ಭಾರತದ ಮಾಜಿ ಕ್ರಿಕೆಟಿಗ ಪಾರ್ಥೀವ್ ಪಟೇಲ್ ತಂದೆ ನಿಧನ

ಭಾರತ ರಾಷ್ಟ್ರೀಯ ತಂಡ ಹಾಗೂ ಐಪಿಎಲ್​ನಲ್ಲಿ ಕೆಲವು ಫ್ರಾಂಚೈಸಿಗಳ ಪರ ಆಡಿರುವ ಪಾರ್ಥೀವ್​ ಪಟೇಲ್‌ ತಮ್ಮ ತಂದೆಯ ನಿಧನದ ದುಃಖದ ಸುದ್ದಿಯನ್ನು ಸಾಮಾಜಿಕ ಜಾಲತಾಣದ ಮುಖೇನ ತಿಳಿಸಿದ್ದಾರೆ.

ಮುಂಬೈ: ಭಾರತ ಕ್ರಿಕೆಟ್‌ ತಂಡದ ಮಾಜಿ ವಿಕೆಟ್​ ಕೀಪರ್, ಬ್ಯಾಟ್ಸ್​ಮನ್​ ಪಾರ್ಥೀವ್ ಪಟೇಲ್ ಅವರ ತಂದೆ ಅಜಯ್​ಭಾಯ್ ಬಿಪಿನ್​ಚಂದ್ರ ಪಟೇಲ್ ಭಾನುವಾರ ನಿಧನರಾಗಿದ್ದಾರೆ. ಹಾಲಿ-ಮಾಜಿ ಕ್ರಿಕೆಟಿಗರು ಸಂತಾಪ ಸೂಚಿಸಿದ್ದಾರೆ.

"ನನ್ನ ತಂದೆ ಶ್ರೀ ಅಜಯಭಾಯ್​ ಬಿಪಿನ್​ಚಂದ್ರ ಪಟೇಲ್ ಅವರು ಇಂದು ನಿಧನರಾಗಿದ್ದಾರೆ ಎನ್ನುವುದನ್ನು ನಿಮ್ಮೊಂದಿಗೆ ಅತೀವ ದುಃಖ ಮತ್ತು ನೋವಿನೊಂದಿಗೆ ಹಂಚಿಕೊಳ್ಳುತ್ತಿದ್ದೇನೆ. ಅವರು ಸೆಪ್ಟೆಂಬರ್​ 26 ರಂದು ನಮ್ಮನ್ನೆಲ್ಲ ಅಗಲಿದ್ದಾರೆ. ನಿಮ್ಮ ಆಲೋಚನೆಗಳು ಮತ್ತು ಪ್ರಾರ್ಥನೆಗಳು ಅವರ ಮೇಲಿರಲಿ ಎಂದು ವಿನಂತಿಸಿಕೊಳ್ಳುತ್ತೇನೆ. ಆತ್ಮಕ್ಕೆ ಶಾಂತಿ ಸಿಗಲಿ" ಎಂದು ಪಾರ್ಥೀವ್‌ ಟ್ವೀಟ್​ ಮಾಡಿದ್ದಾರೆ.

ಪಾರ್ಥೀವ್​ ಪಟೇಲ್​ ಟ್ವೀಟ್​ಗೆ ಪ್ರತಿಕ್ರಿಯೆ ನೀಡುವ ಮೂಲಕ ಮಾಜಿ ಸ್ಪಿನ್ನರ್​ ಪ್ರಗ್ಯಾನ್ ಓಝಾ, ಆರ್​ಪಿ ಸಿಂಗ್​, ಸಚಿನ್​ ತೆಂಡೂಲ್ಕರ್​ ಸೇರಿದಂತೆ ಹಲವಾರು ಮಾಜಿ ಕ್ರಿಕೆಟಿಗರು ಸಂತಾಪ ಸೂಚಿಸಿದ್ದಾರೆ.

ಪಾರ್ಥೀವ್ ತಂದೆ 2019ರಿಂದಲೂ ಅನಾರೋಗ್ಯವದಿಂದ ಬಳಲುತ್ತಿದ್ದರು. ತಂದೆ ಮೆದುಳು ಸಂಬಂಧಿತ ಖಾಯಿಲೆಯಿಂದ ಬಳಲುತ್ತಿದ್ದಾರೆ ಎಂದು ಈ ಹಿಂದೆ ಪಾರ್ಥೀವ್ ಪಟೇಲ್ ಅವರೇ ಟ್ವೀಟ್ ಮೂಲಕ ತಿಳಿಸಿದ್ದರು.

ಇದನ್ನೂ ಓದಿ: ಆಸ್ಟ್ರೇಲಿಯಾದ 26 ಪಂದ್ಯಗಳ ಗೆಲುವಿನ ಓಟಕ್ಕೆ ಬ್ರೇಕ್ ಹಾಕಿದ ಭಾರತ ಮಹಿಳಾ ತಂಡ