ಡಾಕಾ: ಮೂರು ಬಾರಿ ಬುಕ್ಕಿಗಳೊಂದಿಗೆ ಸಂಪರ್ಕ ಸಾಧಿಸಿದ್ದ ವಿಚಾರವನ್ನು ಐಸಿಸಿ ಗಮನಕ್ಕೆ ತರದೇ ಮುಚ್ಚಿಟ್ಟ ಬಾಂಗ್ಲಾದೇಶದ ಸ್ಟಾರ್ ಆಟಗಾರ ಶಕಿಬ್ ಅಲ್ ಹಸನ್ ಪರ ಬಾಂಗ್ಲಾದೇಶ ಪ್ರಧಾನಿ ಶೇಕ್ ಹಸೀನ ಮಾತನಾಡಿದ್ದಾರೆ.
ಬಾಂಗ್ಲಾದೇಶದ ಟೆಸ್ಟ್ ಹಾಗೂ ಟಿ-20 ತಂಡದ ನಾಯಕ ಹಾಗೂ ಏಕದಿನ ಕ್ರಿಕೆಟ್ನಲ್ಲಿ ವಿಶ್ವದ ನಂಬರ್ ಒನ್ ಆಲ್ರೌಂಡರ್ ಆಗಿದ್ದ ಶಕಿಬ್ರನ್ನು 2018ರ ಐಪಿಎಲ್ ವೇಳೆ ಸೇರಿದಂತೆ ಮೂರು ಬಾರಿ ಬುಕ್ಕಿಗಳು ಸಂಪರ್ಕಿಸಿದ್ದರು. ಈ ವಿಚಾರವನ್ನು ಶಕಿಬ್ ಐಸಿಸಿಯ ಭ್ರಷ್ಟಾಚಾರ ನಿಯಂತ್ರಣ ಮಂಡಳಿಗೆ ತಿಳಿಸದ ಆರೋಪದ ಮೇಲೆ ಮಂಗಳವಾರ ಅವರನ್ನು 2 ವರ್ಷದ ಅವಧಿಗೆ ಎಲ್ಲ ಮಾದರಿಯ ಕ್ರಿಕೆಟ್ನಿಂದ ನಿಷೇಧ ಹೇರಿ ಆದೇಶ ಹೊರಡಿಸಿತ್ತು.
ಇದೀಗ ನಿಷೇದಕ್ಕೊಳಗಾಗಿ ನೋವಿನಲ್ಲಿರುವ ಶಕಿಬ್ ಪರ ಅಲ್ಲಿನ ಪ್ರಧಾನಿ ಶೇಕ್ ಹಸೀನ ಮಾತನಾಡಿದ್ದು," ಶಕಿಬ್ ತಪ್ಪು ಮಾಡಿರುವುದು ಸಾಬೀತಾಗಿದೆ. ಅದು ಅವರಿಗೂ ಗೊತ್ತಾಗಿದೆ. ಆದರೆ, ಅವರನ್ನು ದೂಷಿಸದೇ ಅವರು ಕ್ರಿಕೆಟ್ನಿಂದ ದೂರವಾಗದಂತೆ ಬಿಸಿಬಿ ನೋಡಿಕೊಳ್ಳಬೇಕು" ಎಂದಿದ್ದಾರೆ.
ಐಸಿಸಿ ಶಕಿಬ್ ನಿಷೇಧ ಮಾಡಿರುವ ವಿಚಾರದಲ್ಲಿ ಸರ್ಕಾರ ಏನೂ ಮಾಡುವುದಕ್ಕೆ ಸಾಧ್ಯವಿಲ್ಲ. ಆದರೆ ಬಿಸಿಬಿ ಅವರ ಬೆನ್ನಿಗೆ ನಿಲ್ಲಬೇಕು ಎಂದಿದ್ದಾರೆ.
ಇದಕ್ಕೆ ಪ್ರತಿಕ್ರಿಯಿಸಿರುವ ಬಿಸಿಬಿ, ಶಕಿಬ್ ನಿಷೇಧದ ಅವಧಿ ಮುಗಿದ ನಂತರ ಅವರಿಗೆ ನಮ್ಮ ತಂಡದ ಬಾಗಿಲು ಯಾವಾಗಲೂ ತೆರೆದಿರುತ್ತದೆ. ಅವರು ಮತ್ತೆ ಬಲಿಷ್ಠರಾಗಿ ಕಮ್ ಬ್ಯಾಕ್ ಮಾಡಲಿದ್ದಾರೆ ಎಂದು ನಾವು ಭಾವಿಸಿದ್ದೇವೆ. ಅವರಿಂದ ಇನ್ನಷ್ಟು ವರ್ಷಗಳ ಕಾಲ ಸೇವೆಯನ್ನು ನಾವು ನಿರೀಕ್ಷೆ ಮಾಡಿದ್ದೇವೆ ಎಂದು ತಿಳಿಸಿದ್ದಾರೆ.
