ಮುಖಪುಟ ನೋಡಿ ಪುಸ್ತಕ ಅಳೆಯಬೇಡಿ: ಟೀಕಾಕಾರರಿಗೆ ಜಯವರ್ಧನೆ ಮಸ್ತ್​​​ ತಿರುಗೇಟು

ತನ್ನ ದೈಹಿಕ ಸ್ಥಿತಿಯಿಂದ ಟೀಕೆಗೆ ಗುರಿಯಾಗಿದ್ದ ಶ್ರೀಲಂಕಾ ಕ್ರಿಕೆಟ್​ ಆಟಗಾರ ಲಸಿತ್​ ಮಲಿಂಗಾ, ಇಂಗ್ಲೆಂಡ್​ ವಿರುದ್ಧದ ಪಂದ್ಯದಲ್ಲಿ ಅದ್ಭುತ ಪ್ರದರ್ಶನ ತೋರುವ ಮೂಲಕ ಟೀಕಾಕಾರರಿಗೆ ಉತ್ತರ ನೀಡಿದ್ದಾರೆ.

ಲಂಡನ್: ನಿನ್ನೆ ನಡೆದ ಇಂಗ್ಲೆಂಡ್ ಮತ್ತು ಶ್ರೀಲಂಕಾ ನಡುವಿನ ವಿಶ್ವಕಪ್​ ಕ್ರಿಕೆಟ್​ ಪಂದ್ಯದಲ್ಲಿ ಅದ್ಭುತ ಪ್ರದರ್ಶನ ನೀಡಿ ಶ್ರೀಲಂಕಾ ತಂಡದ ಗೆಲುವಿಗೆ ಕಾರಣರಾದ ಲಸಿತ್​ ಮಲಿಂಗಾಗೆ ಬಾರಿ ಮೆಚ್ಚುಗೆ ವ್ಯಕ್ತವಾಗುತ್ತಿದೆ.

ಕಳೆದ ಕೆಲ ಪಂದ್ಯಗಳಲ್ಲಿ ಸರಿಯಾಗಿ ಬೌಲಿಂಗ್ ಪ್ರದರ್ಶನ ತೋರದ ಮಲಿಂಗಾರನ್ನ ಹಲವರು ಟೀಕಿಸಿದ್ದರು. ಇತ್ತೀಚೆಗೆ ತುಂಬಾ ದಪ್ಪಗಾಗಿರುವ ಮಲಿಂಗಾ ಕ್ರಿಕೆಟ್​ ಆಡಲು ಫಿಟ್ ಅಲ್ಲ. ನಿವೃತ್ತಿ ತೆಗೆದುಕೊಳ್ಳಬೇಕು ಎಂದು ಅಣಕಿಸಿದ್ದರು.

ಇಂಗ್ಲೆಂಡ್ ವಿರುದ್ಧದ ಪಂದ್ಯದಲ್ಲಿ ಪ್ರಮುಖ ನಾಲ್ವರು ಆಟಗಾರರ ವಿಕೆಟ್ ಪಡೆದ ಮಲಿಂಗಾ, ಲಂಕಾ ಗೆಲುವಿಗೆ ಕಾರಣರಾದ್ರು. ಮಲಿಂಗಾ ಹೊಟ್ಟೆ ಬಿಟ್ಟಿರುವ ಫೋಟೊ ಇನ್ಸ್​ಟಾಗ್ರಾಂನಲ್ಲಿ ಪೋಸ್ಟ್​ ಮಾಡಿರುವ ಶ್ರೀಲಂಕಾ ಮಾಜಿ ಕ್ರಿಕೆಟ್ ಆಟಗಾರ ಮಹೆಲ ಜಯವರ್ಧನೆ ಕಳೆದ ವಾರ ನಿನ್ನನ್ನು ಆಡಿಕೊಂಡವರಿಗೆ ತಕ್ಕ ಉತ್ತರ ನೀಡಿದ್ದೀಯಾ ಎಂದು ಬರೆದುಕೊಂಡಿದ್ದಾರೆ.

ನಿನ್ನೆ ನಡೆದ ಪಂದ್ಯದಲ್ಲಿ ಮಲಿಂಗಾ, ಜೋ ರೂಟ್ ವಿಕೆಟ್​ ಪಡೆಯುವ ಮೂಲಕ​ ವಿಶ್ವಕಪ್​ ಟೂರ್ನಿಯಲ್ಲಿ 50 ವಿಕೆಟ್​ ಪಡೆದ ನಾಲ್ಕನೇ ಅಟಗಾರ ಎಂಬ ದಾಖಲೆ ಬರೆದಿದ್ದಾರೆ.