ಗಾಯಗೊಂಡ ಭುವಿ ಫಿಟ್​.. ಶಮಿ ಶೈನಿಂಗ್​: ಭಾರತಕ್ಕೆ ಸಿಹಿ ಸಂಕಟ!

ಗಾಯಗೊಂಡಿದ್ದ ವೇಗಿ ಭುವನೇಶ್ವರ್ ಕುಮಾರ್ ಸಂಪೂರ್ಣವಾಗಿ ಫಿಟ್​ ಆಗಿದ್ದು, ತಂಡಕ್ಕೆ ವಾಪಸ್​ ಆಗಲು ಕಾಯುತ್ತಿದ್ದಾರೆ. ಇತ್ತ ಶಮಿ ಕೂಡ ಅದ್ಭುತ ಪ್ರದರ್ಶನ ನೀಡುತಿದ್ದು, ಮುಂದಿನ ಪಂದ್ಯದಲ್ಲಿ ಯಾರಿಗೆ ಅವಕಾಶ ನೀಡಬೇಕು ಎಂಬುದು ತಲೆನೋವಾಗಿದೆ.

ಲಂಡನ್:ಕಳೆದ ವಾರ ಪಾಕಿಸ್ತಾನದ ವಿರುದ್ಧದ ಪಂದ್ಯದಲ್ಲಿ ಎಡಗಾಲಿನ ಹ್ಯಾಮ್​ಸ್ಟ್ರಿಂಗ್​ಗೆ ತುತ್ತಾಗಿ ಭಾರತ ತಂಡದ ಆತಂಕಕ್ಕೆ ಕಾರಣವಾಗಿದ್ದ ಭುವನೇಶ್ವರ್​ ಕುಮಾರ್​ ಗುಣ ಮುಖರಾಗಿದ್ದು ತಂಡಕ್ಕೆ ಕಂಬ್ಯಾಕ್​ ಮಾಡಲು ಕಾಯುತ್ತಿದ್ದಾರೆ.

ಭುವಿ ಗಾಯದ ಸಮಸ್ಯೆಯಿಂದ ಆಡುವ ಹನ್ನೊಂದರ ಬಳಗದಲ್ಲಿ ವೇಗಿ ಮೊಹಮ್ಮದ್ ಶಮಿಗೆ ಅವಕಾಶ ನೀಡಲಾಯಿತು. ಆಡಿದ ಮೊದಲ ಪಂದ್ಯದಲ್ಲೇ ಅದ್ಭುತ ಪ್ರದರ್ಶನ ತೋರಿದ್ದ ಶಮಿ, 4 ವಿಕೆಟ್​ ಪಡೆದು ಟೀಂ ಇಂಡಿಯಾ ಗೆಲುವಿಗೆ ಕಾರಣರಾಗಿದ್ದರು. ನಿನ್ನೆ ನಡೆದ ಪಂದ್ಯದಲ್ಲೂ ಪ್ರಮುಖ 4 ವಿಕೆಟ್​ ಪಡೆದ ಶಮಿ, 2 ಪಂದ್ಯದಿಂದ 8 ವಿಕೆಟ್​ ಪಡೆದು ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದ್ದಾರೆ.

ಭುವಿ ಗಾಯದ ಸಮಸ್ಯೆಯಿಂದ ಆತಂಕ ಗೊಂಡಿದ್ದ ಟೀಂ ಇಂಡಿಯಾ, ಶಮಿ ಅದ್ಭುತ ಪ್ರದರ್ಶನದಿಂದ ನಿರಾಳವಾಗಿತ್ತು. ಆದರೆ, ತಂಡಕ್ಕೆ ಈಗ ಮತ್ತೊಂದು ಸಂಕಟ ಶುರುವಾಗಿದೆ.

ಭುವನೇಶ್ವರ್ ಸಂಪೂರ್ಣವಾಗಿ ಫಿಟ್​ ಆಗಿದ್ದು,ತಂಡಕ್ಕೆ ವಾಪಾಸ್​ ಆಗಲು ಕಾಯುತಿದ್ದಾರೆ. ಇತ್ತ ಭುವಿ ತಂಡಕ್ಕೆ ಬಂದರೆ ಶಮಿ ಬೆಂಚ್​ ಕಾಯಬೇಕು. ಇಂಗ್ಲೆಂಡ್​ ವಿರುದ್ಧದ ಪಂದ್ಯಕ್ಕೆ ಸ್ವಿಂಗ್​ ಸ್ಟಾರ್ ಮತ್ತು ಸ್ಪೀಡ್​ ಸ್ಟಾರ್​ಗಳಲ್ಲಿ ಟೀಂ ಇಂಡಿಯಾ ಯಾರಿಗೆ ಮಣೆ ಹಾಕುತ್ತೆ ಕಾದು ನೋಡಬೇಕು.