ಮುಂಬೈ: ಭಾರತ ತಂಡದ ಮಾಜಿ ನಾಯಕ ಸೌರವ್ ಗಂಗೂಲಿ ಇದೇ ತಿಂಗಳು 23ಕ್ಕೆ ಬಿಸಿಸಿಐ ಅಧ್ಯಕ್ಷನಾಗಿ ಅಧಿಕಾರ ಸ್ವೀಕರಿಸುತ್ತಿರುವುದರಿಂದ ಹಲವಾರು ಕ್ರಿಕೆಟಿಗರು ದಾದಾಗೆ ಶುಭ ಕೋರಿದ್ದಾರೆ.
ದಾದಾ ಕೇವಲ ಒಬ್ಬ ಕ್ರಿಕೆಟಿಗನಾಗಿ ಮಾತ್ರವಲ್ಲದೇ, ನಾಯಕನಾಗಿ ತಮ್ಮ ಕ್ರಿಕೆಟ್ ಜೀವನವನ್ನೇ ಕೆಲವು ಆಟಗಾರರ ಬೆಳವಣಿಗೆಗಾಗಿ ತ್ಯಾಗಮಾಡಿದ್ದರು. ಪ್ರತಿಭೆಯುಳ್ಳ ಆಟಗಾರರಿಗೆ ಅನ್ಯಾಯವಾಗಲು ಬಿಡದ ಗಂಗೂಲಿ ಯಾರನ್ನು ಬೇಕಾದರೂ ಎದುರಿಸಲು ಸಿದ್ದವಾಗುತ್ತಿದ್ದರು. ಅದರಲ್ಲೂ ಸೆಹ್ವಾಗ್, ಯುವರಾಜ್, ಜಹೀರ್ ಖಾನ್, ದ್ರಾವಿಡ್, ಅನಿಲ್ ಕುಂಬ್ಳೆ, ಮೊಹಮ್ಮದ್ ಕೈಫ್ ಎಂಸ್ ಧೋನಿ ಅಂತಹ ಮಹಾನ್ ಕ್ರಿಕೆಟಿಗರ ಸಾಧನೆಯ ಹಿಂದೆ ದಾದಾ ಇದ್ದರೆಂದರೆ ಅತಿಶಯೋಕ್ತಿಯಲ್ಲ.
ಹೀಗಿರುವಾಗ ಅಂತಹ ಬೆಂಗಾಲ್ ಟೈಗರ್ ಬಿಸಿಸಿಐ ಚುಕ್ಕಾಣಿ ಹಿಡಿಯುತ್ತಿರುವುದಕ್ಕೆ ಖುಷಿಯಾಗಿರುವ ಭಾರತ ತಂಡದ ಮಾಜಿ ಕ್ರಿಕೆಟಿಗ ಹರ್ಭಜನ್ ಸಿಂಗ್ ಗಂಗೂಲಿಗೆ ವಿಶ್ ಮಾಡಿದ್ದು, ಟ್ವಿಟರ್ನಲ್ಲಿ "ನೀವೊಬ್ಬ ನಾಯಕರಾಗಿ ಮತ್ತೊಬ್ಬರನ್ನು ನಾಯಕನನ್ನಾಗಿ ಬೆಳೆಸುವವರರು, ಬಿಸಿಸಿಐ ಅಧ್ಯಕ್ಷನಾಗುತ್ತಿರುವುದಕ್ಕೆ ಅಭಿನಂದನೆಗಳು, ನಿಮಗೆ ಒಳ್ಳೆಯದಾಗಲಿ ಎಂದು ಆಶಿಸುತ್ತೇನೆ" ಎಂದು ಬರೆದು ದಾದಾಗೆ ಶುಭಕೋರಿದ್ದಾರೆ.
ಈ ಟ್ವೀಟ್ಗೆ ಉತ್ತರಿಸಿರುವ ಗಂಗೂಲಿ" ಧನ್ಯವಾದ ಭಜ್ಜು, ನಿಮ್ಮ ಬೌಲಿಂಗ್ ನೆರವಿನಿಂದ ಭಾರತ ತಂಡಕ್ಕೆ ಗೆಲುವು ತಂದುಕೊಡುವಲ್ಲಿ ನಿಮ್ಮ ನೆರವು ಹೇಗಿತ್ತು ಈಗಲೂ ಅದು ನನಗೆ ಬೇಕಾಗಿದೆ" ಎಂದು ಟ್ವೀಟ್ ಮಾಡುವ ಮೂಲಕ ಉನ್ನತ ಹುದ್ದೆಗೇರಿದರೂ ತಮ್ಮಲ್ಲಿ ಯಾವುದೇ ಬದಲಾವಣೆಯಿಲ್ಲ ಎಂದು ಕ್ರಿಕೆಟ್ ಜಗತ್ತಿಗೆ ತೋರಿಸಿಕೊಟ್ಟಿದ್ದಾರೆ.
