ಮುಂಬೈ: ಕೊರೊನಾ ವೈರಸ್ ದೇಶದೆಲ್ಲೆಡೆ ದಿನದಿಂದ ದಿನಕ್ಕೆ ಕೊರೊನಾ ವೈರಸ್ ಭೀತಿ ಹೆಚ್ಚಾಗುತ್ತಿರುವ ಹಿನ್ನೆಲೆಯಲ್ಲಿ ಈ ವರ್ಷ ವಿಜಯ್‌ ಹಜಾರೆ, ದುಲೀಪ್ ಮತ್ತು ದೇವಧರ್ ಟ್ರೋಫಿ ಕ್ರಿಕೆಟ್ ಟೂರ್ನಿಗಳನ್ನು ರದ್ದು ಪಡಿಸಿ, ಆ ಸಮಯದಲ್ಲಿ ಪೂರ್ಣ ಪ್ರಮಾಣದ ರಣಜಿ ಮತ್ತು ಸಯ್ಯದ್ ಮುಷ್ತಾಕ್ ಅಲಿ ಟೂರ್ನಮೆಂಟ್ಗಳನ್ನು ನಡೆಸಬೇಕು ಎಂದು ಭಾರತ ಟೆಸ್ಟ್‌ ತಂಡದ ಮಾಜಿ ಆರಂಭಿಕ ಬ್ಯಾಟ್ಸ್‌ಮನ್‌ ವಾಸಿಮ್ ಜಾಫರ್ ಹೇಳಿದ್ದಾರೆ.
ಮುಂಬೈ ಲೆಜೆಂಡ್ ಪ್ರಕಾರ ಹೀಗೆ ಮಾಡುವುದರಿಂದ ಟೂರ್ನಮೆಂಟ್ಗಳ ನಡುವೆ ಸಾಕಷ್ಟು ಸಮಾಯವಕಾಶ ದೊರೆಯುತ್ತಿದೆ. ಇದರಿಂದ ಆಟಗಾರರಿಗೂ ವಿಶ್ರಾಂತಿ ಸಿಗುತ್ತದೆ ಎಂಬುದು ಜಾಫರ್ ಅಭಿಪ್ರಾಯವಾಗಿದೆ.
ದೇಶೀಯ ಕ್ರಿಕೆಟ್ ಋತುವನ್ನ ಆಗಸ್ಟ್ನಲ್ಲಿ ಆರಂಭಿಸುವ ನಿರೀಕ್ಷೆಯಿತ್ತು. ಆದರೆ, ಕೊರೊನಾ ವೈರಸ್ ದಿನದಿನಕ್ಕೆ ಹೆಚ್ಚಾಗುತ್ತದೆ. ಕ್ರಿಕೆಟ್ ಚಟುವಟಿಕೆಗಳನ್ನು ಪುನಾರಂಭಿಸಲು ಬಿಸಿಸಿಐ ಕಾದು ನೋಡುವ ನೀತಿಯನ್ನು ಅಳವಡಿಸಿಕೊಂಡಿದೆ.
"ಕ್ರಿಕೆಟ್ ಯಾವತ್ತಾದರೂ ಆರಂಭಗೊಳ್ಳಲಿ ಮೊದಲು ಐಪಿಎಲ್ ಟೂರ್ನಿ ಆಯೋಜನೆಗೆ ಬಿಸಿಸಿಐ ಮೊದಲ ಆದ್ಯತೆ ನೀಡಬೇಕು. ಐಪಿಎಲ್ ಟೂರ್ನಿಯಿಂದಲೇ ಭಾರತದ ಕ್ರಿಕೆಟ್ ಋತುವನ್ನು ಬಿಸಿಸಿಐ ಆರಂಭಿಸಬಹುದು. ಐಪಿಎಲ್ ಮುಗಿದ ಬಳಿಕ ಬಿಸಿಸಿಐ ದೇಶಿ ಕ್ರಿಕೆಟ್ ಕೂಟಗಳನ್ನು ಆರಂಭಿಸಬೇಕು" ಎಂದು ಸುದ್ದಿ ಏಜೆನ್ಸಿಗೆ ನೀಡಿದ ಸಂದರ್ಶನದಲ್ಲಿ ಜಾಫರ್ ತಿಳಿಸಿದ್ದಾರೆ
ಐಪಿಎಲ್ ಮುಗಿದ ತಕ್ಷಣ ಬಿಸಿಸಿಐ ಇರಾನಿ ಕಪ್ನಿಂದ ತನ್ನ ದೇಶಿ ಋತುವನ್ನ ಆರಂಭಿಸಬೇಕು. ಏಕೆಂದರೆ ಇದೇ ಮೊದಲ ಬಾರಿ ರಣಜಿ ಚಾಂಪಿಯನ್ ಆಗಿರುವುದರಿಂದ ಸೌರಾಷ್ಟ್ರ ತಂಡ ಆ ಟೂರ್ನಿ ಆಡಲು ಅರ್ಹವಾಗಿದೆ ಎಂದಿದ್ದಾರೆ.
ನಂತರ ನಾವು ರಣಜಿ ಟ್ರೋಫಿ ಆಯೋಜಿಸಬಹುದು. ಮುಂದಿನ ವರ್ಷದ ಐಪಿಎಲ್ ಹರಾಜು ಗಮನದಲ್ಲಿಟ್ಟುಕೊಂಡು ಸಯ್ಯದ್ ಮುಷ್ತಾಕ್ ಅಲಿ ಟೂರ್ನಮೆಂಟ್ಗೆ ಅವಕಾಶ ನೀಡಬೇಕು.
ಹಾಗೆಯೇ ಆಟಗಾರರಿಗೆ ವಿಶ್ರಾಂತಿ ಒದಗಿಸಿಕೊಡಲು ದುಲೀಪ್ ಟ್ರೋಫಿ, ದೇವಧರ್ ಟ್ರೋಫಿ ಕೂಟಗಳನ್ನು ಕೈಬಿಡುವುದು ಒಳ್ಳೆಯದು ಎಂದು ಜಾಫರ್ ಹೇಳಿದ್ದಾರೆ.
