ಪವಾಡ ರೀತಿಯಲ್ಲಿ ಆ್ಯಶಸ್​​ ಟೆಸ್ಟ್​ ಗೆದ್ದ ಇಂಗ್ಲೆಂಡ್​​... ಪಂದ್ಯದ ಮಧ್ಯದಲ್ಲೇ ಕುಣಿದು ಕುಪ್ಪಳಿಸಿದ ಮಹಿಳಾ ತಂಡ!

ಆಸ್ಟ್ರೇಲಿಯಾ ವಿರುದ್ಧದ ಆ್ಯಶಸ್​ ಟೆಸ್ಟ್​ ಸರಣಿಯಲ್ಲಿ ಇಂಗ್ಲೆಂಡ್​ ಪವಾಡ ಸದೃಶ್ಯ ರೀತಿಯಲ್ಲಿ ಗೆಲುವು ದಾಖಲು ಮಾಡಿದೆ. ಇದೇ ಸಂತೋಷದಲ್ಲಿ ಅಲ್ಲಿನ ಮಹಿಳಾ ತಂಡ ಕೂಡ ಪಂದ್ಯ ನಡೆಯುತ್ತಿದ್ದಾಗಲೇ ಸಂಭ್ರಮ ಆಚರಣೆ ಮಾಡಿರುವ ಘಟನೆ ನಡೆದಿದೆ.

ಲೀಡ್ಸ್​​: ಆಸ್ಟ್ರೇಲಿಯಾ ವಿರುದ್ಧದ ಆ್ಯಶಸ್ ಟೆಸ್ಟ್​ ಸರಣಿಯ ಮೂರನೇ ಟೆಸ್ಟ್​​ ಪಂದ್ಯದಲ್ಲಿ ವಿಶ್ವಚಾಂಪಿಯನ್​ ಇಂಗ್ಲೆಂಡ್​​ ತಂಡ ಪವಾಡದ ರೀತಿಯಲ್ಲಿ 1ವಿಕೆಟ್​ ಅಂತರದ ಗೆಲುವು ದಾಖಲು ಮಾಡಿ ನೂತನ ದಾಖಲೆ ನಿರ್ಮಾಣ ಮಾಡಿದೆ.

ಆಸ್ಟ್ರೇಲಿಯಾ ನೀಡಿದ್ದ 359ರನ್​ ಗುರಿ ಬೆನ್ನತ್ತಿದ್ದ ಇಂಗ್ಲೆಂಡ್​ ತಂಡಕ್ಕೆ ಕೊನೆ ವಿಕೆಟ್​ ವೇಳೆಗೆ 76ರನ್​ಗಳ ಅವಶ್ಯಕತೆ ಇತ್ತು. ಈ ವೇಳೆ ಏಕಾಂಗಿಯಾಗಿ ಹೋರಾಟ ನಡೆಸಿದ್ದ ಬೆನ್​ ಸ್ಟೋಕ್ಸ್​ ಅಜೇಯರಾಗಿ 135 ರನ್​ಗಳಿಕೆ ಮಾಡುವ ಮೂಲಕ ತಂಡಕ್ಕೆ ಐತಿಹಾಸಿಕ ಗೆಲುವು ದಾಖಲಿಸಿಕೊಟ್ಟಿದ್ದಾರೆ. ಈ ಸಂಭ್ರಮವನ್ನ ಇಂಗ್ಲೆಂಡ್​ ಮಹಿಳಾ ತಂಡ ಕೂಡ ಆಚರಿಸಿದೆ.

KIA ಮಹಿಳಾ ಸೂಪರ್​ ಲೀಗ್​​ ಪಂದ್ಯದಲ್ಲಿ ಭಾಗಿಯಾಗಿದ್ದ ಇಂಗ್ಲೆಂಡ್​ ಮಹಿಳಾ ತಂಡದ ಆಟಗಾರ್ತಿಯರಾದ ಸಾರಾ ಟೇಲರ್​ ಹಾಗೂ ನ್ಯಾಟ್ ಸ್ಕಿವರ್ ಮೈದಾನದಲ್ಲಿ ಬ್ಯಾಟಿಂಗ್​ ಮಾಡುತ್ತಿದ್ದ ವೇಳೆ ಪುರುಷರ ತಂಡ ಗೆಲುವು ದಾಖಲು ಮಾಡಿರುವ ಮಾಹಿತಿ ಗೊತ್ತಾಗಿದೆ. ಈ ವೇಳೆ ಮೈದಾನದಲ್ಲೇ ಇಬ್ಬರು ಪ್ಲೇಯರ್​ ಸಂಭ್ರಮಿಸಿದ್ದಾರೆ. ಸರ್ರೆ ಸ್ಟಾರ್ಸ್ ಮತ್ತು ವೆಸ್ಟರ್ನ್ ಸ್ಟಾರ್ಮ್ ತಂಡಗಳ ನಡುವೆ ಪಂದ್ಯ ನಡೆದಿತ್ತು.

ತಂಡದ ಇಬ್ಬರು ಮಹಿಳಾ ಪ್ಲೇಯರ್​ ಸಂಭ್ರಮಾಚರಣೆ ಮಾಡುತ್ತಿರುವ ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್​ ಆಗಿದೆ.