ಲಂಡನ್: ಭಾರತ ಮತ್ತು ಇಂಗ್ಲೆಂಡ್ ನಡುವೆ ಎರಡನೇ ಟೆಸ್ಟ್ ಪಂದ್ಯದ ವೇಳೆ ಇಂಗ್ಲಿಷ್ ಫೀಲ್ಡರ್ಗಳಿಬ್ಬರು ಚೆಂಡನ್ನು ತಮ್ಮ ಸ್ಪೈಕ್ ಶೂಗಳಿಂದ ತುಳಿಯುತ್ತಿರುವ ವಿಡಿಯೋ ವೈರಲ್ ಆಗುತ್ತಿದೆ. ಬಾಲ್ ಟ್ಯಾಂಪರಿಂಗ್ ಮಾಡುವ ಅಥವಾ ಚೆಂಡು ಹಾಳಾಗಿದೆ ಏಂದು ಹೇಳಿ ಹೊಸ ಬಾಲು ಪಡೆಯುವ ಹುನ್ನಾರ ನಡೆಸಿದ್ದಾರೆಯೇ ಎಂಬ ಅನುಮಾನ ಮೂಡಿದೆ.
ವಿರೇಂದ್ರ ಸೆಹ್ವಾಗ್ ತಮ್ಮ ಟ್ವಿಟರ್ನಲ್ಲಿ ಇಂಗ್ಲೆಂಡ್ ಫೀಲ್ಡರ್ ಒಬ್ಬರು ಚೆಂಡನ್ನು ತುಳಿಯುವ ಫೋಟೋವನ್ನು ಶೇರ್ ಮಾಡಿ, ಇಲ್ಲಿ ಏನಾಗುತ್ತಿದೆ. ಕೋವಿಡ್ ತಡೆಗಟ್ಟುವ ಕ್ರಮಗಳ ಹೆಸರಿನಲ್ಲಿ ಇಂಗ್ಲೆಂಡ್ ಆಟಗಾರರಿಂದ ಬಾಲ್ ಟ್ಯಾಂಪರಿಂಗ್ ಮಾಡಲಾಗಿದೆಯೇ? ಎಂದು ಟ್ವೀಟ್ ಮಾಡಿದ್ದಾರೆ.
ಪಂದ್ಯದ ವೇಳೆ ಈ ವಿಡಿಯೋವನ್ನು ಟಿವಿಯಲ್ಲಿ ಪ್ರಸಾರ ಮಾಡಲಾಗಿದೆ. ಆದರೆ, ಚೆಂಡನ್ನು ತುಳಿಯುತ್ತಿರುವ ಆಟಗಾರರು ಯಾರು ಎಂಬುದು ಸ್ಪಷ್ಟವಾಗಿಲ್ಲ. ಯಾಕೆಂದರೆ, ವಿಡಿಯೋದಲ್ಲಿ ಆ ಫೀಲ್ಡರ್ಗಳ ಶೂಗಳು ಮಾತ್ರ ಕಾಣಿಸುತ್ತಿವೆ.