ಫಿಶ್ ಟ್ಯಾಂಕ್ ಗಾಜು ಬಿದ್ದು ಆರ್ಚರ್ ಬಲಗೈಗೆ ಗಾಯ: ಆಶ್ಲೇ ಗೈಲ್ಸ್ ಸ್ಪಷ್ಟನೆ

ಆರ್ಚರ್ ಅವರಿಗೆ ಜನವರಿಯಲ್ಲೇ ಗಾಯವಾಗಿದ್ದರೂ ಭಾರತ ವಿರುದ್ಧದ ಟೆಸ್ಟ್ ಮತ್ತು ಟಿ-20 ಸರಣಿಯಲ್ಲಿ ಆಡಿದ್ದರು. ‘ಕೈಯಲ್ಲಿ ಹಿಡಿದಿದ್ದ ಫಿಶ್ ಟ್ಯಾಂಕ್ ಅಚಾನಕ್ ಆಗಿ ಕೆಳಗೆ ಬಿದ್ದಿದೆ. ಫಿಶ್ ಟ್ಯಾಂಕಿನ ಗಾಜಿನಿಂದ ಅವರ ಕೈಗೆ ಗಾಯವಾಗಿದೆ’ ಎಂದು ಗೈಲ್ಸ್ ತಿಳಿಸಿದ್ದಾರೆ.

ಲಂಡನ್:ಇಂಗ್ಲೆಂಡ್ ತಂಡದ ವೇಗದ ಬೌಲರ್ ಜೋಫ್ರಾ ಆರ್ಚರ್ ತಮ್ಮ ಬೆರಳಿಗೆ ಗಾಯವಾದ ಕಾರಣ ಭಾರತ ವಿರುದ್ಧದ ಏಕದಿನ ಸರಣಿಯಿಂದ ಹೊರಗುಳಿದಿದ್ದರು. ಈಗ ಸದ್ಯ ಆರ್ಚರ್ ಬೆರಳಿನ​ ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದಾರೆ.

ಈ ಬಗ್ಗೆ ಪ್ರತಿಕ್ರಿಯಿಸಿರುವ ಇಂಗ್ಲೆಂಡ್ ಕ್ರಿಕೆಟ್ ಮಂಡಳಿ ನಿರ್ದೇಶಕ ಆಶ್ಲೇ ಗೈಲ್ಸ್ "ಆರ್ಚರ್​ ಫಿಶ್ ಟ್ಯಾಂಕ್ ಸ್ವಚ್ಛಗೊಳಿಸುವಾಗ ಸಂಭವಿಸಿದ ಅವಘಡದಲ್ಲಿ ಗಾಯಗೊಂಡಿದ್ದು, ತನ್ನ ಬಲಗೈ ಬೆರಳಿನ ಸ್ನಾಯುವಿಗೆ ಚುಚ್ಚಿಕೊಂಡಿದ್ದ ಗಾಜಿನ ತುಂಡನ್ನು ಹೊರತೆಗೆಯಲು ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದಾರೆ" ಎಂದು ಹೇಳಿದ್ದಾರೆ.

ಆರ್ಚರ್ ಅವರಿಗೆ ಜನವರಿಯಲ್ಲೇ ಗಾಯವಾಗಿದ್ದರೂ ಭಾರತ ವಿರುದ್ಧದ ಟೆಸ್ಟ್ ಮತ್ತು ಟಿ-20 ಸರಣಿಯಲ್ಲಿ ಆಡಿದ್ದರು. ‘ಕೈಯಲ್ಲಿ ಹಿಡಿದಿದ್ದ ಫಿಶ್ ಟ್ಯಾಂಕ್ ಅಚಾನಕ್ ಆಗಿ ಕೆಳಗೆ ಬಿದ್ದಿದೆ. ಫಿಶ್ ಟ್ಯಾಂಕಿನ ಗಾಜಿನಿಂದ ಅವರ ಕೈಗೆ ಗಾಯವಾಗಿದೆ’ ಎಂದು ಗೈಲ್ಸ್ ತಿಳಿಸಿದ್ದಾರೆ.

‘ಟ್ವಿಟರ್‌ನಲ್ಲಿ ಈ ಕುರಿತು ಯಾವ ಅಭಿಪ್ರಾಯ ಬರಲಿದೆ ಎಂದು ನನಗೆ ತಿಳಿದಿದೆ. ಇದು ಪಿತೂರಿಯಂತೆ ಭಾಸವಾಗುತ್ತಿದೆ. ಆದರೆ, ಇದು ನಿಜ ಪಿತೂರಿ ಅಲ್ಲ, ಅವರು ಮನೆಯಲ್ಲಿ ಫಿಶ್ ಟ್ಯಾಂಕ್ ಸ್ವಚ್ಛಗೊಳಿಸುವಾಗ ಈ ಅವಘಡ ಸಂಭವಿಸಿದೆ’ ಎಂದು ಹೇಳಿದ್ದಾರೆ.

‘ಆರ್ಚರ್ ಇಂದು ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದು, ಅಪಾಯದಿಂದ ಹೊರ ಬಂದಿದ್ದಾರೆ. ಬೆರಳಿನ ಸ್ನಾಯುವಿನಲ್ಲಿ ಸೇರಿಕೊಂಡಿದ್ದ ಸಣ್ಣ ಗಾಜಿನ ತುಂಡನ್ನು ಶಸ್ತ್ರಚಿಕಿತ್ಸೆ ಮಾಡಿ ಹೊರ ತೆಗೆದಿದ್ದಾರೆ’ ಎಂದಿದ್ದಾರೆ.

ಈ ಬಾರಿಯ ಐಪಿಎಲ್​​ನಲ್ಲಿ ರಾಜಸ್ಥಾನ್ ರಾಯಲ್ಸ್ ಪರ ಆಡಬೇಕಿದ್ದ ಆರ್ಚರ್, ಈ ಗಾಯದಿಂದಾಗಿ ಸರಣಿಯನ್ನು ಮಿಸ್ ಮಾಡಿಕೊಳ್ಳಲಿದ್ದಾರೆ.