ನವದೆಹಲಿ:ನಿನ್ನೆ ನಡೆದ ಭಾರತ ಹಾಗೂ ಆಫ್ಘಾನಿಸ್ತಾನದ ಪಂದ್ಯದಲ್ಲಿ ಟಾಸ್ ಗೆದ್ದು ಬ್ಯಾಂಟಿಂಗ್ ಆಯ್ದುಕೊಂಡ ಭಾರತ ಅಷ್ಟೇನೂ ಉತ್ತಮ ಪ್ರದರ್ಶನ ನೀಡಲಿಲ್ಲವೆಂಬುದು ಅಭಿಮಾನಿಗಳಿಗೆ ಬೇಸರ ತರಿಸಿದೆ.
ಮಧ್ಯಮ ಓವರ್ಗಳಲ್ಲಿ ಕಣದಲ್ಲಿದ್ದ ಎಂ ಎಸ್ ಧೋನಿ ಹಾಗೂ ಕೇದರ್ ಜಾಧವ್ ಆಮೆಗತಿಯಲ್ಲಿ ಸ್ಕೋರ್ ಗಳಿಸಿದರು ಎಂಬುದು ಕ್ರಿಕೆಟ್ ಅಭಿಮಾನಿಗಳ ಆರೋಪ. ಇದಕ್ಕೆ ಕ್ರಿಕೆಟ್ ದೇವರು ಸಚಿನ್ ತೆಂಡೂಲ್ಕರ್ ಸಹ ದನಿಗೂಡಿಸಿದ್ದು, ಇಬ್ಬರ ಜೊತೆಯಾಟ ಅಷ್ಟು ಸಮಾಧಾನ ತಂದಿಲ್ಲ ಎಂದು ಹೇಳಿಕೊಂಡಿದ್ದಾರೆ.
ನಿನ್ನೆಯ ಪಂದ್ಯ ಅಷ್ಟು ಸಮಾಧಾನ ತಂದಿಲ್ಲ. ಇನ್ನೂ ಚೆನ್ನಾಗಿ ಆಟವಾಡಬಹುದಿತ್ತು. ಧೋನಿ ಹಾಗೂ ಕೇದಾರ್ ಜೊತೆಯಾಟ ಖುಷಿಯನ್ನೇ ತರಲಿಲ್ಲ. ಇಬ್ಬರೂ ತೀರಾ ನಿಧಾನವಾಗಿ ಆಡಿದರು. ಸ್ಪಿನ್ ಬೌಲಿಂಗ್ ನಡುವೆ 34 ಓವರ್ಗಳನ್ನು ಕ್ರಮಿಸಿದ್ದರೂ, ರನ್ ಗಳಿಕೆ ಮಾತ್ರ 119 ಆಗಿತ್ತು. ಆ ಸಮಯದಲ್ಲಿ ಧನಾತ್ಮಕ ಅಂಶವೇ ಇರಲಿಲ್ಲ ಎಂದಿದ್ದಾರೆ.
2-3 ಡಾಟ್ ಬಾಲ್ಗಳೇ ಹೆಚ್ಚಾಗಿದ್ದವು. ವಿರಾಟ್ ವಿಕೆಟ್ ಕಳೆದುಕೊಂಡ ನಂತರ 38ನೆಯ ಹಾಗೂ 45ನೆಯ ಓವರ್ಗಳಲ್ಲಿ ನಾವು ಹೆಚ್ಚು ರನ್ ಮಾಡಲಾಗಲಿಲ್ಲ. ಮಧ್ಯಮ ಕ್ರಮಾಂಕದ ಬ್ಯಾಟ್ಸ್ಮನ್ಗಳಿಂದ ಸಾಕಷ್ಟು ಸ್ಕೋರ್ ದಾಖಲಾಗಲಿಲ್ಲ. ಹೆಚ್ಚು ರನ್ ಗಳಿಸುವ ಆಸಕ್ತಿ ಬ್ಯಾಟ್ಸ್ಮನ್ಗಳಲ್ಲಿ ಹೆಚ್ಚಬೇಕು ಎಂದು ಸಲಹೆ ನೀಡಿದ್ದಾರೆ.50 ಓವರ್ಗಳಲ್ಲಿ 224 ಸ್ಕೋರ್ ಕಲೆ ಹಾಕಿದ ಟೀಂ ಇಂಡಿಯಾದಲ್ಲಿ, ಕೊಹ್ಲಿ 67 ಹಾಗೂ ಜಾದವ್ 52 ರನ್ ಗಳಿಸಿದ್ದು ಬಿಟ್ಟರೆ, ಉಳಿದವರಾರೂ ಬ್ಯಾಟಿಂಗ್ ಪರಾಕ್ರಮ ತೋರಲಿಲ್ಲ.