ವಿಂಡೀಸ್​ ತಂಡಕ್ಕೆ ಇಂಗ್ಲೆಂಡ್​ ನೆಲದಲ್ಲಿ 5 ದಿನಗಳ ಕಾಲ ಆಡುವ ಸಾಮರ್ಥ್ಯವಿಲ್ಲ: ಲಾರಾ ಮಾತಿನ ಮರ್ಮ?

ವೆಸ್ಟ್ ಇಂಡೀಸ್​ ತಂಡ ಮಾರಕವಾದ ಬೌಲಿಂಗ್​ ದಾಳಿ ಸಾಮರ್ಥ್ಯ ಹೊಂದಿದೆ. ಆದರೆ ಬ್ಯಾಟಿಂಗ್​ ವಿಭಾಗ ತುಂಬಾ ಕಳವಳಕಾರಿಯಾಗಿದೆ ಎಂದು 51 ವರ್ಷದ ವಿಂಡೀಸ್​ ಕ್ರಿಕೆಟ್ ದಿಗ್ಗಜ ಬ್ರಿಯಾನ್​ ಲಾರ್​ ಹೇಳಿದ್ದಾರೆ.

ಲಂಡನ್​:ಇಂಗ್ಲೆಂಡ್ ವಿರುದ್ಧ ಮುಂಬರುವ ಮೂರು ಪಂದ್ಯಗಳ ಟೆಸ್ಟ್​ ಸರಣಿಯನ್ನು ನಾಲ್ಕು ದಿನಗಳ ಪಂದ್ಯ ಪರಿಗಣಿಸಬೇಕೆಂದು ಬ್ಯಾಟಿಂಗ್​ ದಿಗ್ಗಜ ಬ್ರಿಯಾನ್ ಲಾರಾ ವಿಂಡೀಸ್​ ತಂಡಕ್ಕೆ ಕಿವಿಮಾತು ಹೇಳಿದ್ದಾರೆ. ಇಂಗ್ಲೆಂಡ್​ ನೆಲದಲ್ಲಿ 5 ದಿನ ಆಡುವಂತಹ ಸಾಮರ್ಥ್ಯವನ್ನು ತಂಡ ಹೊಂದಿಲ್ಲ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.

ಬ್ರಿಯಾನ್​ ಲಾರಾ

ಕೋವಿಡ್​ನಿಂದ ದೀರ್ಘ ವಿರಾಮದ ನಂತರ ಸೌತಂಪ್ಟನ್​ನಲ್ಲಿ ಇಂಗ್ಲೆಂಡ್​ ಮತ್ತು ವೆಸ್ಟ್​ ಇಂಡೀಸ್​ ನಡುವಿನ ಟೆಸ್ಟ್​ ಸರಣಿ ಬಯೋಸೆಕ್ಯೂರ್​ ತಾಣದಲ್ಲಿ ಜುಲೈ 8ರಿಂದ ಆರಂಭವಾಗುವ ಮೂಲಕ ವಿಶ್ವ ಕ್ರಿಕೆಟ್​ಗೆ ಮರುಚಾಲನೆ ಸಿಗುತ್ತಿದೆ.

ಅವರು (ವಿಂಡೀಸ್​) ತಕ್ಷಣವೇ ಪುಟಿದೇಳಲು ಸಮರ್ಥರಾಗಬೇಕು. ಏಕೆಂದರೆ ಇಂಗ್ಲೆಂಡ್​ ತಂಡವನ್ನು ತವರಿನಲ್ಲಿ ಸುಲಭವಾಗಿ ಸೋಲಿಸಲು ಸಾಧ್ಯವಿಲ್ಲ. ಅವರು ಅವರ ನೆಲದಲ್ಲಿ ಗೆಲ್ಲುವ ನೆಚ್ಚಿನ ತಂಡವಾಗಿದ್ದಾರೆ ಎಂದು ಲಾರಾ ಬಿಬಿಸಿಗೆ ನೀಡಿದ ಸಂದರ್ಶನದಲ್ಲಿ ಹೇಳಿದ್ದಾರೆ.

ಇಂಗ್ಲೆಂಡ್ ವಿರುದ್ಧ ವಿಂಡೀಸ್​ ತಂಡ 5 ದಿನಗಳ ಕಾಲ ಉಳಿಯಬಹುದು ಎಂದು ನಾನು ಭಾವಿಸಿಲ್ಲ. ಆದ್ದರಿಂದ ಅವರು ಈ ಪಂದ್ಯಗಳನ್ನು ನಾಲ್ಕು ದಿನಗಳ ಪಂದ್ಯ ಎಂದೇ ಪರಿಗಣಿಸಬೇಕು. ಮತ್ತು ಇದರಲ್ಲೇ ಮುನ್ನಡೆ ಪಡೆದು ಉಳಿಸಿಕೊಳ್ಳಬೇಕಿದೆ ಎಂದಿದ್ದಾರೆ.

ವಿಂಡೀಸ್​ ಪರ 131 ಟೆಸ್ಟ್​ ಪಂದ್ಯಗಳಲ್ಲಿ 11,953 ರನ್ ​ಗಳಿಸಿರುವ ಲಾರಾ, ಇಂಗ್ಲಿಷ್​ ವಾತಾವರಣಕ್ಕೆ ಒಗ್ಗಿಕೊಳ್ಳಬಹುದಾದ ಗುಣ ವಿಂಡೀಸ್ ತಂಡಕ್ಕಿರಬೇಕು ಎಂದಿದ್ದಾರೆ.

1988ರ ಬಳಿಕ ಇಂಗ್ಲೆಂಡ್​ ನೆಲದಲ್ಲಿ ವಿಂಡೀಸ್​ ತಂಡ ಟೆಸ್ಟ್​ ಸರಣಿ ಗೆದ್ದಿಲ್ಲ. ಆದರೂ ಎರಡೂ ತಂಡಗಳ ನಡುವೆ ಸಮಬಲದ ಪೈಪೋಟಿ ನಿರೀಕ್ಷೆ ಇದೆ. ವಿಂಡೀಸ್​ ತಂಡ ಗೆಲ್ಲಬೇಕಾದರೆ ಮೊದಲ ಪಂದ್ಯದ ಮೊದಲ ದಿನದಿಂದಲೇ ಉತ್ತಮ ಪ್ರದರ್ಶನ ನೀಡಬೇಕು ಎಂದು ತಿಳಿಸಿದ್ದಾರೆ.