ಟೀಂ ಇಂಡಿಯಾ ನಾಯಕನಾಗಿ ಈ ದಾಖಲೆ ಬ್ರೇಕ್​ ಮಾಡ್ತಾರಾ ವಿರಾಟ್!​​

ಹಲವು ದಾಖಲೆಗಳನ್ನ ಬ್ರೇಕ್​ ಮಾಡಿರುವ ವಿರಾಟ್​ ಕೊಹ್ಲಿ, ವಿಶ್ವಕಪ್ ಟೂರ್ನಮೆಂಟ್​ನಲ್ಲಿರುವ ಮಹೇಲ್​ ಜಯವರ್ಧನೆ ಹೆಸರಲ್ಲಿರುವ ದಾಖಲೆಯನ್ನ ಬ್ರೇಕ್​​ ಮಾಡ್ತಾರಾ ಎಂಬ ಕುತೂಹಲ ಮೂಡಿದೆ.

ಲಂಡನ್​​​:ಕ್ರಿಕೆಟ್​ ಹಬ್ಬ ವಿಶ್ವಕಪ್​ ಟೂರ್ನಮೆಂಟ್​ಗೆ ಕೇವಲ 3 ದಿನ ಮಾತ್ರ ಬಾಕಿ ಇದ್ದು, ಕ್ರಿಕೆಟ್​ ಅಭಿಮಾನಿಗಳು ಕಾತರದಿಂದ ಕಾಯುತ್ತಿದ್ದಾರೆ. ಅದರಲ್ಲೂ ಟೀಂ ಇಂಡಿಯಾ ಮೇಲೆ ಅಭಿಮಾನಿಗಳು ಬೆಟ್ಟದಷ್ಟು ನಿರೀಕ್ಷೆ ಇಟ್ಟುಕೊಂಡಿದ್ದು ಈ ಬಾರಿ ಭಾರತ ವಿಶ್ವಕಪ್​ ಗೆದ್ದೇ ಗೆಲ್ಲುತ್ತದೆ ಎಂಬ ವಿಶ್ವಾಸದಲ್ಲಿದ್ದಾರೆ.

ವಿರಾಟ್​ ಕೊಹ್ಲಿ ನೇತೃತ್ವದಲ್ಲಿ ಭಾರತ ತಂಡ ವಿಶ್ವಕಪ್​ ಗೆಲ್ಲುವ ನೆಚ್ಚಿನ ತಂಡವಾಗಿದೆ. ಕಳೆದ ಕೆಲ ವರ್ಷಗಳಿಂದ ಉತ್ತಮ ಫಾರ್ಮ್​ನಲ್ಲಿರುವ ವಿರಾಟ್​ ಕೊಹ್ಲಿ ಉತ್ತಮ ಪ್ರದರ್ಶನ ತೋರಿದ್ರೆ ಭಾರತ ತಂಡಕ್ಕೆ ಗೆಲುವು ಪಕ್ಕಾ. ವಿರಾಟ್​ ಕೊಹ್ಲಿ ಬ್ಯಾಟ್​ ಬೀಸುವ ರಭಸಕ್ಕೆ ಅನೇಕ ದಾಖಲೆಗಳು ಧೂಳಿಪಟವಾಗಿದ್ದು, ಯಾವ ದಾಖಲೆಗಳು ಕೊಹ್ಲಿ ಮುಂದೆ ನಿಲ್ಲಲಾರವು. ಎಂಥಾ ಸಮಯದಲ್ಲಾದರೂ ಏಕಾಂಗಿಯಾಗಿ ತಂಡವನ್ನ ಗೆಲ್ಲಿಸುವ ಶಕ್ತಿ ವಿರಾಟ್​ ಕೊಹ್ಲಿಗಿದೆ.

ಈ ಬಾರಿ ಟೀಂ ಇಂಡಿಯಾ ನಾಯಕನಾಗಿ ತಂಡವನ್ನ ಮುನ್ನಡೆಸುತ್ತಿರುವ ಕೊಹ್ಲಿ ಮಹೇಲ್​ ಜಯವರ್ಧನೆ ದಾಖಲೆ ಬ್ರೇಕ್​ ಮಾಡ್ತಾರಾ ಎಂಬ ಕುತೂಹಲ ಮನೆ ಮಾಡಿದೆ. 2007ರ ವಿಶ್ವಕಪ್​ ಟೂರ್ನಮೆಂಟ್​ನಲ್ಲಿ ಶ್ರೀಲಂಕಾ ತಂಡದ ನಾಯಕನಾಗಿದ್ದ ಜಯವರ್ಧನೆ 60.88 ಸರಾಸರಿಯಲ್ಲಿ ಒಟ್ಟು 548 ರನ್​ ಗಳಿಸಿದ್ದರು. ಇದು ವಿಶ್ವಕಪ್​ ಟೂರ್ನಿಯಲ್ಲಿ ತಂಡದ ನಾಯಕ ಗಳಿಸಿದ ಅತಿ ಹೆಚ್ಚು ರನ್​ ಎಂಬ ದಾಖಲೆಯಾಗಿದೆ. ಇದೇ ಟೂರ್ನಿಯಲ್ಲಿ ಆಸ್ಟ್ರೇಲಿಯಾ ತಂಡದ ನಾಯಕನಾಗಿದ್ದ ರಿಕಿ ಪಾಂಟಿಂಗ್​​​ 539 ರನ್​ ಗಳಿಸಿದ್ದು, ಎರಡನೇ ಸ್ಥಾನದಲ್ಲಿದ್ದಾರೆ.

ಭರ್ಜರಿ ಫಾರ್ಮ್​ನಲ್ಲಿರುವ ವಿರಾಟ್​ ಈ ಬಾರಿ ಜಯವರ್ಧನೆ ಹೆಸರಲ್ಲಿರುವ ದಾಖಲೆಯನ್ನ ಬ್ರೇಕ್​ ಮಾಡ್ತಾರಾ? ಎಂಬ ಕುತೂಹಲ ಅಭಿಮಾನಿಗಳಲ್ಲಿ ಮೂಡಿದೆ.