ಯುವಿ ಅಭಿಮಾನಿಗಳಿಗೆ ಖುಷಿ ಸುದ್ದಿ... ಈ ಲೀಗ್​ನಲ್ಲಿ ಮತ್ತೆ ಅಬ್ಬರಿಸಲಿದ್ದಾರೆ ಸಿಕ್ಸರ್​ ಕಿಂಗ್​

ಮುಂದಿನ ತಿಂಗಳಿಂದ ಅಬುಧಾಬಿಯಲ್ಲಿ ನವೆಂಬರ್ 15-24ರ ವರೆಗೆ ನಡೆಯಲಿರುವ ಟಿ10 ಲೀಗ್​ನಲ್ಲಿ ಮರಾಠ ಅರೇಬಿಯನ್ಸ್​ ತಂಡ ಐಕಾನ್​ ಪ್ಲೇಯರ್​ ಆಗಿ ಯುವರಾಜ್​ ಸಿಂಗ್ ಬ್ಯಾಟ್​ ಬೀಸಲು ಸಜ್ಜಾಗಿದ್ದಾರೆ.

ಅಬುಧಾಬಿ:ಈಗಾಗಲೇ ಅಂತಾರಾಷ್ಟ್ರೀಯ ಕ್ರಿಕೆಟ್​ಗೆ ನಿವೃತ್ತಿ ಘೋಷಿಸಿರುವ ಸಿಕ್ಸರ್​ ಕಿಂಗ್​ ಯುವರಾಜ್​ ಸಿಂಗ್ ಮೈದಾನದಲ್ಲಿ​ ಮತ್ತೊಮ್ಮೆ ಬ್ಯಾಟ್​ ಹಿಡಿದು ಘರ್ಜಿಸಲಿದ್ದಾರೆ.

ಯುವರಾಜ್​ ಸಿಂಗ್​ ಅಂತಾರಾಷ್ಟ್ರೀಯ ಕ್ರಿಕೆಟ್​ನಿಂದ ನಿವೃತ್ತಿಯಾದ ಬಳಿಕ ಕೆನಡಾದಲ್ಲಿ ನಡೆದ ಗ್ಲೋಬಲ್ ಟಿ-20 ಟೂರ್ನಿಯಲ್ಲಿ ಭಾಗವಹಿಸಿದ್ದರು. ಆದರೆ, ಆ ಟೂರ್ನಿಯ ಬಳಿಕ ಯುವರಾಜ್​ ಬ್ಯಾಟ್​ ಹಿಡಿದಿರಲಿಲ್ಲ. ಆದರೆ, ಮುಂದಿನ ತಿಂಗಳಿಂದ ಅಬುಧಾಬಿಯಲ್ಲಿ ನವೆಂಬರ್ 15-24ರ ವರೆಗೆ ನಡೆಯಲಿರುವ ಟಿ10 ಲೀಗ್​ನಲ್ಲಿ ಮರಾಠ ಅರೇಬಿಯನ್ಸ್​ ತಂಡ ಐಕಾನ್​ ಪ್ಲೇಯರ್​ ಆಗಿ ಬ್ಯಾಟ್​ ಬೀಸಲು ಸಜ್ಜಾಗಿದ್ದಾರೆ.

ವೆಸ್ಟ್ ಇಂಡೀಸ್ ಮಾಜಿ ನಾಯಕ ಡ್ವೇನ್ ಬ್ರಾವೋ ನೇತೃತ್ವದಲ್ಲಿ ಯುವಿ ಮರಾಠ ಅರೇಬಿಯನ್ಸ್ ತಂಡದಲ್ಲಿ ಆಡಲಿದ್ದಾರೆ. ಇದೇ ತಂಡದಲ್ಲಿ ಯುವಿ ಜೊತೆ ಆಸ್ಟ್ರೇಲಿಯಾದ ಸ್ಫೋಟಕ ಬ್ಯಾಟ್ಸ್‌ಮನ್ ಕ್ರಿಸ್‌ ಲಿನ್‌, ಅಫ್ಘಾನಿಸ್ತಾನದ ಹಝರತುಲ್ಹ ಝಾಝೈ ಹಾಗೂ ನಜೀಬುಲ್ಲ ಝಾದ್ರನ್​, ಶ್ರೀಲಂಕಾ ಟಿ20 ತಂಡದ ನಾಯಕ ಲಸಿತ್ ಮಾಲಿಂಗ ಕೂಡ ಇದ್ದಾರೆ.

ಭಾರತದ ಜಹೀರ್ ಖಾನ್, ಮುನಾಫ್ ಪಟೇಲ್, ಪ್ರವೀಣ್ ಕುಮಾರ್, ಪ್ರವೀಣ್ ತಾಂಬೆ ಸೇರಿ 6-7 ಭಾರತೀಯ ಆಟಗಾರರು ಈಗಾಗಲೇ ಈ ಟೂರ್ನಿಯಲ್ಲಿ ಭಾಗವಹಿಸುತ್ತಿದ್ದಾರೆ. ವಿಂಡೀಸ್​ ಆಟಗಾರರು, ಆಸ್ಟ್ರೇಲಿಯಾ ಹಾಗೂ ಪಾಕಿಸ್ತಾನದ ಕೆಲವು ಸ್ಟಾರ್​ ಆಟಗಾರರು ಈ ಲೀಗ್​ನಲ್ಲಿ ಪಾಲ್ಗೊಳ್ಳಲಿದ್ದಾರೆ.