ಕೃನಾಲ್​ ಪಾಂಡ್ಯಾ ಜತೆ ಕಿರಿಕ್​:ಬರೋಡಾ ತಂಡಕ್ಕೆ ಗುಡ್​ಬೈ ಹೇಳಿ ರಾಜಸ್ಥಾನ ಸೇರಿದ ದೀಪಕ್ ಹೂಡಾ!

ಸ್ಪೋಟಕ ಬ್ಯಾಟಿಂಗ್​ನಿಂದ ಹೆಸರುಗಳಿಸಿರುವ ಬರೋಡಾ ತಂಡದ ಆಲ್​ರೌಂಡರ್ ದೀಪಕ್ ಹೂಡಾ ಇದೀಗ ಆ ತಂಡಕ್ಕೆ ಗುಡ್​ಬೈ ಹೇಳಿದ್ದಾರೆ.

ವಡೋದರಾ:ಕಳೆದ ಅನೇಕ ವರ್ಷಗಳಿಂದ ಬರೋಡಾ ತಂಡದಲ್ಲಿ ಅದ್ಭುತ ಪ್ರದರ್ಶನ ನೀಡುತ್ತಿದ್ದ ಆಲ್​ರೌಂಡರ್​ ದೀಪಕ್ ಹೂಡಾ ಇದೀಗ ರಾಜಸ್ಥಾನ ತಂಡ ಸೇರಿಕೊಂಡಿದ್ದಾರೆ. ಕಳೆದ ಜನವರಿ ತಿಂಗಳಲ್ಲಿ ನಡೆದಿದ್ದ ಸೈಯದ್​ ಮುಷ್ತಾಕ್​​ ಅಲಿ ಟಿ-20 ಟೂರ್ನಿ ವೇಳೆ ಬರೋಡಾ ತಂಡದ ಕ್ಯಾಪ್ಟನ್​ ಕೃನಾಲ್ ಪಾಂಡ್ಯಾ ಹಾಗೂ ದೀಪಕ್ ಹೂಡಾ ನಡುವೆ ಜಗಳವಾಗಿತ್ತು. ಹೀಗಾಗಿ ಟೂರ್ನಿಯಿಂದ ಅವರು ಹೊರಗುಳಿದಿದ್ದರು.

ಇದೇ ವಿಚಾರಕ್ಕಾಗಿ ದೀಪಕ್ ಹೂಡಾ ಅವರನ್ನ ಬರೋಡಾ ಕ್ರಿಕೆಟ್​ ಅಸೋಸಿಯೇಷನ್​ ಅಮಾನತುಗೊಳಿಸಿ ಆದೇಶ ಹೊರಡಿಸಿತು. ಈಗಾಗಲೇ ಅವರಿಗೆ ಬರೋಡಾ ಕ್ರಿಕೆಟ್​ ಸಂಸ್ಥೆ ನಿರಾಕ್ಷೇಪಣ ಪತ್ರ ನೀಡಿದ್ದು, ಇದರ ಬೆನ್ನಲ್ಲೇ ರಾಜಸ್ಥಾನ ತಂಡ ಸೇರಿಕೊಂಡಿದ್ದಾರೆ.

2014ರಲ್ಲಿ ಪ್ರಥಮ ದರ್ಜೆ ಕ್ರಿಕೆಟ್​ಗೆ ಪದಾರ್ಪಣೆ ಮಾಡಿದ್ದ ಹೂಡಾ 46 ಪಂದ್ಯಗಳನ್ನಾಡಿದ್ದು, 2908 ರನ್​ಗಳಿಕೆ ಮಾಡಿದ್ದಾರೆ. ಇದರಲ್ಲಿ 9 ಶತಕ ಹಾಗೂ 15 ಅರ್ಧಶತಕಗಳಿವೆ. ಜೊತೆಗೆ 20 ವಿಕೆಟ್ ಪಡೆದುಕೊಂಡಿದ್ದಾರೆ. ಸದ್ಯ ಇಂಡಿಯನ್ ಪ್ರೀಮಿಯರ್ ಲೀಗ್​ನಲ್ಲಿ ಹೂಡಾ ಪಂಜಾಬ್​ ಕಿಂಗ್ಸ್​ ಪರ ಆಡುತ್ತಿದ್ದಾರೆ.

ಬೇಸರ ವ್ಯಕ್ತಪಡಿಸಿರುವ ಇರ್ಪಾನ್ ಪಠಾಣ್

ಟೀಂ ಇಂಡಿಯಾ ಪರ ಆಡುವ ಸಂಭಾವ್ಯ ಆಟಗಾರರ ಪಟ್ಟಿಯಲ್ಲಿರುವ ಓರ್ವ ಆಟಗಾರರನ್ನ ಯಾವ ಕ್ರಿಕೆಟ್​ ಸಂಸ್ಥೆ ಕೂಡ ಕಳೆದುಕೊಳ್ಳಲು ಇಷ್ಟಪಡಲ್ಲ. ಆದರೆ ಬರೋಡ ಈ ನಿರ್ಧಾರ ಕೈಗೊಂಡಿರುವುದು ನಿಜಕ್ಕೂ ಅದಕ್ಕಾಗಿರುವ ದೊಡ್ಡ ನಷ್ಟ. ಮುಂದಿನ 10 ವರ್ಷಗಳ ಕಾಲ ಅವರು ಬರೋಡ ಪರ ಆಡುವ ಸಾಮರ್ಥ್ಯ ಹೊಂದಿದ್ದರು ಎಂದಿದ್ದಾರೆ.