ದುಬೈ: ಭಾರತ ತಂಡದ ಉಪನಾಯಕ ರೋಹಿತ್ ಶರ್ಮಾ ಗಾಯದಿಂದ ಚೇತರಿಸಿಕೊಂಡು ಮುಂಬೈ ತಂಡದಲ್ಲಿ ಆಡುತ್ತಿರುವುದರಿಂದ ನವೆಂಬರ್ 11ರಂದು ಆಸ್ಟ್ರೇಲಿಯಾ ಪ್ರವಾಸ ಕೈಗೊಳ್ಳಲಿರುವ ತಂಡದ ಜೊತೆ ಹಿಟ್ಮ್ಯಾನ್ರನ್ನು ಕಳುಹಿಸಲು ಬಿಸಿಸಿಐ ಆಲೋಚಿಸುತ್ತಿದೆ ಎಂದು ವರದಿಗಳಿಂದ ತಿಳಿದು ಬಂದಿದೆ.
2 ವಾರಗಳ ಹಿಂದೆ ಆಸ್ಟ್ರೇಲಿಯಾ ವಿರುದ್ಧದ ಮೂರು ಮಾದರಿಯ ಕ್ರಿಕೆಟ್ಗೂ ಆಯ್ಕೆ ಸಮಿತಿ ತಂಡವನ್ನು ಘೋಷಿಸಿತ್ತು. ಆದರೆ, ರೋಹಿತ್ ಶರ್ಮಾರನ್ನು ತಂಡದಿಂದ ಕೈಬಿಟ್ಟಿದ್ದು ಅಭಿಮಾನಿಗಳ ಆಕ್ರೋಶಕ್ಕೆ ಹಾಗೂ ಕ್ರಿಕೆಟ್ ಪಂಡಿತರನ್ನ ಆಶ್ಚರ್ಯಕ್ಕೀಡು ಮಾಡಿತ್ತು.
ಆದರೆ, ಕಳೆದ ಎರಡು ಪಂದ್ಯಗಳಲ್ಲಿ ಮುಂಬೈ ತಂಡವನ್ನು ರೋಹಿತ್ ಮುನ್ನಡೆಸಿದ್ದಾರೆ. ಫೀಲ್ಡಿಂಗ್ನಲ್ಲೂ ಚಾಕಚಕ್ಯತೆ ಕಂಡು ಬರುತ್ತಿರುವುದರಿಂದ ಬಿಸಿಸಿಐ ರೋಹಿತ್ರನ್ನು ಆಸೀಸ್ ಪ್ರವಾಸಕ್ಕೆ ಕಳುಹಿಸಲಿದೆ ಎನ್ನಲಾಗುತ್ತಿದೆ.
"ರೋಹಿತ್ ಶರ್ಮಾ ಅವರನ್ನು ಆಸ್ಟ್ರೇಲಿಯಾಕ್ಕೆ ಕಳುಹಿಸುವ ವಿಚಾರವಾಗಿ ಆದಷ್ಟು ಬೇಗ ನಿರ್ಧಾರ ಪ್ರಕಟವಾಗಲಿದೆ. ರೋಹಿತ್ ಭಾರತ ತಂಡದೊಂದಿಗೆ ಇರುವುದು ಮತ್ತು ಫಿಸಿಯೋ ನಿತಿನ್ ಪಟೇಲ್ ಮತ್ತು ಟ್ರೈನರ್ ನಿಕ್ ವೆಬ್ ಜೊತೆ ಸ್ಟ್ರೆಂತ್ ಅಂಡ್ ಕಂಡೀಷನಿಂಗ್ ವರ್ಕ್ ಮಾಡುವುದು ನ್ಯಾಯೋಚಿತವಾಗಿದೆ.
ಇಲ್ಲಿ ಏನು ನಡೆಯುತ್ತದೆ ಎಂದು ಕಾದು ನೋಡೋಣ" ಎಂದು ಬಿಸಿಸಿಐ ಮೂಲ ತಿಳಿಸಿದೆ. ಅಗತ್ಯವಿದ್ದರೆ ರೋಹಿತ್ಗೆ ಏಕದಿನ ಸರಣಿಯಿಂದ ವಿಶ್ರಾಂತಿ ನೀಡುವ ಸಾಧ್ಯತೆಯಿದೆ. ಟಿ20 ಸರಣಿ ವೇಳೆಗೆ ಹಿಟ್‌ಮ್ಯಾನ್‌ ತಂಡಕ್ಕೆ ಮರಳುವ ಸಾಧ್ಯತೆಯಿದೆ ಎಂದು ತಿಳಿದು ಬಂದಿದೆ.