ನಮ್ಮ ಆಟವನ್ನು ವಿಮರ್ಶಿಸಿ, ನಿಂದಿಸಬೇಡಿ: ಅಭಿಮಾನಿಗಳಿಗೆ ಪಾಕ್​ ನಾಯಕ ಮನವಿ

ನಮ್ಮ ಆಟವನ್ನು ವಿಮರ್ಶೆ ಮಾಡಿ, ಆದರೆ ಆಟಗಾರರನ್ನು ವೈಯಕ್ತಿಕವಾಗಿ ನಿಂದಿಸಬೇಡಿ ಎಂದು ಪಾಕ್​ ತಂಡದ ನಾಯಕ ಸರ್ಫರಾಜ್ ಅಹ್ಮದ್​ ಅಭಿಮಾನಿಗಳಿಗೆ ಮನವಿ ಮಾಡಿದ್ದಾರೆ.

ಲಂಡನ್: 2019ರ ವಿಶ್ವಕಪ್​ ಟೂರ್ನಿಯಲ್ಲಿ ಪಾಕಿಸ್ತಾನ ತಂಡ ನೀರಸ ಪ್ರದರ್ಶನ ತೋರುತ್ತಿದ್ದು, ಇದಕ್ಕೆ ಪಾಕ್​ ತಂಡದ ನಾಯಕ ಸರ್ಫರಾಜ್ ಅಹ್ಮದ್​ರನ್ನ ದೂಷಿಸಲಾಗುತ್ತಿದೆ. ಇತ್ತೀಚೆಗೆ ಪಾಕ್ ಅಭಿಮಾನಿಯೊಬ್ಬ ಸರ್ಫರಾಜ್‌​ರನ್ನ ಹಂದಿ ಎಂದು ಸಾರ್ವಜನಿಕವಾಗಿ ನಿಂದಿಸಿದ್ದ ಪ್ರಸಂಗ ನಡೆದಿತ್ತು.

ಇಂಥಾ ಮಾತುಗಳಿಂದ ಸರ್ಫರಾಜ್​ ಸಾಕಷ್ಟು ಬೇಸರಗೊಂಡಿದ್ದು ಆಟಗಾರರನ್ನು ನಿಂದಿಸಬೇಡಿ ಎಂದು ಅಭಿಮಾನಿಗಳಲ್ಲಿ ಮನವಿ ಮಾಡಿಕೊಂಡಿದ್ದಾರೆ. ಜನ ಸಾಮಾಜಿಕ ಜಾಲತಾಣಗಳನ್ನು ಬಳಸಿಕೊಂಡು ನಿಂದಿಸೋದು ಸಾಮಾನ್ಯವಾಗಿದೆ. ಅದನ್ನ ತಡೆಯೋಕೆ ನಮ್ಮಿಂದ ಸಾಧ್ಯವಿಲ್ಲ. ಒಂದು ಆಟದಲ್ಲಿ ಸೋಲು,ಗೆಲುವು ಸಾಮಾನ್ಯ. ಇಲ್ಲಿಯವರೆಗೆ ನಾವೊಬ್ಬರೇ ಸೋತಿಲ್ಲ, ಹಲವು ತಂಡಗಳು ಸೋಲು ಕಂಡಿವೆ ಎಂದಿದ್ದಾರೆ.

ಹಿಂದೆ ಒಂದು ತಂಡದ ಸೋಲನ್ನು ವಿಮರ್ಶಿಸಲಾಗುತ್ತಿತ್ತು, ಆದರೆ ಇಂದು ವಿಮರ್ಶೆಗಿಂತ ನಿಂದನೆಗಳೇ ಹೆಚ್ಚಾಗಿವೆ. ಇದು ಆಟಗಾರನ ಮನಸ್ಸಿಗೆ ತೀವ್ರ ಘಾಸಿ ಉಂಟುಮಾಡುತ್ತದೆ. ಅಭಿಮಾನಿಗಳು ನಮ್ಮ ಆಟವನ್ನು ವಿಮರ್ಶೆ ಮಾಡಲಿ, ಆದರೆ ನಿಂದಿಸೋದು ಸರಿಯಲ್ಲ ಎಂದು ಕೇಳಿಕೊಂಡಿದ್ದಾರೆ.

ದಕ್ಷಿಣ ಆಫ್ರಿಕಾ ವಿರುದ್ಧ ಗೆಲುವು ಕಂಡಿರುವ ಪಾಕಿಸ್ತಾನ ತಂಡ ಸೆಮಿಫೈನಲ್​ ಆಸೆಯನ್ನು ಜೀವಂತವಾಗಿರಿಸಿಕೊಂಡಿದ್ದು, ಇಂದು ನ್ಯೂಜಿಲೆಂಡ್​ ತಂಡವನ್ನ ಎದುರಿಸಲಿದೆ.