IND vs ENG Test ರೋಹಿತ್ ಜೊತೆ ವಿಹಾರಿ ಓಪನರ್​​: ಮಧ್ಯಮ ಕ್ರಮಾಂಕದಲ್ಲಿ ರಾಹುಲ್​ ಬ್ಯಾಟಿಂಗ್‌?

ಇಂಗ್ಲೆಂಡ್​ ವಿರುದ್ಧದ​ ಟೆಸ್ಟ್​ ಸರಣಿ ಆರಂಭಗೊಳ್ಳುವುದಕ್ಕೂ ಮುಂಚಿತವಾಗಿ ಟೀಂ ಇಂಡಿಯಾಗೆ ಆಘಾತ ಎದುರಾಗಿದೆ. ಅದೇನೆಂದರೆ, ಗಾಯಗೊಂಡಿರುವ ಶುಬ್ಮನ್​ ಗಿಲ್​ ಸರಣಿಯಿಂದ ಹೊರಬೀಳುವ ಸಾಧ್ಯತೆ ದಟ್ಟವಾಗಿದೆ. ಹೀಗಾಗಿ ಆರಂಭಿಕ ಸ್ಥಾನಕ್ಕೀಗ ಈ ಆಟಗಾರನ ಆಯ್ಕೆ ಮಾಡುವ ಸಂಭವ ಕಾಣುತ್ತಿದೆ.

ಇಂಗ್ಲೆಂಡ್​: ಟೀಂ ಇಂಡಿಯಾದ ಆರಂಭಿಕ ಆಟಗಾರ ಶುಬ್ಮನ್​ ಗಿಲ್​​ ಗಾಯಗೊಂಡಿದ್ದಾರೆ. ಹೀಗಾಗಿ, ಇಂಗ್ಲೆಂಡ್​ ವಿರುದ್ಧದ ಟೆಸ್ಟ್​ ಸರಣಿಯಿಂದ ಅವರು ಹೊರಗುಳಿಯುವುದು ಬಹುತೇಕ ಖಚಿತ.

ಲಭ್ಯವಾಗಿರುವ ಮಾಹಿತಿ ಪ್ರಕಾರ, ಹನುಮ​ ವಿಹಾರಿ ಆರಂಭಿಕರಾಗಿ ಟೆಸ್ಟ್​​ನಲ್ಲಿ ಇನ್ನಿಂಗ್ಸ್​​ ಶುರು ಮಾಡ್ತಾರೆ ಎಂಬ ಮಾತು ಕೇಳಿ ಬರುತ್ತಿದೆ. ಶುಬ್ಮನ್ ಗಿಲ್​ ಸ್ಥಾನಕ್ಕೆ ಆರಂಭಿಕರಾಗಿ ಮಯಾಂಕ್​ ಅಗರವಾಲ್​ ಹಾಗೂ ಸ್ಟ್ಯಾಂಡ್​ ಬೈ ಆಟಗಾರ ಅಭಿಮನ್ಯು ಈಶ್ವರನ್​ ಇದ್ದಾರೆ. ಆದರೆ ಇವರ ಬದಲಿಗೆ ಮಧ್ಯಮ ಕ್ರಮಾಂಕದಲ್ಲಿ ಬ್ಯಾಟ್​ ಬೀಸುವ ಹನುಮ​ ವಿಹಾರಿಗೆ ಆರಂಭಿಕ ಸ್ಥಾನ ನೀಡಲು ಕ್ಯಾಪ್ಟನ್​ ಕೊಹ್ಲಿ ನಿರ್ಧರಿಸಿದ್ದಾರೆ. ಮಧ್ಯಮ ಕ್ರಮಾಂಕದಲ್ಲಿ ಕೆ.ಎಲ್​ ರಾಹುಲ್​ಗೆ ಅವಕಾಶ ನೀಡುವ ಸಾಧ್ಯತೆಯೂ ಇದೆ.

