ದುಬೈ: ಹ್ಯಾಟ್ರಿಕ್ ಗೆಲುವಿನೊಂದಿಗೆ ಮುನ್ನುಗ್ಗುತ್ತಿರುವ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಇಂದು ಡೆಲ್ಲಿ ಕ್ಯಾಪಿಟಲ್ ಸವಾಲನ್ನು ಎದುರಿಸುತ್ತಿದೆ.
ಎರಡು ತಂಡಗಳು 13ನೇ ಆವೃತ್ತಿಯಲ್ಲಿ 3 ಗೆಲುವು ಹಾಗೂ 1 ಸೋಲು ಪಡೆದಿವೆ. ಅಂಕಪಟ್ಟಿಯಲ್ಲಿ ಡೆಲ್ಲಿ ರನ್ರೇಟ್ ಆಧಾರದ ಮೇಲೆ 2ನೇ ಸ್ಥಾನ ಪಡೆದುಕೊಂಡಿದ್ರೆ, ರಾಯಲ್ ಚಾಲೆಂಜರ್ಸ್ 3ನೇ ಸ್ಥಾನ ಪಡೆದುಕೊಂಡಿದೆ.
ಈ ಪಂದ್ಯದಲ್ಲಿ ಆರ್ಸಿಬಿ ನಾಯಕ ವಿರಾಟ್ ಕೊಹ್ಲಿ ಮಹತ್ವದ ದಾಖಲೆಯೊಂದಕ್ಕೆ ಪಾತ್ರರಾಗಲಿದ್ದಾರೆ. ಕೊಹ್ಲಿ ಇಂದಿನ ಪಂದ್ಯದಲ್ಲಿ ಕೇವಲ 10ರನ್ಗಳಿಸಿದ್ರೆ, ಟಿ-20 ಕ್ರಿಕೆಟ್ನಲ್ಲಿ 9 ಸಾವಿರ ರನ್ ಪೂರೈಸಲಿದ್ದಾರೆ. ಈಗಾಗಲೇ ಕೊಹ್ಲಿ 285 ಪಂದ್ಯಗಳಿಂದ 8,990 ರನ್ಗಳಿಸಿದ್ದಾರೆ. (ಅಂತಾರಾಷ್ಟ್ರೀಯ ಮತ್ತು ಇತರೆ ಟಿ-20) ಈ ಮೂಲಕ ಈ ಸಾಧನೆ ಮಾಡಿದ ಭಾರತದ ಮೊದಲ ಬ್ಯಾಟ್ಸ್ಮನ್ ಎಂಬ ದಾಖಲೆಗೆ ಪಾತ್ರರಾಗಲಿದ್ದಾರೆ.
ವೆಸ್ಟ್ ಇಂಡೀಸ್ನ ಕ್ರಿಸ್ ಗೇಲ್ 404 ಪಂದ್ಯಗಳಿಂದ 13,296 ರನ್ಗಳಿಸಿ ಗರಿಷ್ಠ ಸ್ಕೋರರ್ ಎನಿಸಿಕೊಂಡಿದ್ದಾರೆ. ಪೊಲಾರ್ಡ್,10370 , ಶೋಯಬ್ ಮಲಿಕ್ 9926 ಮೆಕ್ಕಲಮ್ 9922, ಡೇವಿಡ್ ವಾರ್ನರ್ 9451 ಹಾಗೂ ಆ್ಯರೋನ್ ಫಿಂಚ್ 9148 ರನ್ಗಳಿಸಿ ಕೊಹ್ಲಿಗಿಂತ ಮುಂದಿದ್ದಾರೆ.