ಲಾರ್ಡ್ಸ್‌ನಲ್ಲಿ ಟಾಪ್ಲಿ 'ಚೆಂಡು'ಮಾರುತ: ಭಾರತದ ವಿರುದ್ಧ 100 ರನ್‌ಗಳಿಂದ ಗೆದ್ದ ಇಂಗ್ಲೆಂಡ್‌

ಎತ್ತರದ ನಿಲುವಿನ ರೀಸ್ ಟಾಪ್ಲಿ ಭಾರತದ ಲೆಕ್ಕಾಚಾರವನ್ನು ಬುಡಮೇಲು ಮಾಡಿದರು. ನಿನ್ನೆ ಕ್ರಿಕೆಟ್‌ ಕಾಶಿ ಲಾರ್ಡ್ಸ್‌ನಲ್ಲಿ ಅಕ್ಷರಶ: ಅವರ ಬೌಲಿಂಗ್‌ 'ಚೆಂಡು'ಮಾರುತವೇ ಅಪ್ಪಳಿಸಿದಂತಿತ್ತು. ತಾವು ಎಸೆದ 9.5 ಓವರ್‌ಗಳಲ್ಲಿ ಕೇವಲ 24 ರನ್‌ ಬಿಟ್ಟು ಕೊಟ್ಟು 6 ವಿಕೆಟ್‌ಗಳನ್ನು ಕಬಳಿಸಿದರು. ಈ ಮೂಲಕ ಮೊದಲ ಪಂದ್ಯದಲ್ಲಿ ಬುಮ್ರಾ ಸ್ಮರಣೀಯ ಬೌಲಿಂಗ್‌ ನೆನಪಿಸಿದರು.

ಲಾರ್ಡ್ಸ್ ​​(ಇಂಗ್ಲೆಂಡ್​):'ಕ್ರಿಕೆಟ್ ಕಾಶಿ' ಖ್ಯಾತಿಯ ಲಂಡನ್‌ನ ಲಾರ್ಡ್ಸ್​ ಮೈದಾನದಲ್ಲಿ ನಿನ್ನೆ ನಡೆದ 2ನೇ ಏಕದಿನ ಪಂದ್ಯದಲ್ಲಿ ಭಾರತದ ವಿರುದ್ಧ ಇಂಗ್ಲೆಂಡ್ 100 ರನ್‌ಗಳಿಂದ ಗೆದ್ದು ಬೀಗಿತು. ಇದಕ್ಕೂ ಮುನ್ನ, ಟಾಸ್​ ಸೋತು ಬ್ಯಾಟಿಂಗ್‌ಗೆ ಮುಂದಾದ ಇಂಗ್ಲೆಂಡ್ 49 ಓವರ್‌ಗಳಿಗೆ ಎಲ್ಲ ವಿಕೆಟ್ ಕಳೆದುಕೊಂಡು ಭಾರತಕ್ಕೆ 247 ರನ್​​ಗಳ ಟಾರ್ಗೆಟ್‌ ನೀಡಿತ್ತು. ಆಂಗ್ಲರು ಹೇಳಿಕೊಳ್ಳುವ ಬ್ಯಾಟಿಂಗ್ ಪ್ರದರ್ಶನ ನೀಡದೇ ಇದ್ದರೂ ಬೌಲಿಂಗ್‌ನಲ್ಲಿ ಭಾರತದ ವಿರುದ್ಧ ಸಂಪೂರ್ಣ ಹತೋಟಿ ಸಾಧಿಸಿದರು.