ಟೀಂ ಇಂಡಿಯಾ ಆಟಗಾರರು (ಸಂಗ್ರಹ)

ಇತ್ತೀಚೆಗೆ ನ್ಯೂಜಿಲ್ಯಾಂಡ್​ ವಿರುದ್ಧ ನಡೆದ ಐಸಿಸಿ ಟೆಸ್ಟ್​ ಚಾಂಪಿಯನ್​ಶಿಪ್​ ಫೈನಲ್​ನಲ್ಲಿ ಟೀಂ ಇಂಡಿಯಾ ಸೋಲು ಕಂಡಿದ್ದು, ರನ್ನರ್​ಅಪ್​ ಆಗಿ ಹೊರಹೊಮ್ಮಿತು. ಇದೀಗ ಇಂಗ್ಲೆಂಡ್​ ವಿರುದ್ಧ 5 ಟೆಸ್ಟ್​​ ಪಂದ್ಯಗಳ ಸರಣಿ ಆಗಸ್ಟ್ ತಿಂಗಳಿಂದ ಆರಂಭಗೊಳ್ಳಲಿದೆ. ಇದಕ್ಕಾಗಿ ಈಗಾಗಲೇ ಟೀಂ ಇಂಡಿಯಾ ಇಂಗ್ಲೆಂಡ್​ನಲ್ಲಿದೆ. ಟೆಸ್ಟ್​ ಕ್ರಿಕೆಟ್​ನಲ್ಲಿ ಆರಂಭಿಕರಾಗಿ ಕಣಕ್ಕಿಳಿಯುತ್ತಿರುವ ರಾಹುಲ್ ಹೇಳಿಕೊಳ್ಳುವಂತಹ ಪ್ರದರ್ಶನ ನೀಡುತ್ತಿಲ್ಲ. ಹೀಗಾಗಿ ವಿಹಾರಿಗೆ ಸ್ಥಾನ ನೀಡಲು ತೀರ್ಮಾನಿಸಲಾಗಿದ್ದು, ರಾಹುಲ್​ಗೆ ಮಧ್ಯಮ ಕ್ರಮಾಂಕದಲ್ಲಿ ಅವಕಾಶ ನೀಡಲು ಮುಂದಾಗಿದೆ.

ಭಾರತ-ಇಂಗ್ಲೆಂಡ್ ಟೆಸ್ಟ್​ ಸರಣಿಯೊಂದಿಗೆ 2021-23ರ ಐಸಿಸಿ ಟೆಸ್ಟ್​ ಚಾಂಪಿಯನ್​ಶಿಪ್​ ಅಭಿಯಾನಕ್ಕೆ ಚಾಲನೆ ಸಿಗಲಿದೆ. ಪ್ರತಿ ಟೆಸ್ಟ್​​ ಪಂದ್ಯದಲ್ಲಿ ಗೆಲುವ ತಂಡಕ್ಕೆ 12 ಅಂಕ ನಿಗದಿಪಡಿಸಲಾಗಿದ್ದು, ಡ್ರಾಗೊಂಡರೆ 4 ಅಂಕ ಹಾಗೂ ಟೈ ಆದರೆ 6 ಅಂಕ ನಿಗದಿ ಮಾಡಲಾಗಿದೆ.

ಬರುವ ದಿನಗಳಲ್ಲಿ ಇಂಗ್ಲೆಂಡ್​ 21 ಟೆಸ್ಟ್​, ಭಾರತ 19, ಆಸ್ಟ್ರೇಲಿಯಾ 18, ದಕ್ಷಿಣ ಆಪ್ರಿಕಾ 15 ಟೆಸ್ಟ್​​​​ ಪಂದ್ಯಗಳನ್ನಾಡಲಿದ್ದು, ನ್ಯೂಜಿಲ್ಯಾಂಡ್​ ಕೇವಲ 13 ಟೆಸ್ಟ್​​ ಪಂದ್ಯಗಳಲ್ಲಿ ಭಾಗಿಯಾಗಲಿದೆ. ಉಳಿದಂತೆ ವೆಸ್ಟ್​ ಇಂಡೀಸ್​, ಶ್ರೀಲಂಕಾ ಹಾಗೂ ಪಾಕಿಸ್ತಾನ 14 ಪಂದ್ಯಗಳನ್ನಾಡಲಿದೆ. ಈ ಹಿಂದಿನ ಟೆಸ್ಟ್​ ಚಾಂಪಿಯನ್​ಶಿಪ್​​ಗೋಸ್ಕರ ನಡೆಯುವ ಟೆಸ್ಟ್ ಸರಣಿಗೋಸ್ಕರ ಐಸಿಸಿ 120 ಅಂಕ ನಿಗದಿಪಡಿಸಿತ್ತು.