ಮಹಿಳಾ ಟೆಸ್ಟ್​ ಕ್ರಿಕೆಟ್​: ಭಾರತ 231ಕ್ಕೆ ಆಲೌಟ್​, ಫಾಲೋಆನ್ ಹೇರಿದ ಇಂಗ್ಲೆಂಡ್​

ಇಂಗ್ಲೆಂಡ್ ಮಹಿಳಾ ತಂಡದ ವಿರುದ್ಧ ನಡೆಯುತ್ತಿರುವ ಏಕೈಕ ಟೆಸ್ಟ್​ ಪಂದ್ಯದಲ್ಲಿ ಭಾರತ ತಂಡ ಬ್ಯಾಟಿಂಗ್ ವೈಫಲ್ಯದೊಂದಿಗೆ ಫಾಲೋ ಆನ್​ಗೆ ಒಳಗಾಗಿದೆ.

ಬ್ರಿಸ್ಟೋಲ್​(ಇಂಗ್ಲೆಂಡ್​):ಭಾರತ-ಇಂಗ್ಲೆಂಡ್​ ಮಹಿಳಾ ತಂಡಗಳ ಮಧ್ಯೆ ಏಕೈಕ ಟೆಸ್ಟ್​ ಪಂದ್ಯ ನಡೆಯುತ್ತಿದ್ದು, ಮೊದಲ ಇನ್ನಿಂಗ್ಸ್​ನಲ್ಲಿ ಇಂಗ್ಲೆಂಡ್ ತಂಡ ಗಳಿಕೆ ಮಾಡಿರುವ 396 ರನ್​ಗಳಿಗೆ ಪ್ರತ್ಯುತ್ತರವಾಗಿ ಭಾರತ 231ರನ್​ ಮಾತ್ರ ಗಳಿಸಿದೆ. ಹೀಗಾಗಿ ಫಾಲೋಆನ್​ಗೊಳಗಾಗಿರುವ ಟೀಂ ಇಂಡಿಯಾ ಎರಡನೇ ಇನ್ನಿಂಗ್ಸ್​ನಲ್ಲಿ ಬ್ಯಾಟಿಂಗ್​ ಆರಂಭಿಸಿದ್ದು, ಸ್ಮೃತಿ ಮಂಧಾನ ವಿಕೆಟ್​ ಕಳೆದುಕೊಳ್ಳುವ ಮೂಲಕ ಆರಂಭಿಕ ಆಘಾತಕ್ಕೊಳಗಾಗಿದೆ.

ಇಂಗ್ಲೆಂಡ್​ನ ಬ್ರಿಸ್ಟೋಲ್​ ಮೈದಾನದಲ್ಲಿ ಟೆಸ್ಟ್​ ಪಂದ್ಯ ನಡೆಯುತ್ತಿದ್ದು, ಟಾಸ್​ ಗೆದ್ದು ಮೊದಲು ಬ್ಯಾಟಿಂಗ್​ ನಡೆಸಿದ ಇಂಗ್ಲೆಂಡ್ ಮಹಿಳಾ ತಂಡ 9ವಿಕೆಟ್​ನಷ್ಟಕ್ಕೆ 396ರನ್​ಗಳಿಕೆ ಮಾಡಿ ಡಿಕ್ಲೇರ್​ ಮಾಡಿಕೊಂಡಿತ್ತು. ಇದಕ್ಕೆ ಪ್ರತ್ಯುತ್ತರವಾಗಿ ಬ್ಯಾಟಿಂಗ್​ ನಡೆಸಿದ ಮಿಥಾಲಿ ರಾಜ್ ನೇತೃತ್ವದ ಟೀ ಇಂಡಿಯಾ ಉತ್ತಮ ಆರಂಭ ಪಡೆದುಕೊಂಡಿತ್ತು. ಆರಂಭಿಕರಾಗಿ ಕಣಕ್ಕಿಳಿದಿದ್ದ ಸ್ಮೃತಿ ಮಂಧಾನ(78) ಹಾಗೂ ಶೆಫಾಲಿ ವರ್ಮಾ(96)ರನ್​ಗಳಿಕೆ ಮಾಡಿದರು. ಆದರೆ, ಇವರ ವಿಕೆಟ್​ ಪತನಗೊಳ್ಳುತ್ತಿದ್ದಂತೆ ಬೇರೆ ಯಾವುದೇ ಪ್ಲೇಯರ್ಸ್​ ಹೇಳಿಕೊಳ್ಳುವಂತಹ ಪ್ರದರ್ಶನ ನೀಡಲಿಲ್ಲ.

ಪೂನಂ ರಾವತ್​(2), ಶಿಕಾ ಪಾಂಡೆ(0), ಮಿಥಾಲಿ(2), ಹರ್ಮನ್​ಪ್ರೀತ್​ ಕೌರ್​​(4),ದೀಪ್ತಿ ಶರ್ಮಾ ಅಜೇಯ(29), ಬಾಟಿಯಾ(0),ಸ್ನೇಹಾ ರಾಣಾ(2), ವಸ್ತ್ರಕರ್​(12) ಹಾಗೂ ಗೋಸ್ವಾಮಿ 1 ರನ್​ಗಳಿಕೆ ಮಾಡಿದರು. ಇಂಗ್ಲೆಂಡ್ ಪರ ಉತ್ತಮ ಬೌಲಿಂಗ್​ ಪ್ರದರ್ಶನ ನೀಡಿದ ಎಕ್ಲೆಸ್ಟೋನ್ 4 ವಿಕೆಟ್​, ನೈಟ್​ 2ವಿಕೆಟ್​ ಪಡೆದುಕೊಂಡರೆ ಬ್ರಟ್​,ಕ್ರಾಸ್​, ಸ್ರೂಬ್ಸೊಲೆ ತಲಾ 1ವಿಕೆಟ್ ಪಡೆದುಕೊಂಡರು.

165ರನ್​ಗಳ ಫಾಲೋ ಆನ್​ನೊಂದಿಗೆ ಭಾರತ ಮಹಿಳಾ ತಂಡ ಇದೀಗ ಎರಡನೇ ಇನ್ನಿಂಗ್ಸ್​ ಆರಂಭಿಸಿದ್ದು, ಆರಂಭದಲ್ಲೇ ಸ್ಮೃತಿ ಮಂದಾನಾ (8)ವಿಕೆಟ್​ ಕಳೆದುಕೊಂಡು ಆಘಾತಕ್ಕೊಳಗಾಗಿದೆ. ಸದ್ಯ ತಂಡ 136ರನ್​ಗಳ ಹಿನ್ನಡೆಯಲ್ಲಿದ್ದು, ಮೈದಾನದಲ್ಲಿ ಶೆಫಾಲಿ ವರ್ಮಾ(20ರನ್​) ಇದ್ದಾರೆ. ಎರಡು ದಿನಗಳ ಆಟ ಬಾಕಿ ಇದ್ದು, ಪಂದ್ಯ ಡ್ರಾ ಮಾಡಿಕೊಳ್ಳಬೇಕಾದರೆ ಭಾರತ ಉತ್ತಮ ಬ್ಯಾಟಿಂಗ್​ ಪ್ರದರ್ಶನ ನೀಡಬೇಕಾದ ಅನಿವಾರ್ಯತೆಯಲ್ಲಿದೆ.