ಟಿ20ಯಲ್ಲಿ 1,000 ಬೌಂಡರಿ ಬಾರಿಸಿದ 'ಗಬ್ಬರ್ ಸಿಂಗ್'! ಈ ಸಾಧನೆಗೈದ ಮೊದಲ ಭಾರತೀಯ

ಟಿ20 ಕ್ರಿಕೆಟ್ ಇತಿಹಾಸದಲ್ಲೇ ಸಾವಿರ ಬೌಂಡರಿ ಬಾರಿಸಿರುವ ಮೊದಲ ಬ್ಯಾಟರ್ ಎಂಬ ಹೆಗ್ಗಳಿಕೆಗೆ ಟೀಂ ಇಂಡಿಯಾ ಆರಂಭಿಕ ಆಟಗಾರ ಶಿಖರ್ ಧವನ್ ಪಾತ್ರರಾದರು.

ಮುಂಬೈ:ಇಂಡಿಯನ್​ ಪ್ರೀಮಿಯರ್ ಲೀಗ್​ನಲ್ಲಿ ಪಂಜಾಬ್ ಕಿಂಗ್ಸ್ ತಂಡದ ಪರ ಬ್ಯಾಟ್ ಬೀಸುತ್ತಿರುವ ಗಬ್ಬರ್ ಸಿಂಗ್ ಖ್ಯಾತಿಯ ಶಿಖರ್ ಧವನ್ ಹೊಸ ದಾಖಲೆ ನಿರ್ಮಿಸಿದರು. ಚುಟುಕು ಕ್ರಿಕೆಟ್​ನಲ್ಲಿ ಈ ಸಾಧನೆ ಮಾಡಿರುವ ಮೊದಲ ಭಾರತೀಯ ಕ್ರಿಕೆಟರ್ ಎಂಬ ಖ್ಯಾತಿಗೂ ಅವರು ಭಾಜನರಾಗಿದ್ದಾರೆ.

ಮುಂಬೈನ ಬ್ರೆಬೋರ್ನ್​ ಮೈದಾನದಲ್ಲಿ ಗುಜರಾತ್​ ಟೈಟನ್ಸ್​ ವಿರುದ್ಧ ನಡೆದ ಪಂದ್ಯದಲ್ಲಿ ಶಿಖರ್ ಧವನ್ ಈ ರೆಕಾರ್ಡ್​ ಬರೆದಿದ್ದು, ಚುಟುಕು ಕ್ರಿಕೆಟ್​ನಲ್ಲಿ ಅತಿ ಹೆಚ್ಚು ಬೌಂಡರಿ(ಫೋರ್​​) ಸಿಡಿಸಿರುವ ಭಾರತದ ಮೊದಲ ಹಾಗೂ ವಿಶ್ವದ ಐದನೇ ಪ್ಲೇಯರ್​ ಆಗಿದ್ದಾರೆ. ಈ ಹಿಂದೆ ಚೆನ್ನೈ ವಿರುದ್ಧ ನಡೆದ ಪಂದ್ಯದಲ್ಲಿ ನಾಲ್ಕು ಫೋರ್​​ ಸಹಾಯದಿಂದ 33ರನ್​ಗಳಿಕೆ ಮಾಡಿದ್ದ ಇವರು, ಟಿ-20ಯಲ್ಲಿ 997 ಬೌಂಡರಿ ಸಿಡಿಸಿರುವ ಸಾಧನೆ ಮಾಡಿದ್ದರು. ಇಂದಿನ ಪಂದ್ಯದಲ್ಲಿ 3 ಫೋರ್​ ಬಾರಿಸುತ್ತಿದ್ದಂತೆ ಸಾವಿರ ಬೌಂಡರಿಗಳಿಸಿರುವ ದಾಖಲೆಗೆ ಪಾತ್ರರಾಗಿದ್ದಾರೆ.

ಗುಜರಾತ್​ ವಿರುದ್ಧದ ಪಂದ್ಯದಲ್ಲಿ ಲಿವಿಂಗ್​ ಸ್ಟೋನ್​​-ಶಿಖರ್ ಧವನ್ ಬ್ಯಾಟಿಂಗ್​

ಚುಟುಕು ಕ್ರಿಕೆಟ್​ನಲ್ಲಿ ಈಗಾಗಲೇ ವೆಸ್ಟ್​ ಇಂಡೀಸ್​ನ ದೈತ್ಯ ಕ್ರಿಸ್ ಗೇಲ್​ 463 ಪಂದ್ಯಗಳಿಂದ 1132 ಬೌಂಡರಿ, ಇಂಗ್ಲೆಂಡ್​ನ ಅಲೆಕ್ಸ್ ಹೆಲ್ಸ್​​​ 336 ಪಂದ್ಯಗಳಿಂದ 1054 ಬೌಂಡರಿ, ಆಸ್ಟ್ರೇಲಿಯಾದ ಡೇವಿಡ್ ವಾರ್ನರ್​​ 314 ಪಂದ್ಯಗಳಿಂದ 1005 ಬೌಂಡರಿ, ಆಸ್ಟ್ರೇಲಿಯಾದ ಮತ್ತೋರ್ವ ಪ್ಲೇಯರ್​ ಆರೋನ್​ ಫಿಂಚ್​​ 348 ಪಂದ್ಯಗಳಿಂದ 1004 ಬೌಂಡರಿ ಗಳಿಸಿದ್ದಾರೆ. ಧವನ್ ಬಳಿಕ ಭಾರತದ ಮಾಜಿ ಕ್ಯಾಪ್ಟನ್​​ ವಿರಾಟ್​ ಕೊಹ್ಲಿ 917 ಬೌಂಡರಿ, ಟೀಂ ಇಂಡಿಯಾ ನಾಯಕ ರೋಹಿತ್ ಶರ್ಮಾ 875 ಬೌಂಡರಿ ಸಿಡಿಸಿದ್ದು, ಮಾಜಿ ಆಟಗಾರ ಸುರೇಶ್ ರೈನಾ 779 ಫೋರ್ ಹೊಡೆದಿರುವ ಸಾಧನೆ ಮಾಡಿದ್ದಾರೆ.