ.
ಟಾಸ್ ಗೆದ್ದು ಕ್ಷೇತ್ರ ರಕ್ಷಣೆ ಆಯ್ಕೆ ಮಾಡಿಕೊಂಡಿದ್ದ ಪಾಕ್ 402 ರನ್ನ ದೊಡ್ಡ ಗುರಿಯನ್ನೇ ಪಡೆದುಕೊಂಡಿತು. ಬಾಬರ್ ಪಡೆಯ ಬೌಲರ್ಗಳನ್ನು ರಚಿನ್ ರವೀಂದ್ರ (108 ಹಾಗೂ ನಾಯಕ ಕೇನ್ ವಿಲಿಯಮ್ಸನ್ (95) ಸರಿಯಾಗಿಯೇ ದಂಡಿಸಿದರು. ಬೆಂಗಳೂರಿನ ಬ್ಯಾಟಿಂಗ್ ಪಿಚ್ಗೆ ಇದು ದೊಡ್ಡ ಮೊತ್ತ ಅಲ್ಲ ಎಂದೇ ಹೇಳಬಹುದಾದರೂ, ಪಾಕಿಸ್ತಾನ ಕಳೆದ ಕೆಲ ಪಂದ್ಯಗಳ ಬ್ಯಾಟಿಂಗೆ ಇದು ಕಠಿಣ ಎಂಬಂತೆ ಕಂಡು ಬರುತ್ತಿತ್ತು.