ಸೆಮೀಸ್​​ನಲ್ಲಿ ಸೋತರೂ ಫೈನಲ್​ವರೆಗೂ ಇಂಗ್ಲೆಂಡ್​​ನಲ್ಲೇ ಉಳಿದುಕೊಳ್ಳಲಿದೆ ಟೀಂ ಇಂಡಿಯಾ

ವಿಶ್ವಕಪ್​ ಸೆಮಿಫೈನಲ್​​ನಲ್ಲಿ ಟೀಂ ಇಂಡಿಯಾ ಸೋತು ಟೂರ್ನಿಯಿಂದ ಹೊರಬಿದ್ದಿದೆ. ಇಷ್ಟಾದ್ರೂ ಫೈನಲ್ ಪಂದ್ಯ​ ಮುಕ್ತಾಯದವರೆಗೂ ಇಂಗ್ಲೆಂಡ್​​ನಲ್ಲೇ ಕೊಹ್ಲಿ ಪಡೆ ಉಳಿದುಕೊಳ್ಳುವಂತಹ ಸಂದರ್ಭ ಸೃಷ್ಠಿಯಾಗಿದೆ.

ಮ್ಯಾಂಚೆಸ್ಟರ್​​:ಇಂಗ್ಲೆಂಡ್​​ನಲ್ಲಿ ನಡೆಯುತ್ತಿರುವ ಐಸಿಸಿ ಏಕದಿನ ಮಹಾಟೂರ್ನಿಯಲ್ಲಿ ಭಾನುವಾರ ನ್ಯೂಜಿಲ್ಯಾಂಡ್​-ಇಂಗ್ಲೆಂಡ್​ ಮಧ್ಯೆ ಫೈನಲ್ ಫೈಟ್​ ನಡೆಯಲಿದೆ. ಈಗಾಗಲೇ ಟೀಂ ಇಂಡಿಯಾ ಸೆಮಿಫೈನಲ್​ ಪಂದ್ಯದಲ್ಲಿ ಕಿವೀಸ್​ ವಿರುದ್ಧ ಸೋಲು ಕಂಡು ಟೂರ್ನಿಯಿಂದ ಹೊರಬಿದ್ದರೂ ಭಾರತಕ್ಕೆ ವಾಪಸ್​ ಆಗಿಲ್ಲ.

ಜುಲೈ 10ರಂದು ನಡೆದ ಸೆಮಿಫೈನಲ್​ ಪಂದ್ಯದಲ್ಲಿ ಟೀಂ ಇಂಡಿಯಾ ಕಿವೀಸ್​ ವಿರುದ್ಧ 18ರನ್​ಗಳ ಸೋಲು ಅನುಭವಿಸಿ, ಟೂರ್ನಿಯಿಂದ ಹೊರಬಿದ್ದಿದೆ. ಪಂದ್ಯ ಮುಗಿದು ಎರಡು ದಿನಗಳಾಗಿದ್ದರೂ ಕೊಹ್ಲಿ ಸೈನ್ಯ, ತಂಡದ ವ್ಯವಸ್ಥಾಪಕರು​, ಸಹಾಯಕ ಸಿಬ್ಬಂದಿ ಇಂಗ್ಲೆಂಡ್​​ನಲ್ಲೇ ಉಳಿದುಕೊಂಡಿದ್ದಾರೆ. ಇದಕ್ಕೆ ಕಾರಣ ವಾಪಸ್​ ಭಾರತಕ್ಕೆ ಬರಲು ಫ್ಲೈಟ್​​ ಟಿಕೆಟ್ ಲಭ್ಯವಾಗದೇ ಇರುವುದು ಎಂದು ತಿಳಿದು ಬಂದಿದೆ.

ಜುಲೈ 14ರ ಭಾನುವಾರ ಲಾರ್ಡ್ಸ್​​ ಮೈದಾನದಲ್ಲಿ ಫೈನಲ್​ ಪಂದ್ಯ ನಡೆಯಲಿದ್ದು, ಅದಾದ ಬಳಿಕ ಟೀಂ ಇಂಡಿಯಾ ಭಾರತಕ್ಕೆ ವಾಪಸ್​ ಆಗಲಿದೆ. ತಂಡ ವಾಪಸ್​ ಬರುವಂತೆ ಮಾಡಲು ಬಿಸಿಸಿಐ ಹರಸಾಹಸ ಪಡುತ್ತಿದ್ದರೂ ಟಿಕೆಟ್​ ಲಭ್ಯವಾಗದ ಕಾರಣ ಅಲ್ಲೇ ಉಳಿದುಕೊಳ್ಳಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ.

ಟಿಕೆಟ್​ ವಾಪಸ್​
ಇನ್ನೊಂದೆಡೆ, ಟೀಂ ಇಂಡಿಯಾ ಫೈನಲ್​ಗೆ ಲಗ್ಗೆ ಹಾಕುತ್ತದೆ ಎಂಬ ವಿಶ್ವಾಸದಲ್ಲಿ ಕ್ರೀಡಾಭಿಮಾನಿಗಳು ಫೈನಲ್​ ಪಂದ್ಯದ ಟಿಕೆಟ್​ ಪಡೆದುಕೊಂಡಿದ್ದರು. ಆದರೆ ಭಾರತ ಸೋಲು ಕಂಡಿದ್ದರಿಂದ ತಾವು ಪಡೆದುಕೊಂಡಿರುವ ಟಿಕೆಟ್​ ಬೇರೆಯವರಿಗೆ ಮಾರಾಟ ಮಾಡುತ್ತಿದ್ದಾರೆ ಎಂದು ತಿಳಿದು ಬಂದಿದೆ.