ಎಲ್ಲಾ ಮಾದರಿ ಕ್ರಿಕೆಟ್​ಗೆ ರಣಜಿ ಕಿಂಗ್​ ವಾಸೀಂ ಜಾಫರ್ ವಿದಾಯ

ರಣಜಿ ಕ್ರಿಕೆಟ್​ನ ಕಿಂಗ್​ ಎಂದೇ ಪ್ರಖ್ಯಾತರಾಗಿದ್ದ ಟೀಂ ಇಂಡಿಯಾ ಮಾಜಿ ಆಟಗಾರ ವಾಸೀಂ ಜಾಫರ್​ ತಮ್ಮ 42ನೇ ವಯಸ್ಸಿನಲ್ಲಿ ಎಲ್ಲಾ ಮಾದರಿಯ ಕ್ರಿಕೆಟ್​​ಗೆ ನಿವೃತ್ತಿ ಘೋಷಿಸಿದ್ದಾರೆ.

ಮುಂಬೈ: ಟೀಂ ಇಂಡಿಯಾದ ಮಾಜಿ ಕ್ರಿಕೆಟರ್​ ವಾಸೀಂ ಜಾಫರ್​ ಎಲ್ಲಾ ಮಾದರಿ ಕ್ರಿಕೆಟ್​ಗೆ ಗುಡ್‌ಬೈ ಹೇಳಿದ್ದಾರೆ. ಈ ಕುರಿತು ಮಾತನಾಡಿರುವ ಅವರು, ಭಾರತ ತಂಡವನ್ನು ಪ್ರತಿನಿಧಿಸಬೇಕೆಂಬುದು ನನ್ನ ತಂದೆ ಕಂಡಿದ್ದ ಕನಸಾಗಿತ್ತು. ಈ ಕನಸು ನನಸು ಮಾಡಿರುವ ಖುಷಿ ನನಗಿದೆ ಎಂದಿದ್ದಾರೆ.

ರಣಜಿ ಕಿಂಗ್​ ವಾಸೀಂ ಜಾಫರ್​

42 ವರ್ಷದ ವಾಸೀಂ ಜಾಫರ್​, ಟೀಂ ಇಂಡಿಯಾ ಪರ 31 ಟೆಸ್ಟ್​ ಪಂದ್ಯಗಳನ್ನಾಡಿದ್ದು ಈ ಮೂಲಕ 1,944 ರನ್ ಕಲೆ ಹಾಕಿದ್ದಾರೆ. ಇದರಲ್ಲಿ 5 ಶತಕ ಹಾಗೂ 11 ಅರ್ಧಶತಕ ಸೇರಿದೆ. ವೆಸ್ಟ್​ ಇಂಡೀಸ್​ ವಿರುದ್ಧ ಸಿಡಿಸಿರುವ 212 ರನ್​​ ಇವರ ವೈಯಕ್ತಿಕ ಗರಿಷ್ಠ ಸ್ಕೋರ್​ ಆಗಿದೆ. 2006ರಲ್ಲಿ ಭಾರತ ಪರ ಟೆಸ್ಟ್​ಗೆ ಪದಾರ್ಪಣೆ ಮಾಡಿದ್ದ ಈ ಆಟಗಾರ​ ದಕ್ಷಿಣ ಆಫ್ರಿಕಾ ವಿರುದ್ಧ ಮೊದಲ ಪಂದ್ಯವನ್ನಾಡಿದ್ದರು.

ರಣಜಿ ಕ್ರಿಕೆಟ್​ನಲ್ಲಿ ಹೊಸ ದಾಖಲೆ ನಿರ್ಮಿಸಿರುವ ಜಾಫರ್,​​ 1996 ರಿಂದ 2020ರವರೆಗೆ 150ಕ್ಕೂ ಹೆಚ್ಚು ರಣಜಿ ಪಂದ್ಯಗಳನ್ನಾಡಿದ್ದಾರೆ. ಈ ಪಂದ್ಯಗಳಲ್ಲಿ 12 ಸಾವಿರ ರನ್​ ಸಾಧನೆ ಮಾಡಿದ್ದಾರೆ. ರಣಜಿ ಕ್ರಿಕೆಟ್​​ನಲ್ಲಿ ಇಷ್ಟೊಂದು ರನ್​ ಮಾಡಿರುವ ಮೊದಲ ಆಟಗಾರ ಎಂಬ ದಾಖಲೆಯೂ ಇವರ ಹೆಸರಲ್ಲಿದೆ.

ರಣಜಿ ಕಿಂಗ್​ ವಾಸೀಂ ಜಾಫರ್​

ರಣಜಿಯಲ್ಲಿ ವಿದರ್ಭ ಹಾಗೂ ಮುಂಬೈ ತಂಡಗಳನ್ನು ಪ್ರತಿನಿಧಿಸಿದ್ದು​​ ಟೀಂ ಇಂಡಿಯಾ ಪರ ಎರಡು ಏಕದಿನ ಪಂದ್ಯಗಳಲ್ಲೂ ಇವರು ಕಾಣಿಸಿಕೊಂಡಿದ್ದರು. 260 ಪ್ರಥಮ ದರ್ಜೆ ಕ್ರಿಕೆಟ್​ ಆಡಿರುವ ವಾಸೀಂ ಜಾಫರ್​​ ಬರೋಬ್ಬರಿ 19,410 ರನ್​ಗಳಿಕೆ ಮಾಡಿದ್ದು, ಇದರಲ್ಲಿ 57 ಶತಕ ಹಾಗೂ 91 ಅರ್ಧಶತಕ ಸೇರಿದೆ. 314 ಅವರ ವೈಯಕ್ತಿಕ ಗರಿಷ್ಠ ಸ್ಕೋರ್​ ಆಗಿದೆ.