ದುಬೈ:ಭಾರತ ತಂಡದ ಯುವ ಬ್ಯಾಟ್ಸ್ಮನ್ ಕೆಎಲ್ ರಾಹುಲ್ ಮಾಜಿ ನಾಯಕ ಎಂಎಸ್ ಧೋನಿ ಬಗ್ಗೆ ಮೆಚ್ಚುಗೆಯ ಮಾತನಾಡಿದ್ದು, ಅವರ ತಾಳ್ಮೆ ಹಾಗೂ ಎಲ್ಲ ಆಟಗಾರರಿಂದ ಅತ್ಯುತ್ತಮವಾದುದನ್ನು ಹೊರತರಬೇಕೆನ್ನುವ ಅವರ ಗುಣ ನನಗೆ ಸ್ಪೂರ್ತಿ ಎಂದು ಹೇಳಿಕೊಂಡಿದ್ದಾರೆ.
ಎಂಎಸ್ ಧೋನಿ ಆಗಸ್ಟ್ 15 ಸ್ವಾತಂತ್ರ್ಯೋತ್ಸವದ ದಿನ ತಮ್ಮ 16 ವರ್ಷಗಳ ವೃತ್ತಿ ಜೀವನಕ್ಕೆ ತೆರೆ ಎಳೆದಿದ್ದಾರೆ. ಧೋನಿ ಕುರಿತು ತಮ್ಮ ಅಭಿಪ್ರಾಯವನ್ನು ವ್ಯಕ್ತಪಡಿಸಿರುವ ರಾಹುಲ್ ಧೋನಿ ಜೊತೆ ಕ್ರಿಕೆಟ್ ಆಡಿದ್ದೇನೆ ಎಂದು ಹೇಳಿಕೊಳ್ಳುವುದೇ ಒಂದು ದೊಡ್ಡ ಗೌರವ ಎಂದಿದ್ದಾರೆ.
" ಎಂಎಸ್ ಧೋನಿ ಅವರೊಂದಿಗೆ ಆಟವಾಡುವುದೇ ಒಂದು ದೊಡ್ಡ ಗೌರವ ಮತ್ತು ನಿತ್ಯವೂ ಒಂದು ದೊಡ್ಡ ಕಲಿಕೆಯಾಗಿರುತ್ತಿತ್ತು. ಅವರ ಜೊತೆಗೆ ಆಡಿರುವ ಕ್ಷಣಗಳನ್ನು ನನ್ನ ಜೀವನದ ಮತ್ತು ವೃತ್ತ್ತಿ ಜೀವನದ ಉಳಿದ ಭಾಗವನ್ನು ಒಂದು ಅಮೂಲ್ಯವಾದ ಕ್ಷಣ ಎಂದು ನಾನು ಪರಿಗಣಿಸುತ್ತೇನೆ. ಮೈದಾನದಲ್ಲಿ ಧೋನಿ ಜೊತೆ ನಾನು ಆಡಿರುವ ಕೆಲವು ಜೊತೆಯಾಟಗಳು ಇದರಲ್ಲಿ ಸೇರಿವೆ" ಎಂದು ಇಂಡಿಯನ್ ಪ್ರೀಮಿಯರ್ ಲೀಗ್ ತನ್ನ ಅಧಿಕೃತ ಟ್ವಿಟರ್ನಲ್ಲಿ ಬಿಡುಗಡೆ ಮಾಡಿರುವ ವಿಡಿಯೋದಲ್ಲಿ ರಾಹುಲ್ ಹೇಳಿಕೊಂಡಿದ್ದಾರೆ.