ಮುಂಬೈ:ಮುಂಬೈನ ಶಿವಾಜಿ ಪಾರ್ಕ್ ಜಿಮ್ಖಾನದಲ್ಲಿ ನಡೆಯುತ್ತಿದ್ದ ಆಟಗಾರರ ಆಯ್ಕೆಯ ಸಂದರ್ಭದಲ್ಲಿ ಬ್ಯಾಟ್ಸ್ಮನ್ ಆಗಬೇಕೆಂದು ಬಹುದೊಡ್ಡ ಸರದಿ ಸಾಲಿನಲ್ಲಿ ನಿಂತಿದ್ದ ಯುವಕ ತುಷಾರ್ ದೇಶಪಾಂಡೆ ಇಂದು ಐಪಿಎಲ್ನಲ್ಲಿ ವೇಗದ ಬೌಲರ್ ಆಗಿ ಕ್ರಿಕೆಟ್ ಗಮನ ಸೆಳೆಯುತ್ತಿದ್ದಾರೆ.
25 ವರ್ಷದ ಬೌಲರ್ ಬುಧವಾರ ನಡೆದ ರಾಜಸ್ಥಾನ ರಾಯಲ್ಸ್ ವಿರುದ್ಧ ಡೆಲ್ಲಿ ಕ್ಯಾಪಿಟಲ್ಸ್ 13 ರನ್ಗಳ ರೋಚಕ ಜಯ ಸಾಧಿಸಲು ನೆರವಾಗಿದ್ದರು. ಅವರು ನಿನ್ನೆಯ ಪಂದ್ಯದಲ್ಲಿ 37 ರನ್ ನೀಡಿ 2 ವಿಕೆಟ್ ಪಡೆದು ಮಿಂಚಿದ್ದರು.
ಅಕ್ಷರ್ ಪಟೇಲ್ ಜೊತೆ ತುಷಾರ್ ನಿನ್ನೆಯ ವರೆಗೂ ಕ್ರಿಕೆಟ್ ಜಗತ್ತಿನಲ್ಲಿ ಅವರ ಹೆಸರೇ ಕೇಳದಿದ್ದ ಅದೆಷ್ಟೋ ಅಭಿಮಾನಿಗಳು ಇಂದು ಅವರ ಬಗ್ಗೆ ಮೆಚ್ಚುಗೆ ಮಾತನಾಡುತ್ತಿದ್ದಾರೆ. ಆದರೆ, ಈ ಯುವಕನ ಕ್ರಿಕೆಟ್ ಜರ್ನಿ ಮಾಮೂಲಿ ಕ್ರಿಕೆಟಿಗರಿಗಿಂತ ಭಿನ್ನವಾಗಿದೆ, ಏಕೆಂದರೆ ಆತ ಕ್ರಿಕೆಟ್ನಲ್ಲಿ ಬ್ಯಾಟ್ಸ್ಮನ್ ಆಗಬೇಕೆಂದು ಬಂದಿದ್ದ, ಆದರೆ ಆಗಿದ್ದ ಮಾತ್ರ ವೇಗದ ಬೌಲರ್. ದೇಶ ಪಾಂಡೆ ಕುರಿತು ಆಸಕ್ತಿದಾಯಕ ಮಾಹಿತಿ ಅವರೇ ತಿಳಿಸಿದ್ದಾರೆ.
2007ರಲ್ಲಿ, ನಾನು ನನ್ನ ನಾಲ್ವರು ಗೆಳೆಯರೊಂದಿಗೆ ಕಲ್ಯಾಣದಿಂದ ಶಿವಾಜಿ ಪಾರ್ಕ್ ಜಿಮ್ಖಾನದ ಬಿಪಿಎಲ್ ಲೂಪ್ ಅಕಾಡೆಮಿಗೆ ಸೇರಲು ಹೋಗಿದ್ದೆವು. ಅಲ್ಲಿ ಬ್ಯಾಟ್ಸ್ಮನ್ಗಳ ಸರದಿ ದೊಡ್ಡದಾಗಿತ್ತು. ಸುಮಾರು 40 ಜನರಿದ್ದ ಸರದಿಯಲ್ಲಿ 20-25 ಬ್ಯಾಟ್ಸ್ಮನ್ಗಳು ಪ್ಯಾಡ್ ಕಟ್ಟಿ ನಿಂತಿದ್ದರು.
