ಮ್ಯಾಂಚೆಸ್ಟರ್:ನಿನ್ನೆ ಟೀಂ ಇಂಡಿಯಾ ವಿರುದ್ಧ ನಡೆದ ಪಂದ್ಯದಲ್ಲಿ ಪಾಕ್ ತಂಡ ಹೀನಾಯ ಸೋಲು ಕಂಡಿದೆ. ಕೊಹ್ಲಿ ಪಡೆ ನೀಡಿದ್ದ 336ರನ್ಗಳ ಗುರಿ ಬೆನ್ನತ್ತಿದ್ದ ಪಾಕ್ ಬ್ಯಾಟಿಂಗ್ ವೈಫಲ್ಯ ಅನುಭವಿಸಿ ಸೋಲು ಕಾಣುವಂತಾಯಿತು.
ಪಾಕ್ ತಂಡ ಸೋಲು ಕಾಣುತ್ತಿದ್ದಂತೆ ಅಲ್ಲಿನ ಕ್ರೀಡಾಭಿಮಾನಿಗಳು ತಮ್ಮ ಕ್ರಿಕೆಟ್ ತಂಡದ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿ, ವಿವಿಧ ರೀತಿಯಲ್ಲಿ ಟ್ವೀಟ್ ಮಾಡಿದ್ದಾರೆ. ಇದರ ಮಧ್ಯೆ ಉಭಯ ತಂಡಗಳ ನಡುವೆ ಪಂದ್ಯ ಆರಂಭಗೊಳ್ಳುವುದಕ್ಕೂ ಮುಂಚಿತವಾಗಿ ಸರ್ಫರಾಜ್ ಅಹ್ಮದ್ ನಾಯಕತ್ವದ ಪ್ಲೇಯರ್ ಶೋಯೆಬ್ ಮಲಿಕ್ ತಮ್ಮ ಪತ್ನಿ ಸಾನಿಯಾ ಜತೆ ಹುಕ್ಕಾ ಬಾರ್ನಲ್ಲಿ ಮೋಜು - ಮಸ್ತಿ ಮಾಡಿದ್ದರು ಎಂಬ ಚರ್ಚೆವೊಂದು ನಡೆಯುತ್ತಿದೆ.
ಕ್ರೀಡಾಭಿಮಾನಿಗಳು ಪಾಕ್ ಕ್ರಿಕೆಟ್ ಪ್ಲೇಯರ್ ಹುಕ್ಕಾ ಬಾರ್ನಲ್ಲಿ ತಮ್ಮ ಪತ್ನಿಯೊಂದಿಗೆ ಮೋಜು-ಮಸ್ತಿ ಮಾಡುತ್ತಿದ್ದಾರು ಎನ್ನಲಾಗಿರುವ ಕೆಲವೊಂದು ಪೋಟೋ ಸಾಮಾಜಿಕ ಜಾಲತಾಣದಲ್ಲಿ ಶೇರ್ ಮಾಡಿದ್ದು, ಇದು ಭಾರಿ ಚರ್ಚೆಗೆ ಗ್ರಾಸವಾಗಿದೆ. ಮ್ಯಾಂಚೆಸ್ಟರ್ನ ಹೋಟೆಲ್ವೊಂದಲ್ಲಿ ಇವರು ಉಪಸ್ಥಿತರಿದ್ದರು ಎಂಬುದು ಈ ಪೋಟೋದಲ್ಲಿ ಕಂಡು ಬಂದಿದೆ. ಆದರೆ, ಇದು ಎಷ್ಟರ ಮಟ್ಟಿಗೆ ಸತ್ಯ ಎಂಬುದು ಗೊತ್ತಾಗಿಲ್ಲ. ಇನ್ನು ಕಾರ್ವೊಂದರಲ್ಲಿ ಶೋಯೆಬ್ ಮಲಿಕ್ ತನ್ನ ಪತ್ನಿ ಸಾನಿಯಾ ಜತೆ ಇರುವ ಫೋಟೋ ಕೂಡ ಶೇರ್ ಆಗಿದೆ.
ಪಾಕಿಸ್ತಾನ ಕ್ರಿಕೆಟ್ ಮಂಡಳಿ ವಿಶ್ವಕಪ್ನಲ್ಲಿ ಭಾಗಿಯಾಗಿರುವ ಪ್ಲೇಯರ್ಸ್ ಜತೆ ಪತ್ನಿಯರು ಉಳಿದುಕೊಳ್ಳಲು ಅವಕಾಶ ನೀಡಿದ್ದು, ಒಂದು ವೇಳೆ ಇವರು ಪಾರ್ಟಿಯಲ್ಲಿ ಭಾಗಿಯಾಗಿರಬಹುದು ಎಂಬ ಅನುಮಾನ ಮೂಡಿದೆ. ನಿನ್ನೆಯ ಪಂದ್ಯದಲ್ಲಿ ಶೋಯೆಬ್ ತಾವು ಎದುರಿಸಿದ ಮೊದಲ ಎಸೆತದಲ್ಲೇ ವಿಕೆಟ್ ಒಪ್ಪಿಸಿದರು.
