ಪಾಕಿಸ್ತಾನ ವನಿತೆಯರ ವಿರುದ್ಧ ಏಕದಿನ ಸರಣಿ ಗೆದ್ದ ದಕ್ಷಿಣ ಅಫ್ರಿಕಾ ತಂಡ

253 ರನ್​ಗಳ ಗುರಿ ಬೆನ್ನತ್ತಿದ ಪಾಕಿಸ್ತಾನ ವನಿತಾ ತಂಡ 50 ಓವರ್​ಗಳಲ್ಲಿ 8 ವಿಕೆಟ್ ಕಳೆದುಕೊಂಡು 239 ರನ್ ​ಗಳಿಸಿ, 13 ರನ್​ಗಳ ಸೋಲು ಕಂಡಿತು.

ಡರ್ಬನ್​: ದಕ್ಷಿಣ ಆಫ್ರಿಕಾ ಮಹಿಳೆಯರ ತಂಡ ತವರಿನಲ್ಲಿ ಪಾಕಿಸ್ತಾನ ವನಿತೆಯರ ವಿರುದ್ಧ ನಡೆಯುತ್ತಿರುವ 3 ಪಂದ್ಯಗಳ ಏಕದಿನ ಸರಣಿಯನ್ನು ಇನ್ನು ಒಂದು ಪಂದ್ಯವಿರುವಂತೆಯೇ ಗೆದ್ದುಕೊಂಡಿದೆ.

ಡರ್ಬನ್​ನಲ್ಲಿ ಶನಿವಾರ ನಡೆದ 2ನೇ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ದಕ್ಷಿಣ ಆಫ್ರಿಕಾ ತಂಡ 50 ಓವರ್​ಗಳಲ್ಲಿ 7 ವಿಕೆಟ್ ಕಳೆದುಕೊಂಡು 252 ರನ್​ ಗಳಿಸಿತ್ತು. ಆರಂಭಿಕ ಬ್ಯಾಟರ್​ ಲಿಜೆಲ್ಲೆ ಲೀ 47, ವೋಲ್ವಾರ್ಟ್​ 27, ಸುನೆ ಲ್ಯೂಸ್​ 32, ಮರೆಝಾನ್ನೆ ಕಾಪ್​ ಅಜೇಯ 68 ರನ್ ​ಗಳಿಸಿದರು.

ಪಾಕಿಸ್ತಾನ ಪರ ನಶ್ರ ಸಂದು 2, ದಿಯಾನ ಬೇಗ್​ 2 , ಫಾತಿಮಾ ಸನಾ ಮತ್ತು ಸಾದಿಯಾ ಇಕ್ಬಾಲ್​ ತಲಾ ಒಂದು ವಿಕೆಟ್​ ಪಡೆದರು.

ಇನ್ನು 253 ರನ್​ಗಳ ಗುರಿ ಬೆನ್ನತ್ತಿದ ಪಾಕಿಸ್ತಾನ ವನಿತಾ ತಂಡ 50 ಓವರ್​ಗಳಲ್ಲಿ 8 ವಿಕೆಟ್ ಕಳೆದುಕೊಂಡು 239 ರನ್​ ಗಳಿಸಿ, 13 ರನ್​ಗಳ ಸೋಲು ಕಂಡಿತು.

ಆಲ್​ರೌಂಡರ್​ ಆಲಿಯಾ ರಿಯಾಜ್​ 81, ನಿಡಾ ದಾರ್​ 51 ಹಾಗೂ ಒಮೈಮಾ ಸೊಹೈಲ್ 41 ರನ್ ​ಗಳಿಸಿ ಗೆಲುವಿಗಾಗಿ ನಡೆಸಿದ ಹೋರಾಟ ವಿಫಲವಾಯಿತು.

ದಕ್ಷಿಣ ಆಫ್ರಿಕಾ ಪರ ಅಯಬೊಂಗಾ ಕಾಕ 40ಕ್ಕೆ 4, ಮರಿಜಾನ್ನೆ ಕಾಪ್ 44ಕ್ಕೆ 3 ವಿಕೆಟ್​ ಪಡೆದು ಗೆಲುವಿನ ರೂವಾರಿಯಾದರು. ಮೊದಲ ಪಂದ್ಯದಲ್ಲಿ 3 ರನ್​ಗಳ ರೋಚಕ ಜಯ ಸಾಧಿಸಿದ್ದ ಹರಿಣ ಪಡೆ ಇದೀಗ ಈ ಪಂದ್ಯದ ಗೆಲುವಿನೊಂದಿಗೆ ಸರಣಿ ವಶಪಡಿಸಿಕೊಂಡಿದೆ.