ಈ ಸಾರಿ ಹಂಗೇನಿಲ್ಲ.. ಭಾರತದ ವಿರುದ್ಧ ಪಾಕ್​ ಗೆದ್ದೇ ಗೆಲ್ಲುತ್ತೆ: ಇಂಜಮಾಮ್​ ಉಲ್​ ಹಕ್​ ಭವಿಷ್ಯ

ವಿಶ್ವಕಪ್​ ಟೂರ್ನಿಯಲ್ಲಿ ಭಾರತದ ವಿರುದ್ಧ ಈವರೆಗೂ ಪಾಕ್‌ ಜಯಿಸಿಲ್ಲ. ಆದರೆ, ಈ ಸಾರಿ ಪಾಕ್‌ ಗೆಲ್ಲೋ ಮೂಲಕ ಹೊಸ ಮೈಲಿಗಲ್ಲು ಸ್ಥಾಪಿಸಲಿದೆ ಅಂತಾ ಪಾಕ್‌ನ ಮಾಜಿ ನಾಯಕ ಇಂಜಮಾಮ್​ ಉಲ್ ಹಕ್ ಹೇಳಿದ್ದಾರೆ.

ಕರಾಚಿ: ಬದ್ದ ವೈರಿಗಳೆಂದೇ ಕರೆಯಲ್ಪಡುವ ಭಾರತ ಮತ್ತು ಪಾಕಿಸ್ತಾನ ನಡುವಿನ ಪಂದ್ಯಕ್ಕೆ ಇಡೀ ವಿಶ್ವವೇ ಕಾತರದಿಂದ ಕಾಯುತ್ತಿರುತ್ತದೆ. ವಿಶ್ವಕಪ್​ ಇತಿಹಾಸದಲ್ಲೇ ಭಾತರ ತಂಡ ಪಾಕಿಸ್ತಾನದ ವಿರುದ್ಧ ಎಂದೂ ಸೋತಿಲ್ಲ. ಆದರೆ, ಈ ಬಾರಿ ಪಾಕ್ ಭಾರತ ತಂಡವನ್ನ ಸೋಲಿಸುತ್ತದೆ ಎಂದು ಪಾಕ್ ಕ್ರಿಕೆಟ್​​ ಟೀಂ ಸೆಲೆಕ್ಟರ್​ ಮತ್ತು ಮಾಜಿ ನಾಯಕ ಇಂಜಮಾಮ್​ ಉಲ್​ ಹಕ್​ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ಜೂನ್​ 16 ರಂದು ಮ್ಯಾಂ​ಚೆಸ್ಟರ್​ನಲ್ಲಿ ನಡೆಯುವ ಪಂದ್ಯಕ್ಕಾಗಿ ಎಲ್ಲರೂ ಎದುರು ನೋಡುತ್ತಿದ್ದಾರೆ. ಈ ಪಂದ್ಯವನ್ನ ಪ್ರತಿಯೊಬ್ಬರೂ ಗಂಭೀರವಾಗಿ ಪರಿಗಣಿಸುತ್ತಾರೆ. ಕೆಲವರು ವಿಶ್ವಕಪ್​ ಬೇಡ, ಭಾರತದ ವಿರುದ್ಧ ಗೆದ್ದರೇ ಸಾಕು ಎಂದು ಯೋಚಿಸಿರುತ್ತಾರೆ ಎಂದು ಇಂಜಮಾಮ್​ ಹೇಳಿದ್ದಾರೆ.

ಭಾರತದ ವಿರುದ್ಧ ವಿಶ್ವಕಪ್​ನಲ್ಲಿ ಗೆದ್ದೇ ಇಲ್ಲ ಎಂಬ ಅಪವಾದವನ್ನ ನಾವು ಈ ಬಾರಿ ಮೆಟ್ಟಿ ನಿಲ್ಲಲಿದ್ದೇವೆ. ಭಾರತ ಮಾತ್ರವಷ್ಟೇ ಅಲ್ಲ ಎಲ್ಲಾ ತಂಡಗಳನ್ನೂ ಪಾಕ್​ ಮಣಿಸಲಿದೆ. ಯಾವುದೇ ತಂಡವನ್ನ ಕೇವಲವಾಗಿ ಕಾಣಬಾರದು. ಅದು ಆಫ್ಘಾನಿಸ್ತಾನವೇ ಆಗಲಿ ಇಂಗ್ಲೆಂಡ್​ ಆಗಲಿ ಉತ್ತಮ ಪ್ರದರ್ಶನ ನೀಡಿದ್ರೇ ಮಾತ್ರ ಗೆಲ್ಲಲು ಸಾಧ್ಯವಾಗುತ್ತದೆ ಎಂದಿದ್ದಾರೆ.

ಆಫ್ಘಾನಿಸ್ತಾನದ ವಿರುದ್ಧ ನಡೆದ ಅಭ್ಯಾಸ ಪಂದ್ಯದಲ್ಲಿ ಪಾಕಿಸ್ತಾನ ತಂಡ 3 ವಿಕೆಟ್​ಗಳ ಅಂತರದಿಂದ ಸೋಲು ಕಂಡಿದೆ. ಇದೇ 30 ರಿಂದ ವಿಶ್ವಕಪ್‌ಗೆ ಚಾಲನೆ ಸಿಗಲಿದೆ. ಅವತ್ತು ಉದ್ಘಾಟನಾ ಪಂದ್ಯದಲ್ಲಿ ಇಂಗ್ಲೆಂಡ್​ ಮತ್ತು ದಕ್ಷಿಣ ಆಫ್ರಿಕಾ ತಂಡ ಮುಖಾಮುಖಿಯಾಗಲಿವೆ.