ಡಿಆರ್​ಎಸ್​ ಸೇರಿದಂತೆ ಈ ಬಾರಿ ಐಪಿಎಲ್​ನಲ್ಲಿ ಮಹತ್ತರ ಬದಲಾವಣೆ ಸಾಧ್ಯತೆ

ಬಿಸಿಸಿಐ 15ನೇ ಆವೃತ್ತಿಯಲ್ಲಿ ಪ್ರತಿ ಇನ್ನಿಂಗ್ಸ್​ನಲ್ಲಿ ಒಂದರ ಬದಲು ಎರಡು ರಿವ್ಯೂವ್​ ತೆಗೆದುಕೊಳ್ಳುವ ಅವಕಾಶವನ್ನು ನೀಡಿದೆ. ಅಂದರೆ ಪ್ರತಿ ಇನ್ನಿಂಗ್ಸ್​ನಲ್ಲಿ ಬೌಲಿಂಗ್ ಮತ್ತು ಬ್ಯಾಟಿಂಗ್ ತಂಡಗಳು ಅಂಪೈರ್​ ತೀರ್ಪಿನ ವಿರುದ್ಧ ತಲಾ 2 ಬಾರಿ ರಿವ್ಯೂವ್ ತೆಗೆದುಕೊಳ್ಳಬಹುದು.

ಮುಂಬೈ: ಇಂಡಿಯನ್ ಪ್ರೀಮಿಯರ್ ಲೀಗ್​ನ 2022ರ ಆವೃತ್ತಿಗೂ ಮುನ್ನ ಬಿಸಿಸಿಐ ಡಿಆರ್​ಎಸ್​ ಸೇರಿದಂತೆ ಕೆಲವು ಮಹತ್ತರ ನಿರ್ಧಾರಗಳನ್ನು ಕೈಗೊಳ್ಳಲಿದೆ ಎಂದು ಮೂಲಗಳಿಂದ ತಿಳಿದುಬಂದಿದೆ.

ಮಾರ್ಚ್​ 26 ರಂದು ಇಂಡಿಯನ್​ ಪ್ರೀಮಿಯರ್ ಲೀಗ್​ ಆರಂಭವಾಗಲಿದೆ. ಮೊದಲ ಪಂದ್ಯದಲ್ಲಿ ಹಾಲಿ ಚಾಂಪಿಯನ್ ಸಿಎಸ್​ಕೆ ಮತ್ತು ರನ್ನರ್ ಅಪ್ ಕೆಕೆಆರ್ ಕಣಕ್ಕಿಳಿಯಲಿವೆ. ಈ ಬಾರಿ ಶ್ರೀಮಂತ ಲೀಗ್​ನಲ್ಲಿ ಅಂಪೈರ್ ತೀರ್ಪು ಪರಾಮರ್ಶೆ ಪದ್ದತಿ(ಡಿಆರ್​ಎಸ್) ರಿವ್ಯೂವ್​ಗಳ ಸಂಖ್ಯೆಯನ್ನು ಹೆಚ್ಚಿಗೆ ಮಾಡುವ ಸಾಧ್ಯತೆಯಿದೆ.

ಕ್ರಿಕ್​ಬಜ್ ವರದಿಯ ಪ್ರಕಾರ, ಬಿಸಿಸಿಐ 15ನೇ ಆವೃತ್ತಿಯಲ್ಲಿ ಪ್ರತಿ ಇನ್ನಿಂಗ್ಸ್​ನಲ್ಲಿ ಒಂದರ ಬದಲು ಎರಡು ರಿವ್ಯೂವ್​ ತೆಗೆದುಕೊಳ್ಳುವ ಅವಕಾಶವನ್ನು ನೀಡಿದೆ. ಅಂದರೆ ಪ್ರತಿ ಇನ್ನಿಂಗ್ಸ್​ನಲ್ಲಿ ಬೌಲಿಂಗ್ ಮತ್ತು ಬ್ಯಾಟಿಂಗ್ ತಂಡಗಳು ಅಂಪೈರ್​ ತೀರ್ಪಿನ ವಿರುದ್ಧ ತಲಾ 2 ಬಾರಿ ರಿವ್ಯೂವ್ ತೆಗೆದುಕೊಳ್ಳಬಹುದು. ಈ ಹಿಂದಿನ ಆವೃತ್ತಿಗಳು ಪ್ರತಿ ಇನ್ನಿಂಗ್ಸ್​ನಲ್ಲಿ ಎರಡೂ ತಂಡಗಳು ಒಮ್ಮೆ ಮಾತ್ರ ರಿವ್ಯೂವ್ ತೆಗೆದುಕೊಳ್ಳಬಹುದಿತ್ತು.

