ಕೈಗೆ ಬಂದ ತುತ್ತು ಬಾಯಿಗೆ ಬರಲಿಲ್ಲ: ಕಾಂಗರೂ ವಿರುದ್ಧ ಮೊದಲ ಪಂದ್ಯ ಸೋತ ಭಾರತ

ಕಾಮನ್​​ವೆಲ್ತ್​ ಗೆಮ್ಸ್​​ನಲ್ಲಿ ಆಸ್ಟ್ರೇಲಿಯಾ ವಿರುದ್ಧ ನಡೆದ ಮೊದಲ ಟಿ-20 ಪಂದ್ಯದಲ್ಲಿ ಹರ್ಮನ್​ ಪ್ರೀತ್ ಕೌರ್ ಬಳಗ ಸೋಲು ಕಂಡಿದೆ.

ಬರ್ಮಿಂಗ್​ಹ್ಯಾಮ್​:ಕೇವಲ 49ರನ್​​ಗಳಿಕೆ ಮಾಡುವಷ್ಟರಲ್ಲಿ ಆಸ್ಟ್ರೇಲಿಯಾದ ನಾಲ್ಕು ವಿಕೆಟ್ ಪಡೆದುಕೊಂಡಿದ್ದ ಭಾರತ, ತದನಂತರ ಮಾಡಿರುವ ತಪ್ಪಿನಿಂದ ಮೊದಲ ಪಂದ್ಯದಲ್ಲಿ ಸೋಲು ಕಂಡಿದೆ. ಈ ಮೂಲಕ ಕಾಮನ್​ವೆಲ್ತ್​ ಗೆಮ್ಸ್​​ನಲ್ಲಿ ಸೋಲಿನೊಂದಿಗೆ ತನ್ನ ಅಭಿಯಾನ ಆರಂಭಿಸಿದೆ. ಉಭಯ ತಂಡಗಳ ಮಧ್ಯೆ ನಡೆದ ಮೊದಲ ಪಂದ್ಯದಲ್ಲಿ ಭಾರತದ ವಿರುದ್ಧ ಆಸ್ಟ್ರೇಲಿಯಾ 3 ವಿಕೆಟ್​​ಗಳ ಭರ್ಜರಿ ಗೆಲುವು ದಾಖಲು ಮಾಡಿ ಶುಭಾರಂಭ ಮಾಡಿದೆ.

ಟಾಸ್​ ಗೆದ್ದು ಮೊದಲು ಬ್ಯಾಟಿಂಗ್ ನಡೆಸಿದ ಹರ್ಮನ್​ಪ್ರೀತ್ ಬಳಗ ನಿಗದಿತ 20 ಓವರ್​​ಗಳಲ್ಲಿ 8 ವಿಕೆಟ್​ನಷ್ಟಕ್ಕೆ 154ರನ್​​ಗಳಿಕೆ ಮಾಡಿತು. ಇದರ ಬೆನ್ನತ್ತಿದ ಕಾಂಗರೂ ಪಡೆ 19 ಓವರ್​​​ಗಳಲ್ಲಿ 7 ವಿಕೆಟ್​ನಷ್ಟಕ್ಕೆ 157ರನ್​​​ಗಳಿಸಿ, ಗೆಲುವು ಸಾಧಿಸಿದೆ.

ಟಾಸ್​ ಗೆದ್ದು ಮೊದಲು ಬ್ಯಾಟಿಂಗ್ ಮಾಡಿದ ಭಾರತ ತಂಡಕ್ಕೆ ಬ್ಯಾಟರ್ ಶೆಫಾಲಿ ವರ್ಮ ಹಾಗೂ ನಾಯಕಿ ಹರ್ಮನ್​ಪ್ರೀತ್ ಕೌರ್​ ಉತ್ತಮ ಆಟ ಪ್ರದರ್ಶಿಸಿದರು. ಆದರೆ, ಉಳಿದಂತೆ ಯಾವುದೇ ಆಟಗಾರರಿಂದ ಹೇಳಿಕೊಳ್ಳುವಂತಹ ಪ್ರದರ್ಶನ ಮೂಡಿ ಬರಲಿಲ್ಲ. ಶೆಫಾಲಿ ಜೊತೆ ಇನ್ನಿಂಗ್ಸ್​ ರಂಭಿಸಿದ ಬ್ಯಾಟರ್ ಸ್ಮೃತಿ ಮಂದಾನ(24ರನ್​)ಗಳಿಸಿ ವಿಕೆಟ್ ಒಪ್ಪಿಸಿದರು.

ಇದಾದ ಬಳಿಕ ಬಂದ ಭಾಟಿಯಾ(8) ಮೈದಾನದಲ್ಲಿ ಹೆಚ್ಚು ಹೊತ್ತು ನಿಲ್ಲಲಿಲ್ಲ. ಇದರ ಬೆನ್ನಲ್ಲೇ ರಾಡ್ರಿಗಸ್​​(11)ರನ್​ಗಳಿಸಿ ಔಟಾದರು. ಚೆನ್ನಾಗಿ ಆಡ್ತಿದ್ದ ಶೆಫಾಲಿ 48ರನ್​​ಗಳಿಸಿ ಔಟಾದರು. ಇನ್ನೂ ಹರ್ಮನ್​ಪ್ರೀತ್ ಕೌರ್​ ತಂಡಕ್ಕೆ ಆಧಾರವಾದರು. ತಾವು ಎದುರಿಸಿದ 34 ಎಸೆತಗಳಲ್ಲಿ 52ರನ್​​ಗಳಿಕೆ ಮಾಡಿದರು. ಆಸಿಸ್​ ತಂಡದ ಪರ ಜೊನಾಸನ್​ ನಾಲ್ಕು ವಿಕೆಟ್ ಪಡೆದರೆ, ಮೇಘನ್​ ಸ್ಕಟ್​ 2 ಹಾಗೂ ಡಾರ್ಸಿ ಬ್ರೌನ್ 1 ವಿಕೆಟ್ ಪಡೆದರು.

155ರನ್​​ಗಳ ಗುರಿ ಬೆನ್ನತ್ತಿದ ಆಸ್ಟ್ರೇಲಿಯಾ 49ರನ್​​ಗಳಿಕೆ ಮಾಡುವಷ್ಟರಲ್ಲಿ ಪ್ರಮುಖ ಐದು ವಿಕೆಟ್ ಕಳೆದುಕೊಂಡು ಸೋಲಿನ ಭೀತಿಗೆ ಒಳಗಾಗಿತ್ತು. ಈ ವೇಳೆ ಒಂದಾದ ಗ್ರಾಡನೆರ್(52)​​ ಹಾಗೂ ಗ್ರೆಸ್​​(37) ತಂಡಕ್ಕೆ ಉತ್ತಮ ಜೊತೆಯಾಟ ನೀಡಿದರು. ಕೊನೆಯದಾಗಿ ಕಿಂಗ್​ ಅಜೇಯ 18ರನ್​​ಗಳಿಕೆ ಮಾಡಿ ತಂಡವನ್ನ ಗೆಲುವಿನ ದಡ ಸೇರಿಸಿದರು. ತಂಡದ ಪರ ರೇಣುಕಾ ಸಿಂಗ್​ 4 ವಿಕೆಟ್ ಪಡೆದುಕೊಂಡರೆ, ದೀಪ್ತಿ ಶರ್ಮಾ 2 ಹಾಗೂ ಮೇಘಾ ಸಿಂಗ್ 1 ವಿಕೆಟ್ ಕಿತ್ತರು.