'ಫ್ಯಾಮಿಲಿ ಮ್ಯಾನ್​' ಸಚಿನ್​ ವಿವಾಹ ವಾರ್ಷಿಕೋತ್ಸವಕ್ಕಾಗಿ ಕುಟುಂಬಕ್ಕೆ ಕೊಟ್ಟ ಸರ್ಪ್ರೈಸ್​ ಏನು?

ಮಾಜಿ ಕ್ರಿಕೆಟರ್​ ಸಚಿನ್​ ತೆಂಡೂಲ್ಕರ್​ ಒಳ್ಳೆ ಬ್ಯಾಟ್ಸ್​ಮನ್​ ಅಷ್ಟೇ ಅಲ್ಲ ಒಬ್ಬ ಫ್ಯಾಮಿಲಿ ಮ್ಯಾನ್​ ಕೂಡ ಹೌದು ಎಂಬುದನ್ನು ಅವರೇ ನಿರೂಪಸಿದ್ದಾರೆ. ತಮ್ಮ 25ನೇ ವರ್ಷದ ವಿವಾಹ ವಾರ್ಷಿಕೋತ್ಸವ ದಿನದಂದು ಕುಟುಂಬಕ್ಕೆ ಸರ್ಪ್ರೈಸ್​ ನೀಡಿದ್ದಾರೆ.

ಮುಂಬೈ: ಭಾರತದ ಕ್ರಿಕೆಟ್​ ದಂತಕತೆ ಸಚಿನ್ ತೆಂಡೂಲ್ಕರ್​ ತಮ್ಮ 25ನೇ ವಿವಾಹ ವಾರ್ಷಿಕೋತ್ಸವವನ್ನು ಆಚರಿಸಿಕೊಂಡಿದ್ದು, ಕುಟುಂಬ ಸದಸ್ಯರಿಗೆ ಮ್ಯಾಂಗೊ ಕುಲ್ಫಿ ತಯಾರಿಸುವ ಮೂಲಕ ಸರ್ಪ್ರೈಸ್​ ಕೊಟ್ಟಿದ್ದಾರೆ.

“ನಮ್ಮ ವಿವಾಹವಾರ್ಷಿಕೋತ್ಸವದ ಪ್ರಯುಕ್ತ ಸರ್ಪ್ರೈಸ್​ ನೀಡುತ್ತಿದ್ದೇನೆ. ನಮ್ಮ 25 ನೇ ವಿವಾಹ ವಾರ್ಷಿಕೋತ್ಸವದಂದು ಮನೆಯಲ್ಲಿರುವ ಎಲ್ಲರಿಗೂ ಸರ್ಪ್ರೈಸ್​​ ನೀಡಲು ಈ ಮಾವಿನ ಹಣ್ಣಿನ ಕುಲ್ಫಿಯನ್ನು ತಯಾರಿಸಿದ್ದೇನೆ ” ಎಂದು ಸಚಿನ್​ ತಮ್ಮ ಇನ್ಸ್ಟಾಗ್ರಾಮ್​ ಪೋಸ್ಟ್​ ಮೂಲಕ ತಿಳಿಸಿದ್ದಾರೆ.

47 ವರ್ಷದ ಸಚಿನ್​ ತೆಂಡೂಲ್ಕರ್ ವಿಡಿಯೋದಲ್ಲಿ ಮ್ಯಾಂಗೋ ಕುಲ್ಫಿಯನ್ನು ಹೇಗೆ ತಯಾರಿಸುವುದು ಎಂದು ವಿವರಣೆ ನೀಡಿದ್ದಾರೆ.

ಸಚಿನ್ ಹಾಗೂ ಅಂಜಲಿ 1990ರಲ್ಲಿ ಇಬ್ಬರು ಭೇಟಿಯಾಗಿದ್ದರು. 5 ವರ್ಷಗಳ ಬಳಿಕ 1995 ಮೇ 24 ರಂದು ವಿವಾಹವಾಗಿದ್ದರು. ಈ ದಂಪತಿಗೆ ಸಾರಾ ಎಂಬ ಮಗಳು, ಅರ್ಜುನ್​ ಎಂಬ ಮಗನಿದ್ದಾನೆ. ಅರ್ಜುನ್​ ಕೂಡ ಕ್ರಿಕೆಟರ್​ ಆಗಿದ್ದು, ವಿಶ್ವದ ಗಮನ ಸೆಳೆದಿದ್ದಾರೆ.