ಹೈದರಾಬಾದ್: ಪ್ರತಿ ಬಾರಿಯೂ ಕಪ್ ಗೆಲ್ಲುವ ಫೇವರಿಟ್ ತಂಡವಾಗಿರುವ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ, ಐಪಿಎಲ್ ಪ್ರಾರಂಭವಾದಾಗಿನಿಂದ ಇಲ್ಲಿಯವರೆಗೆ ಒಂದು ಬಾರಿಯೂ ಕಪ್‌ಗೆ ಮುತ್ತಿಡಲು ಸಾಧ್ಯವಾಗಿಲ್ಲ.
2020ರ ಇಂಡಿಯನ್ ಪ್ರೀಮಿಯರ್ ಲೀಗ್ ಹರಾಜು ಪ್ರಕ್ರಿಯೆ ಪೂರ್ಣಗೊಂಡಿದ್ದು, ಆರ್ಸಿಬಿ ತಂಡವನ್ನ ಮತ್ತೆ ಕೂಡಿಕೊಂಡಿರುವ ದಕ್ಷಿಣ ಆಫ್ರಿಕಾ ವೇಗಿ ಡೇಲ್ ಸ್ಟೈನ್ ಅಭಿಮಾನಿಗಳಿಗೆ ಕಪ್ ಗೆಲ್ಲುವ ಭರವಸೆ ನೀಡಿದ್ದಾರೆ.
ಬಿಡುವಿನ ಸಮಯದಲ್ಲಿ ಟ್ವಿಟ್ಟರ್ನಲ್ಲಿ ಅಭಿಮಾನಿಗಳ ಪ್ರಶ್ನೆಗೆ ಉತ್ತರಿಸೋದಾಗಿ ಸ್ಟೈನ್ ಹೇಳಿದ್ದರು. ಹೀಗಾಗಿ ಟ್ವಿಟ್ಟರ್ನಲ್ಲಿ ಫ್ಯಾನ್ಸ್, ಪ್ರಶ್ನೆಗಳ ಸುರಿಮಳೆ ಗೈದಿದ್ದಾರೆ. ಅದರಲ್ಲಿ ಕ್ರೀಡಾ ವೆಬ್ಸೈಟ್ವೊಂದು 2008, 2019ರ ನಂತರ ಮತ್ತೆ ಆರ್ಸಿಬಿ ತಂಡ ಸೇರಿಕೊಂಡಿರುವ ನಿಮ್ಮಿಂದ ಏನನ್ನ ನಿರೀಕ್ಷಿಸಬಹುದು ಎಂದು ಪ್ರಶ್ನೆ ಮಾಡಿದೆ. ಇದಕ್ಕೆ ಪ್ರತಿಕ್ರಿಯೆ ನೀಡಿರುವ ಸ್ಟೈನ್, ಕಪ್ ಎಮೋಜಿ ಹಾಕುವ ಮೂಲಕ ಈ ಸಲ ಕಪ್ ನಮ್ದೆ ಎಂದು ಅಭಯ ನೀಡಿದ್ದಾರೆ.
ಸ್ಟೈನ್ರನ್ನ ಆರ್ಸಿಬಿ ತಂಡ ಖರೀದಿಸಿದಾಗಲೇ ಅಭಿಮಾನಿಗಳೆಲ್ಲ ಈ ಸಲ ಕಪ್ ನಮ್ದೆ ಎಂದು ಹಿಗ್ಗಿದ್ದರು. ಇದೀಗ ಸ್ವತಃ ಸ್ಟೈನ್ ಇಂತಾದ್ದೊಂದು ಸಂದೇಶ ನೀಡಿರುವುದು ಅರ್ಸಿಬಿ ಅಭಿಮಾನಿಗಳ ಹರ್ಷವನ್ನ ಇಮ್ಮಡಿಗೊಳಿಸದೆ. ಇನ್ನು ಅಭಿಮಾನಿಯೊಬ್ಬ ನಿಮ್ಮ ನೆಚ್ಚಿನ ಬ್ಯಾಟ್ಸ್ಮನ್ ಯಾರು ಎಂದು ಕೇಳಿದ್ದಾರೆ. ಈ ಪ್ರಶ್ನೆಗೆ ಉತ್ತರಿಸಿರುವ ಸ್ಟೈನ್ ಅವರು ಕ್ವಿಂಟನ್ ಡಿ ಕಾಕ್, ಎಬಿ ಡಿ ವಿಲಿಯರ್ಸ್ ಮತ್ತು ವಿರಾಟ್ ಕೊಹ್ಲಿ ಎಂದು ತಿಳಿಸಿದ್ದಾರೆ.
2008ರ ಐಪಿಎಲ್ನಲ್ಲಿ ಸ್ಟೈನ್ ಬೆಂಗಳೂರು ತಂಡದಲ್ಲಿದ್ದರು. ನಂತರ 2019ರ ಐಪಿಎಲ್ ಸಮಯದಲ್ಲಿ ನಾಥನ್ ಕೌಲ್ಟರ್ ನೈಲ್ ಬದಲಿಗೆ ಮತ್ತೆ ಆರ್ಸಿಬಿ ತಂಡ ಸೇರಿಕೊಂಡಿದ್ದರು. ಆದ್ರೆ ಆರ್ಸಿಬಿ ತಂಡ ಸ್ಟೈನ್ರನ್ನ ತಂಡದಿಂದ ಕೈಬಿಟ್ಟಿತ್ತು. ಇದೀಗ ಬೆಂಗಳೂರು ತಂಡ ಮಗದೊಮ್ಮೆ ಸ್ಟೈನ್ರನ್ನ ಖರೀದಿಸಿದ್ದರಿಂದ 2020ರ ಐಪಿಎಲ್ನಲ್ಲಿ ಬೆಂಗಳೂರು ತಂಡದ ಪರ ಕಣಕ್ಕಿಳಿಯಲಿದ್ದಾರೆ.
