ಕೋಲ್ಕತ್ತಾ: ಬಯೋಬಬಲ್ನಲ್ಲಿ ಕೊರೊನಾ ಕಾಣಿಸಿಕೊಂಡ ಬೆನ್ನಲ್ಲೇ ಬಿಸಿಸಿಐ ಮಿಲಿಯನ್ ಡಾಲರ್ ಟೂರ್ನಿಯನ್ನು ರದ್ದು ಮಾಡಿರುವ ನಿರ್ಧಾರವನ್ನು ಫ್ರಾಂಚೈಸಿಗಳು ಮತ್ತು ಮಧ್ಯಸ್ಥಿಕೆದಾರರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಆದರೆ, ಈ ನಿರ್ಧಾರದಿಂದ ಬಿಸಿಸಿಐ ಬರೋಬ್ಬರಿ 2 ಸಾವಿರ ಕೋಟಿಗಿಂತ ಹೆಚ್ಚು ಕಳೆದುಕೊಳ್ಳುವ ಭೀತಿ ಎದುರಾಗಿದೆ.
ಏಪ್ರಿಲ್ 9ರಿಂದ ಶುರುವಾಗಿರುವ ಟೂರ್ನಿ ಮೊದಲಾರ್ಧವನ್ನು ಮುಗಿಸಿದೆ. ಇನ್ನು ದ್ವಿತೀಯಾರ್ಧದ ಲೀಗ್ ಪಂದ್ಯಗಳು ಮತ್ತು ಪ್ಲೇ ಆಫ್ ಪಂದ್ಯಗಳು ಬಾಕಿಯುಳಿದಿವೆ. ಆದರೆ, ಸದ್ಯದ ಪರಿಸ್ಥಿತಿಯಲ್ಲಿ ಟೂರ್ನಿ ಪುನರಾರಂಭಗೊಳ್ಳುವ ಸಾಧ್ಯತೆ ವಿರಳವಾಗಿದೆ. ಕಾರಣ ಬಿಸಿಸಿಐ ಬ್ರಾಡ್ಕಾಸ್ಟ್ ಮತ್ತು ಸ್ಪಾನ್ಸರ್ಶಿಪ್ ಮೂಲಗಳಿಂದ ಸುಮಾರು 2000 ಕ್ಕೂ ಹೆಚ್ಚು ಕೋಟಿ ರೂ. ಕಳೆದುಕೊಳ್ಳಲಿದೆ.
"ಈ ಆವೃತ್ತಿ ಮಧ್ಯದಲ್ಲಿ ಸ್ಥಗಿತಗೊಂಡಿರುವುದರಿಂದ ಏನಿಲ್ಲ ಅಂದರು ನಾವು 2000 ರಿಂದ 2,500 ಕೋಟಿ ರೂ.ಗಳವರೆಗೆ ಕಳೆದುಕೊಳ್ಳಲಿದ್ದೇವೆ. ನನ್ನ ಅಂದಾಜಿನ ಪ್ರಕಾರ 2,200 ಕೋಟಿ ರೂ ಎಂದು ಅಂದಾಜಿಸಿದ್ದೇನೆ" ಎಂದು ಬಿಸಿಸಿಐ ಹಿರಿಯ ಅಧಿಕಾರಿಯೊಬ್ಬರು ಪಿಟಿಐಗೆ ತಿಳಿಸಿದ್ದಾರೆ.