ಬೆಂಗಳೂರು: 5 ಬಾರಿ ವಿಶ್ವಕಪ್ ಗೆದ್ದ ಆಸ್ಟ್ರೇಲಿಯಾ ತಂಡ ಈ ವರ್ಷ ಮೊದಲೆರಡು ಪಂದ್ಯಗಳನ್ನು ಬ್ಯಾಟಿಂಗ್ ವೈಫಲ್ಯದಿಂದ ಸೋತರೆ, ಮೂರನೇ ಪಂದ್ಯದಲ್ಲಿ ಸಾಧಾರಣ ಪ್ರದರ್ಶನದಿಂದ ಗೆಲುವು ದಾಖಲಿಸಿತ್ತು. ಆದರೆ ಇಂದಿನ ನಾಲ್ಕನೇ ಪಂದ್ಯದಲ್ಲಿ ಭರ್ಜರಿ ಕಮ್ಬ್ಯಾಕ್ ಮಾಡಿದ್ದು, ಪಾಕಿಸ್ತಾನದ ವಿರುದ್ಧ ದೊಡ್ಡ ಇನ್ನಿಂಗ್ಸ್ ಕಟ್ಟಿದೆ. ಆರಂಭಿಕರಾದ ಡೇವಿಡ್ ವಾರ್ನರ್ ಮತ್ತು ಮಿಚೆಲ್ ಮಾರ್ಷ್ ಅವರ ಅಬ್ಬರದ ಶತಕದ ನೆರವಿನಿಂದ ತಂಡವು ನಿಗದಿತ ಓವರ್‌ಗಳ ಅಂತ್ಯಕ್ಕೆ 9 ವಿಕೆಟ್ ನಷ್ಟಕ್ಕೆ 367 ರನ್ ಗಳಿಸಿತು.
ಟಾಸ್ ಗೆದ್ದ ಪಾಕ್ ನಾಯಕ ಆಸ್ಟ್ರೇಲಿಯಾಕ್ಕೆ ಬ್ಯಾಟಿಂಗ್ ಆಹ್ವಾನವಿತ್ತರು. ಟಿ20ಗೆ ಕ್ರಿಕೆಟ್ನ ಅಚ್ಚುಮೆಚ್ಚಿನ ಮೈದಾನವಾದ ಚಿನ್ನಸ್ವಾಮಿಯಲ್ಲಿ ಆಸ್ಟ್ರೇಲಿಯಾ ಆರಂಭಿಕರು ಅಬ್ಬರದ ಇನ್ನಿಂಗ್ಸ್ ಆಡಿದರು. ಪುಟ್ಟ ಮೈದಾನದಲ್ಲಿ ಬೌಂಡರಿ, ಸಿಕ್ಸರ್ಗಳ ಮಳೆಗೈದರು. ಪಾಕ್ ಬೌಲರ್ಗಳನ್ನು ಅನುಭವಿ ವಾರ್ನರ್ ಹಾಗೂ ಮಾರ್ಷ್ ಬೆಂಡೆತ್ತಿದರು. ಐಪಿಎಲ್ನಲ್ಲಿ ಆಡಿದ ಅನುಭವವನ್ನು ವಾರ್ನರ್ ಸಂಪೂರ್ಣವಾಗಿ ಬಳಸಿಕೊಂಡರು.
ಆರಂಭಿಕರ ದ್ವಿಶತಕ: ಪಾಕಿಸ್ತಾನಕ್ಕೆ ವಾರ್ನರ್ ಮತ್ತು ಮಾರ್ಷ್ ಜೊತೆಯಾಟವನ್ನು ಬೇರ್ಪಡಿಸುವುದು ಕಠಿಣ ಸವಾಲಾಯಿತು. ವಾರ್ನರ್ ವಿಶ್ವಕಪ್‌ನ 5ನೇ ಶತಕ ದಾಖಲಿಸಿದರೆ, ಜನ್ಮದಿನದಂದೇ ಮಾರ್ಷ್ ಸ್ಮರಣೀಯ 100 ರನ್ ಸಾಧಿಸಿದರು. 34ನೇ ಓವರ್‌ವರೆಗೂ ಈ ಜೋಡಿ ಪಾಲುದಾರಿಕೆ ಮಾಡಿತು. 33.5ನೇ ಓವರ್ನಲ್ಲಿ 121 ರನ್ ಗಳಿಸಿದ್ದ ಮಿಚೆಲ್ ಮಾರ್ಷ್ ವಿಕೆಟ್ ಕಳೆದುಕೊಂಡರು. ಇದರಿಂದ 259 ರನ್ಗಳ ಪಾಲುದಾರಿಕೆ ಅಂತ್ಯವಾಯಿತು. ವಾರ್ನರ್ ತಮ್ಮ ಬ್ಯಾಟಿಂಗ್ ಮುಂದುವರೆಸಿದರು. ಮಧ್ಯಮ ಕ್ರಮಾಂಕದಲ್ಲಿ ಅವರಿಗೆ ಜತೆಯಾಟ ಸಿಗದಿದ್ದರೂ 150 ರನ್ ಗಡಿ ದಾಟಿಸಿದರು. 14 ಬೌಂಡರಿ, 9 ಸಿಕ್ಸ್ನಿಂದ 163 ರನ್ಗಳ ಇನ್ನಿಂಗ್ಸ್ ಆಡಿ ವಾರ್ನರ್ ಔಟ್ ಆದರು.