ಅಫ್ರಿದಿ ಮಾನವೀಯತೆಗೆ ಭಜ್ಜಿ ಮೆಚ್ಚುಗೆ... ಮಾನವೀಯತೆ ಎಲ್ಲಕ್ಕಿಂತ ಮಿಗಿಲು ಎಂದ ಕ್ರಿಕೆಟರ್​!

ರಕ್ಕಸ ಮಹಾಮಾರಿ ಕೊರೊನಾ ವಿರುದ್ಧ ಹೋರಾಟ ಮಾಡಲು ಎಲ್ಲರೂ ಮುಂದಾಗಿದ್ದಾರೆ. ಪಾಕ್​ನಲ್ಲೂ ಡೆಡ್ಲಿ ವೈರಸ್​ ಹಾವಳಿ ಜೋರಾಗಿದ್ದು ಅದರ ವಿರುದ್ಧ ಹೋರಾಟ ಮಾಡಲು ಕ್ರಿಕೆಟಿಗ ಅಫ್ರಿದಿ ರಸ್ತೆಗಿಳಿದಿದ್ದಾರೆ.

ಇಸ್ಲಾಮಾಬಾದ್​:ಮಹಾಮಾರಿ ಕೊರೊನಾ ವೈರಸ್​​ ಪಕ್ಕದ ರಾಷ್ಟ್ರ ಪಾಕಿಸ್ತಾನದಲ್ಲಿ ರೌದ್ರನರ್ತನ ಹೊರಹಾಕುತ್ತಿದ್ದು, ಇಷ್ಟಾದರೂ ಯಾವುದೇ ಹೇಳಿಕೊಳ್ಳುವಂತಹ ಕ್ರಮ ಕೈಗೊಳ್ಳಲು ಇಮ್ರಾನ್​ ಸರ್ಕಾರ ಮುಂದಾಗಿಲ್ಲ. ಇದರ ಮಧ್ಯೆ ಕ್ರಿಕೆಟರ್​ ಮಾಡುತ್ತಿರುವ ಕೆಲಸ ಎಲ್ಲರ ಮೆಚ್ಚುಗೆಗೆ ಕಾರಣವಾಗಿದೆ.

ಪಾಕಿಸ್ತಾನ ಕ್ರಿಕೆಟ್ ತಂಡದ ಮಾಜಿ ಆಟಗಾರ ಶಾಹಿದ್​ ಅಫ್ರಿದಿ, ಅಲ್ಲಿನ ಜನರಿಗೆ ಅಗತ್ಯ ವಸ್ತು ನೀಡುವ ಕೆಲಸ ಮಾಡುತ್ತಿದ್ದು, ಇದೇ ವಿಷಯವನ್ನಿಟ್ಟುಕೊಂಡು ಹರ್ಭಜನ್​ ಸಿಂಗ್​ ಅವರ ಬೆನ್ನು ತಟ್ಟುವ ಕೆಲಸ ಮಾಡಿದ್ದರು. ಮಾನವೀಯತೆಗಾಗಿ ಉತ್ತಮ ಕೆಲಸ ಮಾಡುತ್ತಿದ್ದೀರಿ. ದೇವರು ನಿಮ್ಮೆಲ್ಲರನ್ನೂ ಆಶೀರ್ವದಿಸಲಿ... ನಿಮಗೆ ಹೆಚ್ಚಿನ ಶಕ್ತಿ ನೀಡಲಿ ಎಂದು ಹೇಳಿದ್ದರು.

ಇದೀಗ ಭಜ್ಜಿ ಟ್ವೀಟ್​ಗೆ ಪ್ರತಿಕ್ರಿಯೆ ನೀಡಿರುವ ಅಫ್ರಿದಿ, ಮಾನವೀಯತೆ ಎಲ್ಲಕ್ಕಿಂತ ದೊಡ್ಡದು. ಥ್ಯಾಂಕೂ ಭಜ್ಜಿ ನಿಮ್ಮ ವಾತ್ಸಲ್ಯದ ಮಾತುಗಳಿಗಾಗಿ. ಇದು ನಮ್ಮ ಜವಾಬ್ದಾರಿಯಾಗಿದ್ದು, ಕೊರೊನಾ ವೈರಸ್​ನಿಂದ ಇಡೀ ಜಗತ್ತು ರಕ್ಷಣೆ ಮಾಡಬೇಕಾದ ಅನಿವಾರ್ಯತೆ ನಿರ್ಮಾಣಗೊಂಡಿದೆ ಎಂದಿದ್ದಾರೆ.

ಪಾಕಿಸ್ತಾನದಲ್ಲಿ ಸಾಮಾನ್ಯ ಜನರಿಗೆ ಆಹಾರ, ಅಗತ್ಯ ವಸ್ತು ಸೇರಿದಂತೆ ಮಾಸ್ಕ್​ಗಳ ವಿಸ್ತರಣೆ ಮಾಡುತ್ತಿದ್ದ ಆಫ್ರಿದಿ ಕಾರ್ಯಕ್ಕೆ ಎಲ್ಲರಿಂದ ಮೆಚ್ಚುಗೆಗೆ ಪಾತ್ರರಾಗಿದ್ದರು.