ಇನ್ನೂ ಮುಗಿದಿಲ್ಲ 360 ಡಿಗ್ರಿ ಪವರ್​... 9 ಸಿಕ್ಸರ್​ ಸಿಡಿಸಿ ಮಿಂಚಿದ ಎಬಿಡಿ

ಟಿ-20 ಬ್ಲಾಸ್ಟ್​ ಟಿ20 ಲೀಗ್​ನಲ್ಲಿ 360 ಗಮ್ಮತ್ತು ತೋರಿಸಿರುವ ಎಬಿ ಡಿ ವಿಲಿಯರ್ಸ್ ಭಾನುವಾರ ನಡೆದ ಪಂದ್ಯದಲ್ಲಿ 9 ಸಿಕ್ಸರ್​ ಸಿಡಿಸಿ ಮಿಂಚಿದ್ದಾರೆ.​

ರಿಚ್​ಮಂಡ್​: ದಕ್ಷಿಣ ಆಫ್ರಿಕಾದ ಮಾಜಿ ಕ್ರಿಕೆಟಿಗ, 360 ಡಿಗ್ರಿ ಖ್ಯಾತಿಯ ಎಬಿಡಿ ವಿಲಿಯರ್ಸ್​ ಇಂಗ್ಲೆಂಡ್​ನ ಟಿ-20 ಬ್ಲಾಸ್ಟ್​ನಲ್ಲಿ ಎದುರಾಳಿ ಬೌಲರ್​ಗಳನ್ನು ಬ್ಲಾಸ್ಟ್​ ಮಾಡುತ್ತಿದ್ದಾರೆ.

ಇದೇ ಮೊದಲ ಬಾರಿಗೆ ಟಿ-20 ಬ್ಲಾಸ್ಟ್​ನಲ್ಲಿ ಕಾಣಿಸಿಕೊಂಡಿರುವ ಎಬಿಡಿ ಮಿಡ್ಲ್​ಸೆಕ್ಸ್​ ತಂಡದ ಪರ ಆಡಿರುವ 4 ಪಂದ್ಯಗಳಲ್ಲಿ 189 ರನ್​ ಸಿಡಿಸಿ ಭರ್ಜರಿ ಪ್ರದರ್ಶನ ತೋರುತ್ತಿದ್ದಾರೆ. ಭಾನುವಾರ ನಡೆದ ಸಮರ್​ಸೆಟ್​ ವಿರುದ್ಧ ತಮ್ಮ ನೈಜ ಆಟ ಪ್ರದರ್ಶಸಿರುವ ಎಬಿಡಿ 35 ಎಸೆತಗಳಲ್ಲಿ ಕೇವಲ ಒಂದು ಬೌಂಡರಿ ಹಾಗೂ 9 ಸಿಕ್ಸರ್​ ಸಿಡಿಸಿದ್ದಾರೆ.

ಎಬಿಡಿ ಸ್ಫೋಟಕ 88 ರನ್​ಗಳ ನೆರವಿನಿಂದ ಮಿಡ್ಲ್​ಸೆಕ್ಸ್​ ತಂಡ 20 ಓವರ್​ಗಳಲ್ಲಿನ 215 ರನ್​ ಗಳಿಸಿತ್ತು. ಇದಕ್ಕುತ್ತರವಾಗಿ ಸಮರ್​ಸೆಟ್​ 180 ರನ್​ಗಳಿಸಲಷ್ಟೇ ಶಕ್ತವಾಗಿ 35 ರನ್​ಗಳ ಸೋಲನುಭವಿಸಿತ್ತು.

ಎಬಿಡಿ ತಾವಾಡಿದ ಮೊದಲ ಟಿ-20 ಬ್ಲಾಸ್ಟ್​ ಪಂದ್ಯದಲ್ಲಿಯೂ 88 ರನ್​ಗಳಿಸಿದ್ದರು. ಅಂದೂ ಕೂಡ 5 ಬೌಂಡರಿ 6 ಸಿಕ್ಸರ್​ ಸಿಡಿಸಿದ್ದರು. ಅಂತಾರಾಷ್ಟ್ರೀಯ ಕ್ರಿಕೆಟ್​ನಿಂದ ದೂರವಾದರೂ ಟಿ-20 ಲೀಗ್​ಗಳಲ್ಲಿ ತೊಡಗಿಕೊಂಡಿರುವ ಎಬಿಡಿ ತಮ್ಮ 360 ಆಟವನ್ನು ಮುಂದುವರಿಸಿಕೊಂಡು ಅಭಿಮಾನಿಗಳನ್ನು ರಂಜಿಸುವಲ್ಲಿ ಯಶಸ್ವಿಯಾಗುತ್ತಿದ್ದಾರೆ.