ಪಂದ್ಯವನ್ನು ಮುಂದೂಡುವ ಅವಕಾಶ

ಇನ್ನು ಕೋವಿಡ್​ 19 ಭೀತಿ ಇರುವುದರಿಂದ ಯಾವುದೇ ತಂಡದಲ್ಲಿ ಕೋವಿಡ್​ 19 ಪಾಸಿಟಿವ್​ ಪ್ರಕರಣಗಳು ಕಂಡು ಬಂದು ಮೈದಾನಕ್ಕಿಳಿಯಲು 12 ಸದಸ್ಯರ ತಂಡ(ಸಬ್​ಸ್ಟಿಟ್ಯೂಟ್ ಸೇರಿ) ಸಿದ್ಧರಿಲ್ಲದಿದ್ದರೆ. ಆ ದಿನದ ಪಂದ್ಯವನ್ನು ಮುಂದೂಡಿ ಬೇರೆ ದಿನ ಆಡಿಸುವ ಅವಕಾಶವನ್ನು ನೀಡಲಾಗಿದೆ. ಮರುವೇಳಾಪಟ್ಟಿಯ ಕೆಲಸವನ್ನು ಐಪಿಎಲ್ ಟೆಕ್ನಿಕಲ್ ಸಮಿತಿ ನಿರ್ಧರಿಸಲಿದೆ.

ಇನ್ನು ಇತ್ತೀಚೆಗೆ ಎಂಸಿಸಿ ಜಾರಿಗೆ ತಂದಿರುವ ಬ್ಯಾಟರ್ ಕ್ಯಾಚ್ ನೀಡಿ ಔಟಾದರೂ ಹೊಸ ಬ್ಯಾಟರ್​ ಸ್ಟ್ರೈಕ್​ನಲ್ಲೇ ಬ್ಯಾಟಿಂಗ್ ಮಾಡಬೇಕು ನಿಯಮವನ್ನು ಐಪಿಎಲ್​ನಲ್ಲೂ ಜಾರಿಗೆ ತರಲು ನಿರ್ಧರಿಸಲಾಗಿದೆ. ಈ ನಿಯಮದ ಪ್ರಕಾರ ಕ್ಯಾಚ್​ ವೇಳೆ ನಾನ್​ ಸ್ಟ್ರೈಕ್​ನಲ್ಲಿ ಬ್ಯಾಟರ್​ ಕ್ರೀಸ್​ ಕ್ರಾಸ್​ ಮಾಡಿದ್ದರೂ ಸಹಾ ಹೊಸದಾಗಿ ಬರುವ ಬ್ಯಾಟರ್​ ಸ್ಟ್ರೈಕ್​ ತೆಗೆದುಕೊಳ್ಳಬೇಕಾಗಿರುತ್ತದೆ.

ಇದನ್ನೂ ಓದಿ:ಅಯ್ಯರ್ ಉತ್ತಮವಾಗಿ ಆಡಿದ್ದಾರೆ, ಆದ್ರೆ ರಹಾನೆ-ಪೂಜಾರ ಸ್ಥಾನ ತುಂಬಲು ಇನ್ನೂ ಶ್ರಮಿಸಬೇಕು: ರೋಹಿತ್