ಇಂಗ್ಲೆಂಡ್​ ಇನ್ನಿಂಗ್ಸ್​: ಮೊದಲು ಬ್ಯಾಟ್‌ ಮಾಡಿದ​ ಜೋಸ್‌ ಬಟ್ಲರ್‌ ತಂಡ ಭಾರತದ ಬೌಲರುಗಳ​ ದಾಳಿಯನ್ನು ಅರಿತುಕೊಂಡಿತು. ಆರಂಭಿಕರಾಗಿ ಕಣಕ್ಕಿಳಿದ ಜೇಸನ್ ರಾಯ್ ಮತ್ತು ಬೈರ್​ಸ್ಟೋ 41ರನ್​ಗಳ ಜೊತೆಯಾಟವಾಡಿದರು. 23 ರನ್​ಗಳಿಸಿದ್ದ ರಾಯ್,​​ ಹಾರ್ದಿಕ್​ ಓವರ್​​ನಲ್ಲಿ ವಿಕೆಟ್ ಒಪ್ಪಿಸಿದರು. 38 ರನ್​​ಗಳಿಕೆ ಮಾಡಿದ್ದ ಬೈರ್​​ಸ್ಟೋ ಕೂಡ ಚಹಲ್​ ಓವರ್​​ನಲ್ಲಿ ಔಟಾದರು. ಮಧ್ಯಮ ಕ್ರಮಾಂಕದಲ್ಲಿ ಬ್ಯಾಟ್​ ಬೀಸಿದ ಜೋ ರೂಟ್ ​(11), ಸ್ಟೋಕ್ಸ್ ​(21) ಹಾಗೂ ಬಟ್ಲರ್ ​(4) ಮತ್ತೊಮ್ಮೆ ಬ್ಯಾಟಿಂಗ್ ವೈಫಲ್ಯ ಅನುಭವಿಸಿದರು. ಹೀಗಾಗಿ ತಂಡ 102 ರನ್​​ಗಳಿಸುವಷ್ಟರಲ್ಲಿ ಪ್ರಮುಖ 5 ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತು.

ಇಂಗ್ಲೆಂಡ್ ಮಧ್ಯಮ ಕ್ರಮಾಂಕದಲ್ಲಿ ವಿಕೆಟ್ ಒಪ್ಪಿಸುತ್ತಾ ಇಕ್ಕಟ್ಟಿಗೆ ಸಿಲುಕಿದಾಗ ಲಿವಿಂಗ್​​ಸ್ಟೋನ್ ​(33), ಮೋಯಿನ್ ಅಲಿ (47) ಹಾಗೂ ವಿಲ್ಲೆ (41) ಆಸರೆಯಾದರು. ಹೀಗಾಗಿ ತಂಡ ಸ್ಪರ್ಧಾತ್ಮಕ ರನ್​ಗಳಿಕೆ ಮಾಡಿತು. ಕೊನೆಯದಾಗಿ 49 ಓವರ್​​​ಗಳಲ್ಲಿ ಸರ್ವ ಪತನದ ಕಂಡು​ 246 ರನ್​​ಗಳಿಕೆ ಮಾಡಿತು. ಭಾರತದ ಪರ ಬೌಲಿಂಗ್​​ನಲ್ಲಿ ಮಿಂಚಿದ ಚಾಹಲ್​ 4 ವಿಕೆಟ್ ಪಡೆದರೆ, ಬುಮ್ರಾ, ಹಾರ್ದಿಕ್ ಪಾಂಡ್ಯ ತಲಾ 2 ವಿಕೆಟ್​ ಹಾಗೂ ಶಮಿ, ಪ್ರಸಿದ್ಧ್ ಕೃಷ್ಣ 1 ವಿಕೆಟ್ ಕಿತ್ತರು.

