ಐಪಿಎಲ್‌ ಮಹಿಮೆ: ಪಾನಿಪುರಿ ಮಾರುತ್ತಿದ್ದ ಹುಡುಗ ಕೋಟ್ಯಧಿಪತಿಯಾದ!

ಇಂಡಿಯನ್​ ಪ್ರೀಮಿಯರ್​ ಲೀಗ್​ ಕ್ರಿಕೆಟ್‌ನ ಹರಾಜು ಪ್ರಕ್ರಿಯೆಯಲ್ಲಿ 19 ವರ್ಷದೊಳಗಿನ ಆಟಗಾರನಿಗೆ ಜಾಕ್​ಪಾಟ್​ ಹೊಡೆದಿದೆ.

ಕೋಲ್ಕತ್ತಾ: ಇಂಡಿಯನ್​ ಪ್ರೀಮಿಯರ್​ ಲೀಗ್​​ನ ಹರಾಜು ಪ್ರಕ್ರಿಯೆಯಲ್ಲಿ ಪ್ರಮುಖ ಆಟಗಾರರ ಜೊತೆ ಜೊತೆಗೆ ಭವಿಷ್ಯದ ಯುವತಾರೆಗಳಿಗೆ ಫ್ರಾಂಚೈಸಿಗಳು ಮಣೆ ಹಾಕಿದ್ದು, ಕೋಟಿ ಕೋಟಿ ಹಣ ನೀಡಿ ತಮ್ಮ ತಂಡಗಳಿಗೆ ಸೇರಿಸಿಕೊಂಡಿವೆ.

ಭಾರತ ತಂಡದ ಅಂಡರ್-19 ಆಟಗಾರ ಯಶಸ್ವಿ ಜೈಸ್ವಾಲ್​ 2019ರ ವಿಜಯ್​ ಹಜಾರೆ ಸೀಸನ್​ನಲ್ಲಿ ಭರ್ಜರಿ ಬ್ಯಾಟಿಂಗ್​ ಮಾಡುವ ಮೂಲಕ ಇಡೀ ದೇಶದ ಗಮನ ಸೆಳೆದಿದ್ದರು. ಇದೀಗ ಐಪಿಎಲ್‌ ಹರಾಜು ಪ್ರಕ್ರಿಯೆಯಲ್ಲಿ ಜೈಸ್ವಾಲ್‌ಗೆ ಅದೃಷ್ಟದ ಬಾಗಿಲು ತೆರೆದಿದೆ. ಬರೋಬ್ಬರಿ 2.4 ಕೋಟಿ ರೂಗಳಿಗೆ ರಾಜಸ್ಥಾನ್ ರಾಯಲ್ಸ್ ತಂಡ ಅವರನ್ನು ಖರೀದಿಸಿದೆ. ಕೇವಲ 20 ಲಕ್ಷ ರೂ ಮೂಲ ಬೆಲೆ ಹೊಂದಿದ್ದ ಈ ಆಟಗಾರ​ ಕ್ರಿಕೆಟ್​ಗಾಗಿ ಊರು ಬಿಟ್ಟು, ಹಾಲಿನ ಡೈರಿಯಲ್ಲಿ ಕೆಲಸ ಮಾಡುತ್ತಿದ್ದನಂತೆ. ಒಂದು ಹೊತ್ತು ಊಟಕ್ಕಾಗಿ ಪಾನಿಪುರಿ ಮಾರಾಟ ಮಾಡಿ ಟೆಂಟ್​ನಲ್ಲೇ ರಾತ್ರಿ ಕಳೆಯುತ್ತಿದ್ದ ಎನ್ನುವ ವಿಚಾರ ಗೊತ್ತಾಗಿದೆ.

ಇದರ ಜತೆಗೆ ಅಂಡರ್​​​-19 ತಂಡದ ಕ್ಯಾಪ್ಟನ್​​ ಪ್ರಿಯಂ ಗಾರ್ಗ್ ಸಹ ಐಪಿಎಲ್‌ನಲ್ಲಿ ಛಾಪು ಮೂಡಿಸಿದ್ದು, 20 ಲಕ್ಷ ರೂ ಮೂಲ ಬೆಲೆ ಹೊಂದಿದ ಈ ಆಟಗಾರ ಸನ್​ರೈಸರ್ಸ್​ ಹೈದರಾಬಾದ್​ ತಂಡಕ್ಕೆ ಬರೋಬ್ಬರಿ 1.9 ಕೋಟಿ ರೂಗೆ ಬಿಕರಿಯಾಗಿದ್ದಾರೆ. ಇದರ ಜತೆಗೆ ಮತ್ತೊಬ್ಬ ಭಾರತದ ಯುವ ಪ್ರತಿಭಾವಂತ ಆಟಗಾರರಾದ ವಿರಾಟ್ ಸಿಂಗ್​ ಕೂಡ ಸನ್​ರೈಸರ್ಸ್​ ತಂಡಕ್ಕೆ 1.9 ಕೋಟಿ ರೂಗೆ ಸೇಲ್​ ಆಗಿದ್ದಾರೆ.

​ಅಂಡರ್​​-19 ತಂಡದ ಯುವ ಸ್ಪಿನ್ನರ್ ರವಿ ಬಿಷ್ಣೋಯಿ 2 ಕೋಟಿ ರೂ. ಗಳಿಗೆ ಕಿಂಗ್ಸ್‌ ಇಲೆವೆನ್ ಪಂಜಾಬ್​ ತಂಡದ ಪಾಲಾಗಿದ್ದು, ಸೈಯದ್​ ಮುಷ್ತಾಕ್‌​ ಅಲಿ ಟೂರ್ನಿಯಲ್ಲಿ 12 ವಿಕೆಟ್​ ಕಿತ್ತು ಎಲ್ಲರ ಗಮನ ಸೆಳೆದಿದ್ದರು. ಹಾಗೇನೇ ಕಾರ್ತಿಕ್​ ತ್ಯಾಗಿ ಕೂಡ ರಾಜಸ್ಥಾನ ರಾಯಲ್ಸ್​​ ತಂಡಕ್ಕೆ 1.3 ಕೋಟಿಗೆ ಸೇಲ್​ ಆಗಿದ್ದು, ಇವರ ಮೂಲಬೆಲೆ 20 ಲಕ್ಷ ರೂ ಆಗಿತ್ತು. ಇನ್ನುಳಿದಂತೆ ಕಳೆದ ವರ್ಷ ಬರೋಬ್ಬರಿ 8.4 ಕೋಟಿ ರೂಗೆ ಮಾರಾಟವಾಗಿದ್ದ​ ವರುಣ್​ ಚಕ್ರವರ್ತಿ ಈ ಬಾರಿ ಕೋಲ್ಕತ್ತಾ ತಂಡಕ್ಕೆ 4 ಕೋಟಿ ರೂ ಬಿಕರಿಯಾಗಿದ್ದಾರೆ.