ಪುರುಷರಿಗೆ ಕೋಟಿ, ಮಹಿಳಾ ಕ್ರಿಕೆಟರ್​ಗೆ ಲಕ್ಷ.. ಬಿಸಿಸಿಐ ವೇತನ ಶ್ರೇಣಿ ಬಗ್ಗೆ ಸ್ಮೃತಿ ಮಂದಾನ ಹೀಗಂದರು..

ಪುರುಷ ಕ್ರಿಕೆಟಿಗರು ಎ+ ಗ್ರೇಡ್​ನಲ್ಲಿರುವವರು 7 ಕೋಟಿ ಪಡೆದರೆ, ಮಹಿಳೆಯರ ಗರಿಷ್ಠ ಗ್ರೇಡ್ ಆದ ಎ ಗ್ರೇಡ್​ನಲ್ಲಿರುವವರು ₹50 ಲಕ್ಷ ಪಡೆಯುತ್ತಿದ್ದಾರೆ. ಪುರುಷರ ಎ ಗ್ರೇಡ್​ ಕ್ರಿಕೆಟಿಗರು 5 ಕೋಟಿ, ಬಿ ಗ್ರೇಡ್ ಕ್ರಿಕೆಟಿಗರು 3 ಕೋಟಿ ಹಾಗೂ ಸಿ ಗ್ರೇಡ್​ನಲ್ಲಿರುವವರು 1 ಕೋಟಿ ಪಡೆಯುತ್ತಿದ್ದಾರೆ.

ಮುಂಬೈ: ಬಿಸಿಸಿಐ ವಾರ್ಷಿಕ ಗುತ್ತಿಗೆಯಲ್ಲಿ ಪುರುಷ ಕ್ರಿಕೆಟಿಗರು ಕೋಟಿಗಟ್ಟಲೆ ಹಣ ಪಡೆಯುತ್ತಿದ್ದಾರೆ. ಆದರೆ, ಮಹಿಳಾ ಕ್ರಿಕೆಟಿಗರು ಮಾತ್ರ ಗರಿಷ್ಠ ₹50 ಲಕ್ಷ ಪಡೆಯುತ್ತಿರುವುದಕ್ಕೆ ಭಾರತ ತಂಡದ ಸ್ಟಾರ್​ ಆಟಗಾರ್ತಿ ಮಂದಾನ ಬಿಸಿಸಿಐ ವೇತನ ನೀತಿಯಿಂದ ಯಾವುದೇ ಬೇಸರವಿಲ್ಲ ಎಂದು ಹೇಳಿದ್ದಾರೆ.

ವರ್ಷದ ಐಸಿಸಿ ಕ್ರಿಕೆಟರ್​ ಪ್ರಶಸ್ತಿ ಪಡೆದಿರುವ ಸ್ಮೃತಿ ಮಂದಾನ ಇತ್ತೀಚೆಗೆ ಬಿಸಿಸಿಐ ಘೋಷಣೆ ಮಾಡಿರುವ ವಾರ್ಷಿಕ ಗುತ್ತಿಗೆಯಲ್ಲಿ ಪುರುಷ ಕ್ರಿಕೆಟಿಗರಿಗೆ ಕೋಟಿಗಟ್ಟಲೆ ಹಣ ನೀಡುತ್ತಿದೆ. ಮಹಿಳಾ ಕ್ರಿಕೆಟಿಗರಿಗೆ ಇನ್ನೂ ಲಕ್ಷಗಳಲ್ಲೇ ವೇತನ ನೀಡುತ್ತಿರುವುದರ ಬಗ್ಗೆ ಖಾಸಗಿ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಮಾತನಾಡಿದ್ದಾರೆ.

