ಪಾಕಿಸ್ತಾನ ಬಗ್ಗು ಬಡಿದು ಸರಣಿ ಸಮಬಲ ಸಾಧಿಸಿದ ಇಂಗ್ಲೆಂಡ್

ಎರಡು ತಂಡಗಳ ನಡುವಿನ 3ನೇ ಹಾಗೂ ನಿರ್ಣಾಯಕ ಟಿ20 ಪಂದ್ಯ ಮ್ಯಾಂಚೆಸ್ಟರ್​ನಲ್ಲಿ ಜುಲೈ 20 ರಂದು ನಡೆಯಲಿದೆ. ಈಗಾಗಲೇ ಇಂಗ್ಲೆಂಡ್ ತಂಡ 3-0ಯಲ್ಲಿ ಏಕದಿ ಸರಣಿ ಗೆದ್ದುಕೊಂಡಿದೆ.

ಲೀಡ್ಸ್: ಬ್ಯಾಟಿಂಗ್ ಮತ್ತು ಬೌಲಿಂಗ್​ ಎರಡರಲ್ಲೂ ಪ್ರಾಬಲ್ಯ ಸಾಧಿಸಿದ ಇಂಗ್ಲೆಂಡ್ ಪ್ರವಾಸಿ ಪಾಕಿಸ್ತಾನ ತಂಡವನ್ನು 45 ರನ್​ಗಳಿಂದ ಮಣಿಸಿ 3 ಪಂದ್ಯಗಳ ಸರಣಿಯನ್ನು 1-1ರಲ್ಲಿ ಸಮಬಲ ಸಾಧಿಸಿದೆ.

ಟಾಸ್ ಸೋತು ಬ್ಯಾಟಿಂಗ್ ಮಾಡಿದ ಇಂಗ್ಲೆಂಡ್ ತಂಡ ಆರಂಭದಲ್ಲೇ ಜೇಸನ್ ರಾಯ್(11) ಮತ್ತು ಟಿ20 ಕ್ರಿಕೆಟ್​ನ ನಂಬರ್ 1 ಬ್ಯಾಟ್ಸ್​ಮನ್ ಡೇವಿಡ್ ಮಲನ್(1) ವಿಕೆಟ್ ಕಳೆದುಕೊಂಡು ಆಘಾತ ಅನುಭವಿಸಿತು.

ಆದರೆ ಹಂಗಾಮಿ ನಾಯಕ ಜೋಸ್ ಬಟ್ಲರ್ ಕೇವಲ 39 ಎಸೆತಗಳಲ್ಲಿ 7 ಬೌಂಡರಿ ಮತ್ತು 2 ಸಿಕ್ಸರ್​ಗಳ ನೆರವಿನಿಂದ 59 ರನ್​ಗಳಿಸಿ ತಂಡವನ್ನು ಆಘಾತದಿಂದ ಮೇಲೆತ್ತಿದ್ದರು. ಇವರಿಗೆ ಸಾರ್ಥ ನೀಡಿದ ಮೊಯೀನ್ ಅಲಿ 16 ಎಸೆತಗಳಲ್ಲಿ 6 ಬೌಂಡರಿ ಮತ್ತು 1 ಸಿಕ್ಸರ್ ಸಹಿತ 36 ರನ್​ಗಳಿಸಿದರೆ, ಲಿವಿಂಗ್​ಸ್ಟೋನ್ 23 ಎಸೆತಗಳಲ್ಲಿ 38 ರನ್​ಗಳಿಸಿ ತಂಡದ ಮೊತ್ತ 200 ತಲುಪುವಂತೆ ಮಾಡಿದರು.

ಪಾಕಿಸ್ತಾನ ಪರ ಮೊಹಮದ್ ಹಸ್ನೈನ್ 51ಕ್ಕೆ3, ಹ್ಯಾರಿಸ್ ರವೂಫ್ 48ಕ್ಕೆ 2, ಶಹೀನ್ ಅಫ್ರಿದಿ 28ಕ್ಕೆ1 ಮತ್ತು ಇಮಾದ್ ವಸೀಮ್ 37ಕ್ಕೆ 2 ವಿಕೆಟ್ ಪಡೆದರು.

201 ರನ್​ಗಳ ಗುರಿ ಬೆನ್ನತ್ತಿದ ಪಾಕಿಸ್ತಾನ ತಂಡ 20 ಓವರ್​ಗಳಲ್ಲಿ 9 ವಿಕೆಟ್ ಕಳೆದುಕೊಂಡು 155ರನ್​ ಗಳಿಸಲಷ್ಟೇ ಶಕ್ತವಾಗಿ 45 ರನ್​ಗಳ ಸೋಲು ಕಂಡಿತು.

ವಿಕೆಟ್ ಕೀಪರ್ ರಿಜ್ವಾನ್ 37 , ಶದಾಬ್ ಖಾನ್ 22 38 ಮತ್ತು ಬಾಬರ್ ಅಜಮ್ 22 ರನ್​ಗಳಿಸಿ ತಂಡದ ಗರಿಷ್ಠ ಸ್ಕೋರರ್ ಎನಿಸಿಕೊಂಡರು.

ಅತಿಥೇಯ ಇಂಗ್ಲೆಂಡ್ ಪರ ಸಕಿದ್ ಮೊಹ್ಮೂದ್ 33ಕ್ಕೆ 3 ವಿಕೆಟ್​ ಪಡೆದು ಗೆಲುವಿನ ರೂವಾರಿಯಾದರು. ಇವರಿಗೆ ಸಾಥ್ ನೀಡಿದ ಮೊಯೀನ್ ಅಲಿ 32ಕ್ಕೆ 2, ಆದಿಲ್ ರಶೀದ್ 30ಕ್ಕೆ 2, ಪರ್ಕಿಸನ್ ಮತ್ತು ಜೋರ್ಡನ್ ತಲಾ ಒಂದು ವಿಕೆಟ್​ ಪಡೆದು ಮಿಂಚಿದರು.

ಎರಡು ತಂಡಗಳ ನಡುವಿನ 3ನೇ ಹಾಗೂ ನಿರ್ಣಾಯಕ ಟಿ20 ಪಂದ್ಯ ಮ್ಯಾಂಚೆಸ್ಟರ್​ನಲ್ಲಿ ಜುಲೈ 20 ರಂದು ನಡೆಯಲಿದೆ. ಈಗಾಗಲೇ ಇಂಗ್ಲೆಂಡ್ ತಂಡ 3-0ಯಲ್ಲಿ ಏಕದಿ ಸರಣಿ ಗೆದ್ದುಕೊಂಡಿದೆ.

ಇದನ್ನು ಓದಿ:ಧವನ್, ಕಿಶನ್ ಅರ್ಧಶತಕ: ಶ್ರೀಲಂಕಾ ವಿರುದ್ಧ ಭಾರತಕ್ಕೆ 7 ವಿಕೆಟ್​ಗಳ ಭರ್ಜರಿ ಜಯ