ಆದರೆ, ಬೌಲರ್ಗಳ ಸಾಲಿನಲ್ಲಿ ಕೇವಲ 15ರಿಂದ 20 ಆಕಾಂಕ್ಷಿಗಳಿದ್ದರು. ಆಗ ಸಮಯ 3 ಗಂಟೆಯಾಗಿತ್ತು. 6ರಿಂದ 6:30 ವರೆಗೆ ಆಯ್ಕೆ ಪ್ರಕ್ರಿಯೆ ನಡೆಯುತ್ತಿತ್ತು. ಹಾಗಾಗಿ ಬ್ಯಾಟ್ಸ್ಮನ್ಗಳ ಸಾಲು ತುಂಬಾ ದೊಡ್ಡದಿರುವುದರಿಂದ ನನಗೆ ಅವಕಾಶ ಸಿಗುವುದು ಕಡಿಮೆ ಎಂದು ಆಲೋಚಿಸಿ, ಬರಿಗೈಯಲ್ಲಿ ಮನೆಗೆ ತೆರಳಲು ಇಷ್ಟವಿಲ್ಲದೇ ಬೌಲರ್ಗಳ ಲೈನ್ನಲ್ಲಿ ನಿಂತೆ ಎಂದು ಮರಾಠಿ ಕಾರ್ಯಕ್ರಮದಲ್ಲಿ ಹೇಳಿಕೊಂಡಿದ್ದಾರೆ.
ನಂತರ ತಮ್ಮ ಆಯ್ಕೆ ಪ್ರಕ್ರಿಯೆ ಬಗ್ಗೆ ಮಾತನಾಡುತ್ತಾ, ಅಲ್ಲಿ ಬೌಲರ್ ಲೈನ್ ವೇಗವಾಗಿ ಚಲಿಸಿತು. ಅದೃಷ್ಟವಶಾತ್ ನಾನು ಬೌಲಿಂಗ್ ಮಾಡುವ ವೇಳೆಗೆ ಹೊಸ ಬಾಲ್ ಪಡೆದುಕೊಂಡೆ. ನಂತರ ಬೌಲಿಂಗ್ ಮಾಡಿದೆ, ಅದು ಅದ್ಭುತ ಔಟ್ಸ್ವಿಂಗ್ ಆಗಿತ್ತು. ಅದನ್ನು ನೋಡಿದ ಪ್ಯಾಡಿ ಸರ್( ಪದ್ಮಾಕರ್ ಶಿವಾಲ್ಕರ್) ಚೆನ್ನಾಗಿ ಬೌಲಿಂಗ್ ಮಾಡಿದೆ, ಮತ್ತೊಮ್ಮೆ ಅದೇ ರೀತಿ ಮಾಡು ಎಂದರು.
ಆ ಸಂದರ್ಭದಲ್ಲಿ ಅವರು ಯಾರು ಎಂದೂ ನನಗೆ ತಿಳಿದಿರಲಿಲ್ಲ. ಆದರೆ ನಾನು ಮತ್ತೆ 6ರಿಂದ7 ಎಸೆತಗಳನ್ನು ಅದೇ ರೀತಿ ಮಾಡಿದೆ. ನಂತರ ನನ್ನ ಹೆಸರನ್ನು ಶಾರ್ಟ್ಲಿಸ್ಟ್ನಲ್ಲಿ ಸೇರಿಕೊಂಡೆ ಎಂದು ಕ್ಲಬ್ಗೆ ಎಂಟ್ರಿಯಾದ ಪ್ರಸಂಗವನ್ನು ನೆನಪಿಸಿಕೊಂಡಿದ್ದರು.
ನಂತರ ಎರಡು ಮೂರು ದಿನಗಳ ಕಾಲ ಇದೇ ಘಟನೆ ಮರುಕಳಿಸಿತು. ಪ್ಯಾಡಿ ಸರ್ ಹಾಗೂ ಸಂದೇಶ್ ಕಾವಳೆ ಸರ್ ನನ್ನಲ್ಲಿ ಆತ್ಮವಿಶ್ವಾಸ ತುಂಬಿದರು. ನಂತರ ನಾನು ಜಿಮ್ಖಾನ ಕ್ಲಬ್ನಲ್ಲಿ ವೇಗಿಯಾಗಿ ಮುಂದುವರಿದೆ ಎಂದು ತಿಳಿಸಿದ್ದಾರೆ.