"ವೇತನದ ಬಗ್ಗೆ ಮಾತನಾಡುವ ಮೊದಲು ಪುರುಷ ಕ್ರಿಕೆಟ್​ನಿಂದ ಬರುತ್ತಿರುವ ಆದಾಯವೆಷ್ಟು, ಮಹಿಳಾ ಕ್ರಿಕೆಟ್​ನಿಂದ ಬರುವ ಆದಾಯವೆಷ್ಟು ಎಂದು ತಿಳಿದುಕೊಳ್ಳಬೇಕು. ಮಹಿಳೆಯರ ಕ್ರಿಕೆಟ್​ನಿಂದ ಆದಾಯ ಬರುವಂತಾದರೆ ವೇತನದ ಬಗ್ಗೆ ಧ್ವನಿಯೆತ್ತುವ ಮೊದಲ ಮಹಿಳೇ ನಾನಾಗಿರುತ್ತೇನೆ. ಸದ್ಯದ ಪರಿಸ್ಥಿರಿಯಲ್ಲಿ ಪುರುಷರಿಗೆ ನೀಡುವಷ್ಟು ಹಣವನ್ನು ನಮಗೂ ನೀಡಿ ಎಂದು ಹೇಳಲು ಸಾಧ್ಯವಿಲ್ಲ' ಎಂದು ತಿಳಿಸಿದ್ದಾರೆ.

ಪುರುಷ ಕ್ರಿಕೆಟಿಗರು ಎ+ ಗ್ರೇಡ್​ನಲ್ಲಿರುವವರು 7 ಕೋಟಿ ಪಡೆದರೆ, ಮಹಿಳೆಯರ ಗರಿಷ್ಠ ಗ್ರೇಡ್ ಆದ ಎ ಗ್ರೇಡ್​ನಲ್ಲಿರುವವರು 50 ಲಕ್ಷ ಪಡೆಯುತ್ತಿದ್ದಾರೆ. ಪುರುಷರ ಎ ಗ್ರೇಡ್​ ಕ್ರಿಕೆಟಿಗರು 5 ಕೋಟಿ, ಬಿ ಗ್ರೇಡ್ ಕ್ರಿಕೆಟಿಗರು 3 ಕೋಟಿ ಹಾಗೂ ಸಿ ಗ್ರೇಡ್​ನಲ್ಲಿರುವವರು ₹1 ಕೋಟಿ ಪಡೆಯುತ್ತಿದ್ದಾರೆ.

ಮಹಿಳೆಯರಲ್ಲಿ ಬಿ ಗ್ರೇಡ್​ನಲ್ಲಿರುವವರು 30 ಲಕ್ಷ ಹಾಗೂ ಸಿ ಗ್ರೇಡ್​ನಲ್ಲಿರುವವರು ₹10 ಲಕ್ಷ ಪಡೆಯಲಿದ್ದಾರೆ. 'ನಮ್ಮ ತಂಡದಲ್ಲಿರುವ ಯಾವ ಆಟಗಾರ್ತಿಯರು ವೇತನದ ಬಗ್ಗೆ ಚಿಂತಿಸುತ್ತಿಲ್ಲ. ಸದ್ಯಕ್ಕೆ ನಾವು ಭಾರತಕ್ಕೆ ಹೆಚ್ಚು ಪಂದ್ಯಗಳಲ್ಲಿ ಗೆಲುವು ತಂದುಕೊಡಬೇಕು. ಹೆಚ್ಚು ವೀಕ್ಷಕರು ಕ್ರೀಡಾಂಗಣಕ್ಕೆ ಬರಬೇಕು, ಹೆಚ್ಚು ಆದಾಯ ಬರಬೇಕು.ಇದೇ ನಮ್ಮ ಮುಂದಿರುವ ಗುರಿ, ಇದೆಲ್ಲಾ ನಡೆದರೆ ನಮಗೆ ಸೇರಬೇಕಾಗಿರುವುದು ಬಂದು ಬೀಳಲಿದೆ' ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಪ್ರಸ್ತುತ ಆಟದ ಕಡೆ ಗಮನ ನೀಡಿ ಉತ್ತಮ ಪ್ರದರ್ಶನ ನೀಡಬೇಕಿದೆ. ನಮಗೆ ಪುರುಷರಿಗೆ ಸಮನಾಗಿ ವೇತನ ನೀಡಿ ಎಂದು ಕೇಳುವುದು ಸರಿಯಲ್ಲ. ಹಾಗಾಗಿ ವೇತನ ಅಂತರದ ಬಗ್ಗೆ ನಾನು ಯಾವುದೇ ರೀತಿಯ ಹೇಳಿಕೆ ನೀಡಲು ಬಯಸುವುದಿಲ್ಲ ಎಂದು ಮಂದಾನ ತಿಳಿಸಿದ್ದಾರೆ.