ನಮಗೆ ಪ್ರತಿಯೊಂದು ಎದುರಾಳಿ ತಂಡವೂ ಭಾರತವಿದ್ದಂತೆ... ಹೀಗೆ ಹೇಳಿದ್ಯಾರು ಗೊತ್ತೇ?

ಭಾರತ ಕ್ರಿಕೆಟ್​ ತಂಡದ ಸಾಂಪ್ರದಾಯಿಕ ಎದುರಾಳಿ ಪಾಕಿಸ್ತಾನ ತಂಡದ ನಾಯಕ ಸರ್ಫರಾಜ್, ವಿಶ್ವಕಪ್​ನಲ್ಲಿ ಭಾರತ ತಂಡವಷ್ಟೇ ಅಲ್ಲದೆ ಇತರ ತಂಡಗಳ ವಿರುದ್ಧವೂ ಉತ್ತಮ ಪ್ರದರ್ಶನ ನೀಡುವ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ಇಸ್ಲಾಮಾಬಾದ್​(ಪಾಕಿಸ್ತಾನ):ವಿಶ್ವಕಪ್​ನಲ್ಲಿ ನಾವು ಭಾರತ ತಂಡದ ವಿರುದ್ಧ ಆಡುತ್ತಿದ್ದೇವೆ ಎಂದುಕೊಂಡೇ ಪ್ರತಿಯೊಂದು ತಂಡದ ವಿರುದ್ಧ ಆಟವಾಡುತ್ತೇವೆ ಎಂದು ಪಾಕಿಸ್ತಾನ ತಂಡದ ನಾಯಕ ಸರ್ಫರಾಜ್​ ಹೇಳಿದ್ದಾರೆ.

ಖಾಸಗಿ ಮಾಧ್ಯಮಕ್ಕೆ ನೀಡಿರುವ ಸಂದರ್ಶನದಲ್ಲಿ ಮಾತನಾಡಿರುವ ಸರ್ಫರಾಜ್​ ನಾವು ವಿಶ್ವಕಪ್​ನಲ್ಲಿ ಭಾರತದ ವಿರುದ್ಧ ಒಂದು ಪಂದ್ಯ ಆಡುತ್ತೇವೆ. ಆದ್ರೆ ಇನ್ನುಳಿದ ತಂಡಗಳನ್ನೂ ನಾವು ಭಾರತ ಎಂದೇ ಪರಿಗಣಿಸಿ ಆಟವಾಡುತ್ತೇವೆ ಎಂದು ಹೇಳಿದ್ದಾರೆ.

ಇಲ್ಲಿಯವರೆಗೆ 11 ಏಕದಿನ ವಿಶ್ವಕಪ್​ ಟೂರ್ನಮೆಂಟ್​ಗಳು ನಡೆದಿದ್ದು, ಪಾಕಿಸ್ತಾನ ತಂಡ ಭಾರತದ ವಿರುದ್ಧ ಒಂದು ಪಂದ್ಯವನ್ನೂ ಗೆದ್ದಿಲ್ಲ.

ಈಗಾಗಲೆ 2019ರ ವಿಶ್ವಕಪ್​ ಟೂರ್ನಮೆಂಟ್​​​ಗೆ​ ಪಾಕಿಸ್ತಾನ ತಂಡವನ್ನ ಆಯ್ಕೆ ಮಾಡಲಾಗಿದ್ದು, ಯುವ ಆಟಗಾರರೊಂದಿಗೆ ಹಿರಿಯ ಆಟಗಾರ ಶೋಯಬ್​ ಮಲ್ಲಿಕ್ ಹಾಗೂ ಮೊಹಮ್ಮದ್​ ಹಫೀಜ್​​ ಕೂಡಾ ತಂಡದಲ್ಲಿ ಸ್ಥಾನ ಪಡೆದುಕೊಂಡಿದ್ದಾರೆ.