ಸಿದ್ಧಾರ್ಥ್​ ಕೌಲ್ ಹ್ಯಾಟ್ರಿಕ್​ಗೆ ಬೆಚ್ಚಿದ ಕರ್ನಾಟಕ.. ಚಾಂಪಿಯನ್ ತಂಡದ ವಿರುದ್ಧ ಪಂಜಾಬ್​ಗೆ 9 ವಿಕೆಟ್​ ಗೆಲುವು

104ಕ್ಕೆ ಕೇವಲ 4 ವಿಕೆಟ್​ ಕಳೆದುಕೊಂಡು ಸ್ಪರ್ಧಾತ್ಮಕ ಮೊತ್ತ ದಾಖಲಿಸಲು ಎದುರು ನೋಡುತ್ತಿದ್ದ ಕರ್ನಾಟಕ ತಂಡಕ್ಕೆ ಪಂಜಾಬ್ ತಂಡದ ಅನುಭವಿ ಬೌಲರ್​ ಸಿದ್ದಾರ್ಥ್​ ಕೌಲ್​ 17ನೇ ಓವರ್​ನಲ್ಲಿ ಆಘಾತ ನೀಡಿದರು..

ಬೆಂಗಳೂರು :ಹಾಲಿ ಚಾಂಪಿಯನ್​ ಕರ್ನಾಟಕ ತಂಡ ಸಯ್ಯದ್ ಮುಷ್ತಾಕ್ ಅಲಿ ಟ್ರೋಫಿಯ 2ನೇ ಪಂದ್ಯದಲ್ಲಿ ಪಂಜಾಬ್ ವಿರುದ್ಧ 9 ವಿಕೆಟ್​ಗಳ ಹೀನಾಯ ಸೋಲು ಕಂಡಿದೆ.

ಬೆಂಗಳೂರಿನ ಆಲೂರು ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿ ಕರ್ನಾಟಕ ತಂಡ ಸಿದ್ಧಾರ್ಥ್​ ಕೌಲ್​ ದಾಳಿಗೆ ಸಿಲುಕಿ ಕೇವಲ 125 ರನ್ ​ಗಳಿಸಿತ್ತು. ರೋಹನ್ ಕಡಂ 32 ರನ್ ಗಳಿಸಿದ್ದೇ ತಂಡದ ಗರಿಷ್ಠ ಸ್ಕೋರ್ ಆಯಿತು.

126 ರನ್​ಗಳ ಗುರಿ ಬೆನ್ನತ್ತಿದ ಪಂಜಾಬ್ ತಂಡ ಪ್ರಭಸಿಮ್ರಾನ್ ಸಿಂಗ್​ ಅವರ ಸ್ಫೋಟಕ ಬ್ಯಾಟಿಂಗ್ ನೆರವಿನಿಂದ ಕೇವಲ 14.4 ಓವರ್​ಗಳಲ್ಲಿ ಒಂದು ವಿಕೆಟ್ ಕಳೆದುಕೊಂಡು ಗುರಿ ತಲುಪಿತು. 52 ಎಸೆತಗಳಲ್ಲಿ 9 ಬೌಂಡರಿ ಹಾಗೂ 5 ಸಿಕ್ಸರ್​ಗಳ​ ಸಹಿತ 89 ರನ್​ಗಳಿಸಿ ಸುಲಭ ಜಯಕ್ಕೆ ಕಾರಣರಾದರು. ಅಭಿಷೇಕ್ ಶರ್ಮಾ 30 ರನ್​ ಗಳಿಸಿದರು.

ಸಿದ್ದಾರ್ಥ್​ ಕೌಲ್​ ಹ್ಯಾಟ್ರಿಕ್ :​104ಕ್ಕೆ ಕೇವಲ 4 ವಿಕೆಟ್​ ಕಳೆದುಕೊಂಡು ಸ್ಪರ್ಧಾತ್ಮಕ ಮೊತ್ತ ದಾಖಲಿಸಲು ಎದುರು ನೋಡುತ್ತಿದ್ದ ಕರ್ನಾಟಕ ತಂಡಕ್ಕೆ ಪಂಜಾಬ್ ತಂಡದ ಅನುಭವಿ ಬೌಲರ್​ ಸಿದ್ದಾರ್ಥ್​ ಕೌಲ್​ 17ನೇ ಓವರ್​ನಲ್ಲಿ ಆಘಾತ ನೀಡಿದರು.

ಅವರು ಆ ಓವರ್​ನ 3,4 ಮತ್ತು 5ನೇ ಎಸೆತದಲ್ಲಿ ಕ್ರಮವಾಗಿ ರೋಹನ್ ಕಡಂ(32), ಮಿಥುನ್​(0) ಹಾಗೂ ಅನಿವೃದ್ಧ್ ಜೋಶಿ(7) ವಿಕೆಟ್​ ಪಡೆದು ಚಾಂಪಿಯನ್ ತಂಡವನ್ನು ಅಲ್ಪಮೊತ್ತಕ್ಕೆ ಕುಸಿಯುವಂತೆ ಮಾಡಿದರು. ಅಲ್ಲದೆ ಕೌಲ್​ 2021ರ ಲೀಗ್​ನಲ್ಲಿ ಮೊದಲ ಹ್ಯಾಟ್ರಿಕ್ ಪಡೆದ ಶ್ರೇಯಕ್ಕೂ ಪಾತ್ರರಾದರು.

ಇದನ್ನು ಓದಿ:ಸಯ್ಯದ್​ ಮುಷ್ತಾಕ್​ ಅಲಿ ಟ್ರೋಫಿ: ಆಟಗಾರರ ವೇತನದಲ್ಲಿ ಭಾರೀ ಏರಿಕೆ ಮಾಡಿದ ಬಿಸಿಸಿಐ