ಇದನ್ನೂ ಓದಿ:ಡೋಪಿಂಗ್​ನಲ್ಲಿ ಫೇಲ್​: ಬಾಂಗ್ಲಾದೇಶ ಬೌಲರ್​ಗೆ 10 ತಿಂಗಳು ಅಮಾನತು ಶಿಕ್ಷೆ

ಭಾರತದ ಇನ್ನಿಂಗ್ಸ್​: ಇಂಗ್ಲೆಂಡ್​ ನೀಡಿದ ಸಾಧಾರಣ ಮೊತ್ತ ಬೆನ್ನತ್ತಿದ್ದ ಭಾರತವೂ ಆರಂಭದಿಂದಲೇ ತೊಂದರೆಗೆ ಸಿಲುಕಿತು. ಇಂಗ್ಲೆಂಡ್​ ಬೌಲರ್ಸ್​ ದಾಳಿಗೆ ಭಾರತ ತತ್ತರಿಸಿತು. ಐವರು ಬ್ಯಾಟರ್‌ಗಳು ಎರಡಂಕಿ ರನ್‌ ದಾಟಿದ್ರೆ, ಮೂವರು ಬ್ಯಾಟರ್‌ಗಳು ಖಾತೆಯನ್ನೇ ತೆರೆಯದೇ ಪೆವಿಲಿಯನ್​ ಸೇರಿಕೊಂಡರು. 38.5 ಓವರ್​ಗಳಿಗೆ ತನ್ನೆಲ್ಲ ವಿಕೆಟ್​ಗಳನ್ನು ಕಳೆದುಕೊಂಡು 146 ರನ್​ಗಳಿಸಲು ಮಾತ್ರ ಸಾಧ್ಯವಾಯಿತು. ಈ ಮೂಲಕ ಭಾರತ ತಂಡ ಭಾರತ 100 ರನ್​ಗಳ ಹೀನಾಯ ಸೋಲು ಕಂಡಿತು. ಭರ್ಜರಿ ಗೆಲುವಿನಿಂದ ಆಂಗ್ಲರು ಸರಣಿಯಲ್ಲಿ 1-1 ಸಮಬಲ ಸಾಧಿಸಿದರು.

ಭಾರತ ಪರ ನಾಯಕ ರೋಹಿತ್ ಶರ್ಮಾ 0, ಶಿಖರ್​ ಧವನ್​ 9​, ವಿರಾಟ್​ ಕೊಹ್ಲಿ 16, ರಿಷಭ್​ ಪಂತ್​ 0, ಸೂರ್ಯಕುಮಾರ್​ ಯಾದವ್​ 27​, ಹಾರ್ದಿಕ್​ ಪಾಂಡ್ಯಾ 29​, ರವೀಂದ್ರ ಜಡೇಜಾ 29​, ಮೊಹಮ್ಮದ್​ ಶೆಮಿ 23, ಚಹಾಲ್​ 3​, ಪ್ರಸಿದ್ಧ್​ ಕೃಷ್ಣ 0 ಮತ್ತು ಜಸ್ಪ್ರಿತ್​ ಬುಮ್ರಾ 2 ರನ್​ಗಳಿಸಿ ಅಜೇಯರಾಗುಳಿದರು. ಇಂಗ್ಲೆಂಡ್ ಪರ ರೀಸ್ ಟಾಪ್ಲಿ 6 ವಿಕೆಟ್​ಗಳನ್ನು ಪಡೆದು ಮಿಂಚಿದ್ರೆ, ಡೇವಿಡ್ ವಿಲ್ಲಿ, ಬ್ರೈಡನ್ ಕಾರ್ಸೆ, ಮೋಯಿನ್ ಅಲಿ ಮತ್ತು ಲಿಯಾಮ್ ಲಿವಿಂಗ್ಸ್ಟೋನ್ ತಲಾ ಒಂದೊಂದು ವಿಕೆಟ್ ಪಡೆದು ತಂಡದ ಗೆಲುವಿಗೆ ಕಾರಣರಾದರು.

ಮುಂದಿನ ಪಂದ್ಯ ಭಾನುವಾರ ಮ್ಯಾಂಚೆಸ್ಟರ್​ನಲ್ಲಿ ನಡೆಯಲಿದ್ದು, ಸರಣಿ ನಿರ್ಣಯಿಸಲಿದೆ.