ನಾವು ಸರಣಿ ಗೆಲ್ಲಬೇಕಾದರೆ ಕೊಹ್ಲಿಯನ್ನು ಸುಮ್ಮನಿರಿಸಬೇಕು ಜೋ ರೂಟ್​

ಖಂಡಿತವಾಗಿ ವಿರಾಟ್ ಕೊಹ್ಲಿ ನೇತೃತ್ವದ ಭಾರತ ವಿಶ್ವ ದರ್ಜೆಯ ತಂಡ, ನಾನು ಅವರಿಂದ ಕಡಿಮೆ ಪ್ರತಿಕ್ರಿಯೇ ಏನೂ ನಿರೀಕ್ಷಿಸುತ್ತಿಲ್ಲ. ನಾವು ಆಟದ ಯಾವುದೇ ಹಂತದಲ್ಲಾದರೂ ಸವಾಲು ಸ್ವೀಕರಿಸುವ ಮಟ್ಟಕ್ಕೆ ತಂಡವನ್ನು ಬಲಪಡಿಸಬೇಕು ಎಂದು ರೂಟ್​ ಹೇಳಿದ್ದಾರೆ

ನವದೆಹಲಿ: 5 ಪಂದ್ಯಗಳ ಸರಣಿಯಲ್ಲಿ ಉಳಿದಿರುವ ಎರಡು ಟೆಸ್ಟ್​ ಪಂದ್ಯಗಳಲ್ಲಿ ಗೆಲುವು ಸಾಧಿಸಬೇಕಾದರೆ ನಾವು ಭಾರತದ ನಾಯಕ ವಿರಾಟ್ ಕೊಹ್ಲಿಯನ್ನು ಸುಮ್ಮನಿರಿಸಬೇಕು ಎಂದು ಇಂಗ್ಲೆಂಡ್ ತಂಡದ ನಾಯಕ ಜೋ ರೂಟ್​ ಹೇಳಿದ್ದಾರೆ.

ಲಾರ್ಡ್ಸ್​ನಲ್ಲಿ ಭಾರತದ ಎದುರು 151 ರನ್​ಗಳ ಹೀನಾಯ ಸೋಲು ಕಂಡಿದ್ದ ಅತಿಥೇಯ ತಂಡ ಲೀಡ್ಸ್​ನಲ್ಲಿ ಅದ್ಭುತವಾಗಿ ತಿರುಗುಬಿದ್ದಿತ್ತು. ಭಾರತವನ್ನು 78ಕ್ಕೆ ಆಲೌಟ್ ಮಾಡಿದ್ದ ಇಂಗ್ಲೆಂಡ್​ ಇನ್ನಿಂಗ್ಸ್​ ಹಾಗೂ 76 ರನ್​ಗಳಿಂದ ಗೆದ್ದು ಬೀಗಿತ್ತು. 4ನೇ ಟೆಸ್ಟ್​ಗೂ ಮುನ್ನ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು ನಾವು ಸರಣಿ ಗೆಲ್ಲಬೇಕಾದರೆ ಕೊಹ್ಲಿ ಶಾಂತವಾಗಿರುವಂತೆ ಮಾಡಬೇಕು ಎಂದು ಹೇಳಿದ್ದಾರೆ.

ಎಲ್ಲ ಕ್ರೆಡಿಟ್​ ನಮ್ಮ ಬೌಲರ್​ಗಳಿಗೆ ಸಲ್ಲಬೇಕು. ವಿರಾಟ್​ ಒಬ್ಬ ವಿಶ್ವದರ್ಜೆಯ ಆಟಗಾರ. ಅವರನ್ನು ತಡೆಯುವಲ್ಲಿ ಸಫಲರಾಗುತ್ತಿರುವ ನಮ್ಮ ಬೌಲಿಂಗ್ ಬಳಗಕ್ಕೆ ಎಲ್ಲಾ ಶ್ರೇಯ ಸಲ್ಲಬೇಕು. ನಾವು ಆತನನ್ನು ಸುಮ್ಮನಿರುವಂತೆ ನೋಡಿಕೊಂಡಿದ್ದೇವೆ. ಅದು ನಮ್ಮ ಬೌಲಿಂಗ್ ವಿಭಾಗದ ಅತ್ಯಂತ ಉತ್ತಮ ಪ್ರಯತ್ನವಾಗಿದೆ.

ನಾವು ಸರಣಿಯನ್ನು ಗೆಲ್ಲಬೇಕಾದರೆ ಈ ಪ್ರಯತ್ನ ಹೀಗೆ ಮುಂದುವರಿಯಬೇಕು. ನಾವು ಕೊಹ್ಲಿಯನ್ನು ಔಟ್ ಮಾಡಲು ಮಾರ್ಗಗಳನ್ನು ಕಂಡುಕೊಂಡಿದ್ದೇವೆ. ಆತ ಅತ್ಯುತ್ತಮ ಆಟಗಾರ ಮತ್ತು ಟೆಸ್ಟ್​ ಕ್ರಿಕೆಟ್​ನಲ್ಲಿ ಅದ್ಭುತವಾದ ಸಾಧನೆ ಮಾಡಿದ್ದಾರೆ. ಹಾಗಾಗಿ ನಾವು ಅತ್ಯುತ್ತಮ ಆಟಗಾರರ ವಿಕೆಟ್ ಪಡೆಯುವ ಮಾರ್ಗಗಳನ್ನು ಸದಾ ನೋಡಬೇಕು ಎಂದು ರೂಟ್​ ಹೇಳಿದ್ದಾರೆ.

"ಖಂಡಿತವಾಗಿ ವಿರಾಟ್ ಕೊಹ್ಲಿ ನೇತೃತ್ವದ ಭಾರತ ವಿಶ್ವ ದರ್ಜೆಯ ತಂಡ, ನಾನು ಅವರಿಂದ ಕಡಿಮೆ ಪ್ರತಿಕ್ರಿಯೇ ಏನೂ ನಿರೀಕ್ಷಿಸುತ್ತಿಲ್ಲ. ನಾವು ಆಟದ ಯಾವುದೇ ಹಂತದಲ್ಲಾದರೂ ಸವಾಲನ್ನು ಸ್ವೀಕರಿಸುವ ಮಟ್ಟಕ್ಕೆ ತಂಡವನ್ನು ಬಲಪಡಿಸಬೇಕು" ಎಂದು ಅವರು ಹೇಳಿದ್ದಾರೆ.

ಇದನ್ನು ಓದಿ: ಖಂಡಿತ ಭಾರತ ಕಮ್​ಬ್ಯಾಕ್ ಮಾಡಲಿದೆ, ನಾವು ಅವರನ್ನೆದುರಿಸಲು ಸಿದ್ಧಗೊಳ್ಳುತ್ತಿದ್ದೇವೆ: ಕಾಲಿಂಗ್​ವುಡ್​