ಕಾಟ್ರೇಲ್​ ಸೆಲ್ಯೂಟ್​ ಅನುಕರಣೆ: ವಿಂಡೀಸ್​ ಆಟಗಾರನಿಗೆ ಕೊಹ್ಲಿ, ಶಮಿ ತಿರುಗೇಟು

ತಮ್ಮ ವಿಶಿಷ್ಟ ಸಂಭ್ರಮಾಚರಣೆ ಮೂಲಕ ಗಮನ ಸೆಳೆದಿರುವ ಕಾಟ್ರೇಲ್​ ಸೆಲ್ಯೂಟ್ ಅನ್ನ ಟೀಂ ಇಂಡಿಯಾ ನಾಯಕ ವಿರಾಟ್​ ಮತ್ತು ವೇಗಿ ಮೊಹಮ್ಮದ್ ಶಮಿ ಅನುಕರಣೆ ಮಾಡಿದ್ದಾರೆ.

ಮ್ಯಾಂಚೆಸ್ಟರ್: ವಿಕೆಟ್​ ಪಡೆದಾಗಲೆಲ್ಲ ಮೂರು ಹೆಜ್ಜೆ ಮಾರ್ಚ್ ಫಾಸ್ಟ್​ ಮಾಡಿ ಸೆಲ್ಯೂಟ್​ ಹೊಡೆಯೋ ಮೂಲಕ ಸಂಭ್ರಮಾಚರಣೆ ನಡೆಸುತ್ತಿದ್ದ ವಿಂಡೀಸ್​ ಆಟಗಾರ ಶೆಲ್ಡನ್​ ಕಾಟ್ರೇಲ್​ಗೆ ಟೀಂ ಇಂಡಿಯಾ ನಾಯಕ ವಿರಾಟ್​ ಮತ್ತು ವೇಗಿ ಶಮಿ ತಿರುಗೇಟು ನೀಡಿದ್ದಾರೆ.

ನಿನ್ನೆ ಮ್ಯಾಂಚೆಸ್ಟರ್​ನಲ್ಲಿ ನಡೆದಿದ್ದ ಭಾರತ- ವೆಸ್ಟ್​ ಇಂಡೀಸ್​ ನಡುವಿನ ಪಂದ್ಯದಲ್ಲಿ ಟೀಂ ಇಂಡಿಯಾ ವೇಗಿ ಮೊಹ್ಮದ್​ ಶಮಿ, ಕಾಟ್ರೇಲ್​ ಬೌಲಿಂಗ್​ನಲ್ಲಿ ಕೀಪರ್​ಗೆ ಕ್ಯಾಚ್​ ನೀಡಿ ಔಟ್​ ಆದರು. ಈ ವೇಳೆ ಕಾಟ್ರೇಲ್​ ಸೆಲ್ಯೂಟ್​ ಮಾಡುವ ಮೂಲಕ ಶಮಿಯನ್ನ ಪೆವಿಲಿಯನ್​ಗೆ ಕಳುಹಿಸಿದರು.

ಟೀ ಇಂಡಿಯಾ ನೀಡಿದ್ದ 269 ರನ್​ಗಳ ಗುರಿ ಬೆನ್ನತ್ತಿದ್ದ ವಿಂಡೀಸ್​ ಆಟಗಾರರು ಪೆವಿಲಿಯನ್​ ಪರೇಡ್ ನಡೆಸಿದ್ರು. 10ನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್​ ಮಾಡಲು ಬಂದ ಕಾಟ್ರೇಲ್​ ಚಹಾಲ್​ ಬೌಲಿಂಗ್​ನಲ್ಲಿ ಎಲ್​ಬಿಡಬ್ಲ್ಯೂ ಬಲೆಗೆ ಬಿದ್ದು ಪೆವಿಲಿಯನ್​ಗೆ ಹೆಜ್ಜೆ ಹಾಕಿದರು.

ಈ ವೇಳೆ ವೇಗಿ ಮೊಹ್ಮದ್​ ಶಮಿ ಮತ್ತು ನಾಯಕ ವಿರಾಟ್​ ಕೊಹ್ಲಿ ಕಾಟ್ರೇಲ್​ ಅವರ ಸಂಭ್ರಮಾಚರಣೆಯನ್ನ ಅನುಕರಣೆ ಮಾಡುವ ಮೂಲಕ ಕಾಲೆಳೆದಿದ್ದಾರೆ.