ಹೋಪ್​ ಶತಕ ವ್ಯರ್ಥಗೊಳಿಸಿದ ಹಸರಂಗ: ಶ್ರೀಲಂಕಾಗೆ 1 ವಿಕೆಟ್​​​ ರೋಚಕ ಜಯ

ಶ್ರೀಲಂಕಾ ಹಾಗೂ ವೆಸ್ಟ್​ ಇಂಡೀಸ್​ ನಡುವಿನ ಮೊದಲ ಏಕದಿನ ಪಂದ್ಯ ರೋಚಕ ಅಂತ್ಯ ಕಂಡಿದೆ. ಲಂಕಾ ಒಂದು ವಿಕೆಟ್​ ಜಯ ಸಾಧಿಸಿ ಸಂಭ್ರಮಿಸಿದರೆ, ಗೆಲ್ಲುವ ಪಂದ್ಯವನ್ನು ಕೈಚೆಲ್ಲಿ ವಿಂಡೀಸ್​ ನಿರಾಶೆ ಅನುಭವಿಸಿದೆ.

ಕೊಲೊಂಬೊ: ಬೌಲಿಂಗ್ ಹಾಗೂ ಬ್ಯಾಟಿಂಗ್​ನಲ್ಲಿ ಸಂಘಟಿತ ಪ್ರದರ್ಶನ ತೋರಿದ ಶ್ರೀಲಂಕಾ ತಂಡ ವೆಸ್ಟ್​ ಇಂಡೀಸ್​ ವಿರುದ್ಧ 1 ವಿಕೆಟ್​ ರೋಚಕ ಜಯ ಸಾಧಿಸಿದೆ.

ಶ್ರೀಲಂಕಾ ಹಾಗೂ ವೆಸ್ಟ್​ ಇಂಡೀಸ್​ ನಡುವಿನ ಮೊದಲ ಏಕದಿನ ಪಂದ್ಯ ರೋಚಕ ಅಂತ್ಯ ಕಂಡಿದೆ. ಲಂಕಾ ಒಂದು ವಿಕೆಟ್​ ಜಯ ಸಾಧಿಸಿ ಸಂಭ್ರಮಿಸಿದರೆ, ಗೆಲ್ಲುವ ಪಂದ್ಯವನ್ನು ಕೈಚೆಲ್ಲಿ ವಿಂಡೀಸ್​ ನಿರಾಶೆ ಅನುಭವಿಸಿದೆ.

ಮೊದಲು ಬ್ಯಾಟಿಂಗ್ ನಡೆಸಿದ್ದ ವೆಸ್ಟ್​ ಇಂಡೀಸ್​ 50 ಓವರ್​ಗಳಲ್ಲಿ 7 ವಿಕೆಟ್​ ಕಳೆದುಕೊಂಡು 289 ರನ್ ​ಗಳಿಸಿತ್ತು. ಆರಂಭಿಕ ಬ್ಯಾಟ್ಸ್​ಮನ್​ ಶಾಯ್​ ಹೋಪ್​ ಶತಕ(115) ಸಿಡಿಸಿದರೆ, ರಾಸ್ಟನ್​ ಚೇಸ್​ 41, ಬ್ರಾವೋ 39, ಕೀಮೋ ಪಾಲ್​ 32, ಹೇಡನ್​ ವಾಲ್ಶ್​ 20 ರನ್​ ಗಳಿಸಿ ಸ್ಪರ್ಧಾತ್ಮಕ ಮೊತ್ತ ಪೇರಿಸಲು ನೆರವಾಗಿದ್ದರು.

ಶ್ರೀಲಂಕಾ ಪರ ಇಸುರು ಉದಾನಾ 82 ರನ್​ ನೀಡಿ 3 ವಿಕೆಟ್​ ಪಡೆದರೆ, ತಿಸರಾ ಪರೆರಾ ಹಾಗೂ ನುವಾನ್​ ಪ್ರದೀಪ್​ ತಲಾ ಒಂದು ವಿಕೆಟ್​ ಪಡೆದು ವಿಂಡೀಸ್​ ತಂಡವನ್ನು 300ರ ಗಡಿ ದಾಟದಂತೆ ನೋಡಿಕೊಂಡರು.

ಒಂದು ವಿಕೆಟ್​ ರೋಚಕ ಜಯ:

290 ರನ್​ಗಳ ಸ್ಪರ್ಧಾತ್ಮಕ ಮೊತ್ತ ಬೆನ್ನತ್ತಿದ ಲಂಕಾ ತಂಡ 49.1 ಓವರ್​ಗಳಲ್ಲಿ 290 ರನ್ ​ಗಳಿಸಿ ಒಂದು ವಿಕೆಟ್​ ರೋಚಕ ಜಯ ಸಾಧಿಸಿತು.

ಆವಿಶ್ಕಾ ಫರ್ನಾಂಡೊ 50, ದಿಮುತ್​ ಕರುಣರತ್ನೆ 52, ಕುಸಾಲ್​ ಪೆರೆರಾ 42, ತಿಸರಾ ಪೆರೆರಾ 32 ಹಾಗೂ ಕೊನೆಯಲ್ಲಿ ಬಾಲಂಗೋಚಿಗಳ ಜೊತೆ ಅಬ್ಬರದ ಬ್ಯಾಟಿಂಗ್​ ನಡೆಸಿದ ಹಸರಂಗ ಔಟಾಗದೆ 42 ರನ್​ಗಳಿಸಿ ಲಂಕಾ ತಂಡದ ಗೆಲುವಿನ ರೂವಾರಿಯಾದರು.

ವಿಂಡೀಸ್​ ಪರ ಸ್ಟಾರ್​ ಬೌಲರ್​ ಆದ ಶೆಲ್ಡಾನ್​ ಕಾಟ್ರೆಲ್​ 10 ಓವರ್​ನಲ್ಲಿ 69 ರನ್​ ನೀಡಿ ವಿಕೆಟ್ ಪಡೆಯಲು ವಿಫಲರಾದದ್ದೇ ವಿಂಡೀಸ್​ ಸೋಲಿಗೆ ಕಾರಣವಾಯಿತು. ಆದರೆ ಅಲ್ಜಾರಿ ಜೋಶೆಫ್​ 3, ಹೇಡನ್​ ವಾಲ್ಶ್​ 2 ಹಾಗೂ ಕೀಮೋ ಪಾಲ್ 2 ವಿಕೆಟ್​ ಪಡೆದು ಲಂಕಾ ತಂಡದ ಸುಲಭ ಜಯವಾಗುತ್ತಿದ್ದ ಪಂದ್ಯವನ್ನು ಕೊನೆಯ ಓವರ್​ವರೆಗೂ ಕೊಂಡೊಯ್ಯವಂತೆ ಮಾಡಿದರು. ಆದರೆ ಹಸರಂಗ ಅವರ ಆಟ ಲಂಕಾ ತಂಡಕ್ಕೆ ಒಂದು ವಿಕೆಟ್​ ರೋಚಕ ಜಯ ತಂದಕೊಟ್ಟಿತು.