ಕೋಲ್ಕತ್ತಾ ನೈಟ್‌ರೈಡರ್ಸ್​ ವಿರುದ್ಧ 44 ರನ್​ಗಳ ಜಯ ಸಾಧಿಸಿದ ಡೆಲ್ಲಿ ಕ್ಯಾಪಿಟಲ್ಸ್​

ಪೃಥ್ವಿ ಶಾ ಮತ್ತು ಡೇವಿಡ್ ವಾರ್ನರ್​ ಬ್ಯಾಟಿಂಗ್ ಹಾಗೂ ಕುಲ್ದೀಪ್ ಯಾದವ್ ಮತ್ತು ಖಲೀಲ್ ಅಹ್ಮದ್​ ಅವರ ಆಕರ್ಷಕ ಬೌಲಿಂಗ್ ದಾಳಿಯ ನೆರವಿನಿಂದ ಡೆಲ್ಲಿ ಕ್ಯಾಪಿಟಲ್ಸ್​ ಟೂರ್ನಿಯಲ್ಲಿ 2ನೇ ಜಯ ಸಾಧಿಸಿದೆ.

ಮುಂಬೈ: ಆಲ್​ರೌಂಡ್​ ಪ್ರದರ್ಶನ ತೋರಿದ ಡೆಲ್ಲಿ ಕ್ಯಾಪಿಟಲ್ಸ್​ ಅಗ್ರಸ್ಥಾನಿ ಕೋಲ್ಕತ್ತಾ ನೈಟ್​ ರೈಡರ್ಸ್ ವಿರುದ್ಧ ರನ್​ಗಳ ಪ್ರಾಬಲ್ಯಯುತ ಜಯ ಸಾಧಿಸಿದೆ. ಮುಂಬೈನ ಬ್ರಬೌರ್ನ್​ ಸ್ಟೇಡಿಯಂನಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಡೆಲ್ಲಿ ಕ್ಯಾಪಿಟಲ್ಸ್ ತಂಡ ಪೃಥ್ವಿ ಶಾ 51(29 ಎಸೆತ), ಡೇವಿಡ್​ ವಾರ್ನರ್​ 61(45 ಎಸೆತ) ಮತ್ತು ಶಾರ್ದೂಲ್ ಠಾಕೂರ್​ 29(11 ಎಸೆತ) ರನ್​ಗಳ ನೆರವಿನಿಂದ 20 ಓವರ್​ಗಳಲ್ಲಿ 5 ವಿಕೆಟ್ ಕಳೆದುಕೊಂಡು 215 ರನ್​ಗಳಿಸಿತ್ತು.

ಈ ಬೃಹತ್​ ಮೊತ್ತವನ್ನು ಬೆನ್ನಟ್ಟಿದ ಕೋಲ್ಕತ್ತಾ ನೈಟ್ ರೈಡರ್ಸ್ 19.4 ಓವರ್​ಗಳಲ್ಲಿ 171 ರನ್​ಗಳಿಗೆ ಆಲೌಟ್ ಆಗುವ ಮೂಲಕ 44 ರನ್​ಗಳ ಹೀನಾಯ ಸೋಲು ಕಂಡಿತು. ರಹಾನೆ(8) ಮತ್ತು ವೆಂಕಟೇಶ್ ಅಯ್ಯರ್​(18) ಬೃಹತ್ ಮೊತ್ತದ ಚೇಸಿಂಗ್​ ಒತ್ತಡದಲ್ಲಿ ವಿಕೆಟ್​ ಒಪ್ಪಿಸಿದರು. ನಂತರ ನಾಯಕ ಶ್ರೇಯಸ್​ ಅಯ್ಯರ್​ 33 ಎಸೆತಗಳಲ್ಲಿ 5 ಬೌಂಡರಿ ಮತ್ತು 2 ಸಿಕ್ಸರ್​ ಸಹಿತ 54 ರನ್ ಸಿಡಿಸಿ ನಿತೀಶ್ ರಾಣಾ (30) ಜೊತೆಗೆ 3ನೇ ವಿಕೆಟ್‌ಗೆ ​69 ರನ್​ಗಳ ಜೊತೆಯಾಟ ನೀಡಿದರು.

ಈ ಜೋಡಿ ಬೇರ್ಪಡುತ್ತಿದ್ದಂತೆ ಕೆಕೆಆರ್​ ದಿಢೀರ್ ಕುಸಿತ ಕಂಡಿತು. ರಸೆಲ್ 21 ಎಸೆತಗಳಲ್ಲಿ ಕೇವಲ 24 ರನ್​ಗಳಿಸಿದರೆ, ಕಳೆದ ಪಂದ್ಯದಲ್ಲಿ ಅಬ್ಬರಿಸಿದ್ದ ಕಮಿನ್ಸ್​ 4ಕ್ಕೆ ಸೀಮಿತವಾದರು. ಬಿಲಿಂಗ್ಸ್​ (15), ನರೈನ್(4) ಕೂಡ ಡೆಲ್ಲಿ ಬೌಲರ್​ಗಳ ದಾಳಿಯ ಮುಂದೆ ನಿಲ್ಲಲಾಗಲಿಲ್ಲ.

ತಮ್ಮ ಮಾಜಿ ತಂಡದ ವಿರುದ್ಧ ಆಕರ್ಷಕ ಪ್ರದರ್ಶನ ತೋರಿದ ಕುಲ್ದೀಪ್​ ಯಾದವ್​ 35 ರನ್​ ನೀಡಿ 4 ಹಾರಿಸಿದರೆ, ಖಲೀಲ್ ಅಹ್ಮದ್​ 25ಕ್ಕೆ 3 ವಿಕೆಟ್​, ಶಾರ್ದೂಲ್ ಠಾಕೂರ್​ 30ಕ್ಕೆ2, ಲಲಿತ್ ಯಾದವ್​ 8ಕ್ಕೆ 1 ವಿಕೆಟ್ ಪಡೆದು ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದರು.

ಇದನ್ನೂ ಓದಿ:ರಮೀಜ್​ ರಾಜಾರ ಮಹತ್ವಾಕಾಂಕ್ಷೆಯ ಚತುಷ್ಕೋನ ಸರಣಿ ಪ್ರಸ್ತಾವನೆ ತಿರಸ್ಕರಿಸಿದ ಐಸಿಸಿ